„ცრუ აგენტი“ და „მკვლელი“ _ ადვოკატის და ყოფილი პოლიციელის ურთიერთბრალდებები

"თავისუფალი განვითარებისა და უფლებების დაცვის ასოციაციის" ხელმძღვანელი, ადვოკატი ემზარ პაქსაძე მის მიმართ განხორციელებული მუქარის შესახებ საუბრობს და პროკურატურას რეაგირებისკენ მოუწოდებს.

პაქსაძის თქმით, ყოფილი პოლიციელი მურად (მამუკა) ცინცაძე, რომელიც მან რამდენიმე დღის წინ "ცრუ აგენტობაში" ამხილა, ემუქრება. თუმცა, საპირისპიროს ამბობს თავად ცინცაძე. როგორც ის "გურია ნიუსთან" საუბრისას აცხადებს, მამუკა პაქსაძემ მას ცილი დასწამა და არასწორი ინფორმაციები გაავრცელა.

აღნიშნულთან დაკავშირებით ორივე პირმა პროკურატურას მიმართა. ხვალ, საქმეზე დამატებითი ინფორმაციის მისაღებად მთავარ პროკურატურაში ემზარ პაქსაძე უნდა მივიდეს.

როგორც პაქსაძე ამბობს, მას მუქარის წერილები მას შემდეგ მიუვიდა, რაც მამუკა ცინცაძე "ცრუ აგენტობაში" ამხილა. პაქსაზე აღნიშნავს, რომ 2017 წლის 13 იანვარს მან მთავარ პროკურატურას გამოძიების დაწყების მოთხოვნით მიმართა და კონკრეტული პირების, ე.წ. ცრუ აგენტების შესახებ ინფორმაცია მიაწოდა. მოგვიანებით ეს ინფორმაცია მედიასაშუალებებში გაჟღერდა, რამაც, მისივე თქმით, მამუკა ცინცაძის გაღიზიანება გამოიწვია.

"მივმართე საქართველოს მთავარ პროკურატურას და მოვითხოვე ე.წ. ცრუ აგენტების მიმართ გამოძიების დაწყება. შესაბამისი განცხადება ჩემს მიერ  გამოქვეყნებულ იქნა არასამთავრობო ორგანიზაცია "თავისუფალი განვითარებისა და უფლებების დაცვის ასოციაციის" საიტზე, სადაც ვამხელდით იმ ეტაპისთვის 4 პირს, ე.წ. ცრუ აგენტობაში. ჩვენს ხელთ არსებული ინფორმაციით, ეს პირები მონაწილეობდნენ ე.წ. დაზარალებულებად ქრთამის აღებისა და თაღლითობის საქმეში. ერთ-ერთი მხილებული პირი იყო მურად (მამუკა) ცინცაძე, რომელიც თავის დროზე თავად იყო ბრალდებული თაღლითობაზე და გაუფორმდა საპროცესო შეთანხმება. ამის შემდეგ მან გამოძიებასთან ითანამშრომლა ადვოკატ თამილა ქუთათელაძის საქმეზე, რომელსაც ცინცაძის ჩვენების საფუძველზე 9 წელი მიუსაჯეს. მოგვიანებით, 2015 წელს, მამუკა ცინცაძე კიდევ ერთ საქმეში გამოჩნდა _ ასპინძის გამგებლის მოადგილის ლევან ხოზრევანიძის საქმეში მოწმის სახით. დაზარალებულად საქმეში თურქეთის მოქალაქეა მითითებული, თუმცა, როგორც ხოზრევანიძე ყვება, მამუკა ცინცაძე იყო იმ შეხვედრის სულისჩამდგემელი, რომელი შეხვედრის დროსაც გადაღებული ფარული ჩანაწერითაც ხოზრევანიძე პასუხისგებაში მიეცა. ამის შესახებ ვისაუბრე ჟურნალისტებთან. "იმედის დროში" გასული სიუჟეტის შემდეგ კი, 2 დღის მერე ე.წ. მესენჯერში ცინცაძემ გამომიგზავნა შეურაცხმყოფელი და, ჩემი მოსაზრებით, საადვოკატო საქმიანობაში ხელისშემშლელი შეტყობინება. წერილი შეიცავს მუქარას: "რა გადაგიხადეს ამდენი", "შე, საცოდაო ხეპრე, მოგიწევს ყველაფერზე პასუხის გაცემა. შენ არ მოისვენებ", "სამაგიეროდ გადაგიხდი" და ა.შ.",_ განაცხადა პაქსაძემ "გურია ნიუსთან" საუბრისას.

