საქართველო მზადაა ჩაერთოს ალიანსის მცდელობებში, შავი ზღვის უსაფრთხოების განმტკიცების კუთხით, – ამის შესახებ საქართველოს პრემიერ-მინისტრმა გიორგი კვირიკაშვილმა ნატო-ს გენერალურ მდივანთან შეხვედრის შემდეგ გამართულ ერთობლივ პრესკონფერენციაზე განაცხადა.
პრემიერმა იენს სტოლტენბერგს მადლობა გადაუხადა საქართველოს ნატო-ში გაწევრიანების მისწრაფების მხარდაჭერისა და ჩართულობისთვის. მისი თქმით, შეხვედრაზე საუბარი შეეხო სტრატეგიული პარტნიორობის სხვადასხვა ასპექტებს.
„ძალიან მნიშვნელოვანია, რომ საქართველოში გამართული ოქტომბრის საპარლამენტო არჩევნების შემდგომ პირველი ოფიციალური ვიზიტი იმართება ბრიუსელში, ნატო-სა და ევროკავშირში. ეს არის შესანიშნავი შესაძლებლობა, შევხვდე საქართველოს უახლოეს მეგობრებსა და პარტნიორებს ნატო-სა და ევროკავშირში. მივიღეთ საქართველოს მოქალაქეების მანდატი, რათა განვაგრძოთ ის რეფორმები და პოლიტიკური კურსი, რომელსაც წლების განმავლობაში განუხრელად მივდევთ. არჩევნების შედეგებმა ასევე გვაჩვენა, რომ ევროატლანტიკური ინტეგრაციის პროცესი ჩვენი მოქალაქეების ეროვნული არჩევანია. ჩვენი მთავრობა მოწოდებულია, ეს მოლოდინი გაამართლოს. გენერალურ მდივანთან დღეს გამართული შეხვედრისას დეტალურად განვიხილეთ საქართველოს ნატო-ში ინტეგრაცია და ვარშავის სამიტის გადაწყვეტილებების იმპლემენტაცია. ვარშავის სამიტზე წევრმა-ქვეყნებმა არაორაზროვნად გაუსვეს ხაზი იმ გარემოებას, რომ საქართველოს აქვს ყველა შესაძლებლობა და ინსტრუმენტი, მოემზადოს გაწევრიანებისათვის. ჩვენ ამ ინსტრუმენტებს მომავალშიც სრულად გამოვიყენებთ, რათა დავუახლოვდეთ გაწევრიანების მიზანს. რაც შეეხება პრაქტიკულ თანამშრომლობას, ჩვენ არ ვიშურებთ ძალ-ღონეს, რათა მაქსიმალურად გამოვიყენოთ ნატო-საქართველოს თანამშრომლობის არსებითი პაკეტი. ჩვენ დიდად ვაფასებთ ნატოს წევრი და პარტნიორი ქვეყნების მხარდაჭერას ამ კუთხით. მათი ჩართულობის შედეგად, გვაქვს კონკრეტული მიღწევები. ჩვენ ვიზიარებთ გენერალური მდივნის ხედვას იმასთან დაკავშირებით, რომ საქართველო და ალიანსი გამოყოფენ ყველა აუცილებელ რესურსს საიმისოდ, რომ განხორციელდეს ნატო-საქართველოს არსებითი პაკეტის ფარგლებში არსებული ყველა პროექტი და გამოყენებული იყოს ვარშავაში განსაზღვრული თანამშრომლობის ყველა პრაქტიკული გზა. ეს ინიციატივები ემსახურება ჩვენი ქვეყნის თავდაცვისუნარიანობისა და მდგრადობის გაძლიერებას და ამ გზით ჩვენი ქვეყნის ნატო-ში გაწევრიანების პროცესის დაჩქარებას“, – განაცხადა კვირიკაშილმა.
მისივე ინფორმაციით, შეხვედრაზე განიხილეს რეგიონული უსაფრთხოების გარემო და არსებული გამოწვევები.
„შევთანხმდით, რომ შავი ზღვის რეგიონული უსაფრთხოება ნატო-ს უსაფრთხოების გარანტიაა. საქართველო მიესალმება ნატო-ს ინიციატივებს შავი ზღვის უსაფრთხოებასთან დაკავშირებით. ჩვენ სრულად ვიაზრებთ შავი ზღვის უსაფრთხოების მნიშვნელობას საქართველოს უსაფრთხოებისა და რეგიონული მშვიდობისთვის. საქართველო, როგორც ასპირანტი ქვეყანა, მზადაა ჩაერთოს ალიანსის მცდელობებში, შავი ზღვის უსაფრთხოების განმტკიცების კუთხით“, – აღნიშნა პრემიერმა.
გიორგი კვირიკაშვილის თქმით, შეხვედრისას, ასევე, ხაზი გაესვა საქართველოს, როგორც სანდო პარტნიორის მნიშვნელობას ალიანსისთვის და საქართველო, როგორც ასპირანტი ქვეყანა, განაგრძობს წვლილის შეტანას ავღანეთის მტკიცე მხარდაჭერის პროგრამაში.
„ჩვენ ასევე შევეხეთ სქართველოში ოკუპირებულ ტერიტორიებზე არსებულ მდგომარეობას და რუსეთსა და სოხუმის თვითგამოცხადებულ რეჟიმს შორის გაფორმებულ ე.წ. შეთანხმების რატიფიკაციის საკითხს. შეთანხმება შეეხება ერთიანი სამხედრო დანაყოფის შექმნას. ეს უკანონო ქმედება უხეშად არღვევს საერთაშორისოდ აღიარებულ ნორმებსა და პრინციპებს. საქართველო მიესალმება ნატოს მხარდაჭერას საქართველოს ტერიტორიული მთლიანობისა და სუვერენიტეტის მიმართ. ჩვენ ასევე გამოვხატავთ მადლობას ნატოს ერთსულოვან და მყარ გადაწყვეტილებას, იმასთან დაკავშირებით, რომ რუსეთმა უნდა შეასრულოს საერთაშორისო ვალდებულება და თავისი სამხედრო ძალები გაიყვანოს ჩვენი ტერიტორიიდან“, – განაცხადა გიორგი კვირიკაშილმა.
