ლანჩხუთის მუნიციპალიტეტის სოფელ ქვიანსა და ჯაპანაში კარიერების მოწყობას, საიდანაც ავტობანის მშენებლობისთვის ინერტული მასალის გაზიდვა უნდა მოხდეს, ადგილობრივი მოსახლეობა დაუშვებლად მიიჩნევს. ისინი საკითხთან დაკავშირებით საკუთარ უარყოფით პოზიციას ხმამაღლა აფიქსირებენ და პოზიციების დათმობას არ გეგმავენ.
"გვაქვს ინფორმაცია, რომ გარემოს დაცვისა და ბუნებრივი რესურსების სამინისტრომ ლიცენზია გასცა ჩვენი სოფლების მთებზე ავტობანის მშენებლობისთვის ინერტული მასალის მოსაპოვებლად კარიერები მოწყობის შესახებ, თანაც 10-წლიანი ვადით. თუ ასე მოხდება, უდიდესი პრობლემის წინაშე დავდგებით სამომავლოდ _ არ გვექნება წყალი, ჩამოინგრევა სასაფლაო და იქვე მშენებარე ორი ეკლესია. ერთ-ერთი ეკლესია უკვე აშენებულია _ მხოლოდ შიდა სამუშაოები დარჩა შესასრულებელი.
ადრე ადგილობრივი ხელისუფლების წარმომადგენლები გვაიმედებდნენ, რომ ჩვენ გვერდით დადგებოდნენ და სოფლისთვის საზიანო გადაწყვეტილებას მხარს არ დაუჭერდნენ, ახლა კი შედარებით თავშეკავებულები ჩანან, კანონის წინააღმდეგ ვერ წავალთო!
არავის მივცემთ უფლებას _ წყლის, სასაფლაოსა და ეკლესიის გარეშე დაგვტოვონ და მეწყერმა წაიღოს ჩვენი სოფლები. ნურავის ექნება იმედი, რომ უკან დავიხევთ, არ გავატანთ აქედან ინერტულ მასალას", _ ამბობენ ადგილობრივები.
გამგებლის მოადგილე ნუგზარ ცინცაძისგან მიღებული ინფორმაციით ირკვევა, რომ ქვიანში, ე.წ. "სატახიას" ტერიტორიაზე ლიცენზია გარემოს დაცვისა და ბუნებრივი რესურსების სამინისტრომ ჯერ კიდევ სამი წლის წინ გასცა, თუმცა, მუნიციპალიტეტთან შეთანხმების გარეშე:
"ქვიანში ლიცენზიის მფლობელს ხელშეკრულება აქვს გაფორმებული ფირმასთან, რომელმაც მოპოვებული ინერტული მასალა უნდა მიაწოდოს ავტობანის მშენებლობის მწარმოებელ ჩინურ კომპანიას. ადგილობრივი მოსახლეობა ეწინააღმდეგება აქ კარიერის ამოქმედებას. თავის დროზე ლიცენზია მუნიციპალიტეტთან შეთანხმების გარეშე გაიცა", _ ამბობს ცინცაძე.
რაც შეხება ჯაპანის ტერიტორიას, ირკვევა, რომ ჩინურ კომპანიას, ჯერჯერობით, ლიცენზია არ მიუღია, თუმცა, მანამდე 500 კუბური მეტრი ინერტული მასალის გატანას ექსპერიმენტისთვის გეგმავს.
"დაახლოებით, 20 მანქანა ინერტულ მასალას გაიტანენ გზის მოსატკეპნად და თუ ვარგისიანი იქნა, ამის შემდეგ დაიწყება საუბარი ლიცენზიის გაცემაზე, რა თქმა უნდა, მოსახლეობის ინტერესების გათვალისწინებით", _ ამბობს "გურია ნიუსთან" საუბრისას გამგებლის წარმომადგენელი ვასილ აბუსერიძე.