როგორც ადვოკატი აღნიშნავს, გარდა ამ წერილისა, სხვა სახის  მუქარა მასზე ან მისი ოჯახის წევრებზე არ ყოფილა.

"ამის საშუალება მე თვითონ აღარ მივეცი, არ გამოვპასუხებივარ მის შეტყობინებას და ვაცნობე როგორც მთავარ პროკურატურას, ასევე ადვოკატთა ასოციაციას", _ ამბობს პაქსაძე.

ადვოკატი აღნიშნავს, რომ ამის მიუხედავად ის გაჩერებას არ აპირებს და ე.წ. ცრუ აგენტების შესახებ ინფორმაციას საზოგადოებას მოგვიანებითაც მიაწვდის. როგორც პაქსაძემ "გურია ნიუსთან" საუბრისას აღნიშნა, ამჟამად მისი არასამთავრობო ორგანიზაციის ბაზაში მსგავსი 12 პირის შესახებ არის ინფორმაცია. თუმცა, მოკვლევას ისევ აგრძელებს.

"მივუთითებთ ყველანაირ ინფორმაციას, აღნიშნული პირები რომელ საქმეში იყვნენ. ასევე იმ პირების შესახებ საკონტაქტო ინფორმაციას, რომლებსაც შეუძლიათ დაინტერესებულ საზოგადოებას მეტი ინფორმაცია მიაწოდონ. ამის წინააღმდეგ არის მიმართული ეს პროცესი, სისტემური პრობლემის შესახებ ინფორმაცია არ უნდათ რომ გახმაურდეს. ჩემ მიზანი არ არის მოწმეებზე ზემოქმედების მოხდენა, ამის გამო გამოვაქვეყნე მათზე ინფორმაცია, სასამართლო პროცესების დასრულების შემდეგ. ვფიქრობ, უნდა დამთავრდეს საქართველოში დრო, როდესაც, ვინმე ჩადის ჩემს წინააღმდეგ დანაშაულს, მე უნდა მქონდეს დაცვის მექანიზმი, რომელიც აუცილებლად პოლიცია და სამართალდამცავი ორგანოები უნდა იყვნენ. მინდა დაღდასმული, შეურაცხმყოფელი მოწმეებისგან გაიწმინდოს საქმეები", _ აღნიშნა პაქსაძემ "გურია ნიუსთან" საუბრისას და დასძინა, რომ ხვალ ის მთავარ პროკურატურაშია დაბარებული საქმეზე დამატებითი ინფორმაციის მისაწოდებლად.

 "გურია ნიუსი" მამუკა ცინცაძესაც დაუკავშირდა. როგორც ცინცაძე ჩვენთან საუბრისას ამბობს, მისი მხრიდან ემზარ პაქსაძის მიმართ არანაირ მუქარას ადგილი არ ჰქონია.

ცინცაძესთან ჩაწერილ ინტერვიუს უცვლელად გთავაზობთ:

_ბატონო მამუკა, ადვოკატი ემზარ პაქსაძე თქვენი მხრიდან განხორციელებულ მუქარაზე საუბრობს. ამბობს, რომ თქვენ მას მუქარის შემცველი წერილები გაუგზავნეთ…

_არავითარი მუქარა არ ყოფილა, მაგი იჯდა ეთერში, წაიკითხა რაღაც წერილი და ჟურნალისტმა რომ ჰკითხა სად არის აქ მუქარაო, მერე დაიწყო ბოდიალი. რა მუქარა? ასეთ არაკაცებს არ ვემუქრები მე, არაფერი არ ყოფილა მანდ მუქარა. სამართლიან შურისძიებას ვაპირებ-თქო, ეგ მივწერე. მეტი არაფერი არ მიწერია. რა მუქარა?

_ანუ ეს თქვენი სიტყვებია რაზეც ბატონი ემზარი საუბრობს. ციტატას წაგიკითხავთ: "შე, საცოდაო ხეპრე, მოგიწევს ყველაფერზე პასუხის გაცემა. შენ არ მოისვენებ", "სამაგიეროდ გადაგიხდი" და ა.შ.?

_იქ არაფერი წერია, მივწერე არაფერია იმაზე კარგი ვიდრე სამართლიანი შურისძიება-თქო.

