ბრიტანეთის მაუწყებლის BBC-ის ობიექტივში მოხვდა თბილისის მერიის გადაწყვეტილება თანამშრომლებს ჩაცმისა და სუფრასთან ქცევის წესები შეასწავლონ.
BBC პრო-ოპოზიციურ ტელეკომპანია „რუსთავი 2“-ში გასული სიუჟეტის მიხედვით წერს, რომ მერიაში ტარდება ტენდერი ტრენერის შესარჩევად, რომელიც მერიისა და საკრებულოს 38 თანამშრომელს აღნიშნულ წესებს შეასწავლის.
მუნიციპალური სერვისების განვითარების სააგენტოს უფროსის მოადგილე, ნათია ლატარია არხს ეუბნება, რომ ტრენინგი თანამშრომლების მოთხოვნების კვლევის შედეგების მიხედვით შეირჩა.
მისივე თქმით, ჩაცმა და სუფრასთან ქცევის წესები ოფიციალური შეხვედრები და მიღების განუყოფელი ნაწილია.
როგორც სტატიაშია ნათქვამი, მერიის გადაწყვეტილებამ ოპოზიციური პარტია, „ერთიანი ნაციონალური მოძრაობა“ აღაშფოთა.
როგორც პარტიის წევრი, ირაკლი ნადირაძე ამბობს, დაგეგმილი სწავლება „ბიუჯეტის თანხების ბოროტად გამოყენებას ისახავს მიზნად და ჩართულმა პირებმა პასუხი უნდა აგონ". მაუწყებლის ინფორმაციით, „რუსთავი 2“-ის რეპორტაჟი სოციალურ ქსელ „ფეისბუქში“ ბევრგან არის გაზიარებული, სადაც ქართველები აღშფოთებას გამოხატავენ. „მათ, რა თქმა უნდა ხალხის ფული უნდა დახარჯონ სასწავლებლად, არა?“_ წერს ერთ-ერთი „ფეისბუქის“ მომხმარებელი. „წავიდა კაკალი… ხალხი შიმშილით იხოცება, მათ კი სუფრასთან ქცევის წესები აინტერესებთ", _ მიმართავს ხელისუფლებას სოციალური ქსელის კიდევ ერთი მომხმარებელი. კიდევ ერთი მომხმარებელი მიიჩნევს, რომ მერიის პერსონალს მსგავსი სწავლება არ სჭირდება.
„თუ თქვენ არ იცით მსგავსი უნარ-ჩვევები, მაშინ რას აკეთებთ მერიასა და საკრებულოში?“ _ წერს ის.
მაუწყებლის ინფორმაციით, როგორც საინფორმაციო სააგენტო ON-OF.COM იუწყება თბილისის მერი, დავით ნარმანია დაპირისპირებას ემიჯნება და თანამშრომლებს მოუწოდებს იყვნენ უფრო ყურადღებით როცა ტრეინინგს გეგმავენ.
მისი განცხადებით, მნიშვნელოვანია აქცენტი გაცილებით უფრო მნიშვნელოვან საკითხებზე გაკეთდეს.