_რა შურისძიებაზე  საუბრობთ?

_სამართლიან შურისძიებაზე ვსაუბრობ. იმაზე, რომ ტყუილები ილაპარაკა, ცილი დამწამა და ჩემი შეურაცხყოფა მოინდომა ეთერში და საზოგადოების თვალში.  არარსებული ინფორმაციები გააჟღერა და  არარსებულ რამეებზე ილაპარაკა. ისიც უნდა გაითვალისწინოს, რომ პოლიციის პოლკოვნიკი ვარ და საზოგადოებრივი წესრიგის დაცვა არის ჩემი მოვალეობა, კრიმინალებს დავსდევდი და არ ვიყავი ქუჩის მოქალაქე…

_სხვადასხვა საქმეებზე საუბრობენ ადვოკატები თქვენი მონაწილეობით. არა მარტო ემზარ პაქსაძე, ადვოკატი თამილა ქუთათელაძეც "იმედის დროსთვის" მიცემულ ინტერვიუში…

_თამილა ქუთათელაძის მსხვერპლი ვიყავი მე პირადად. მეტი თემა იქ არ არსებობს.

_ემზარ პაქსაძე, ამბობს, რომ მისი დაცვის ქვეშ მყოფის წინააღმდეგ მიეცით ჩვენება. ასევე, თამილა ქუთათელაძე აღნიშნავს, რომ თქვენ მის წინააღმდეგაც გაქვთ ჩვენება მიცემული.

_მე მივეცი ჩვენებები მის წინააღმდეგ კი არა, ქუთათელაძის მიერ გაკეთებულ საქმეებზე. რამოდენიმე კლიენტი გადააგდო, ჩემი ახლობლები, ფული წაართვა და აღარ დაუბრუნა.

_რამდენ ასეთ საქმეზეა საუბარი, რამდენ საქმეზე გაქვთ ჩვენება მიცემული?

_ორ საქმეზე. მეტ საქეებს მე არ ვიცნობ.

_ბატონი ემზარი რომელ საქმეზეც საუბრობს, ამაზე რა შეგიძლიათ გვითხრათ? ასპინძის გამგებლის მოადგილის, ლევან ხოზრევანიძის საქმეზე…

_ეგ ერთი საქმე იყო. მე არაფერ შუაში არა ვარ, ვიღაცამ ვიღაცას ფული გამოართვა მე არაფერ შუაში ვარ. ემზარს თავისი ბოღმა აინტერესებს. ემზარს ჰქონდა ერთხელ შესაძლებლობა დაემსახურებინა და ყოფილიყო კაი კაცი, პოლიციელად რომ მუშაობდა. მაშინ კაცი მოკლა კამერაში ცემით და წამებით, მაგაზე ციხეში იჯდა.

_ბატონო მამუკა, უკაცრავად, თქვენ ახლა ადვოკატს მკველობაში ადანაშაულებთ.

_ბრალს მე არავის არ ვდებ. ბრალდებულიც იყო და იჯდა კიდეც ციხეში პატიმრის წამებისთვის. ამაზე ილაპარაკოს, ეს რატომ გააკეთა. მეტს არ ვილაპარაკებ…

_რას  უკავშირებთ ადვოკატების მხრიდან ამ განცხადებების გავრცელებას თქვენს წინააღმდეგ?

_მართვადია ეს პროცესი, შეკვეთას ემსახურება.

_ვისი მხრიდან არის ეს შეკვეთა მიცემული და ვინ მართავს პროცესს?

_ახლა ვერ ვივარაუდებ, მაგრამ მიზანმიმართულია. ჩემი დამცირება და ცილისმწამებლური განცხადებები ჩემზე შეგნებულად გააჟღერეს. რისი საფუძველიც არ გააჩნიათ.

_რას აპირებთ ამ განცხადებების შემდეგ?

_უკვე შევიტანე  პროკურატურაში განცხადება და გაარკვევენ ყველაფერს. პროვოკაცია მოაწყვეს ჩემს მიმართ და თვითო არიან ეგენი პროვოკატორები და აგენტები", _ აღნიშნავს ცინცაძე.

მამუკა ცინცაძესთან ინტერვიუს ჩაწერის შემდეგ ადვოკატ ემზარ პაქსაძეს ისევ დავუკავშირდით. "გურია ნიუსი" ემზარ პაქსაძის ინტერვიუსაც უცვლელად გთავაზობთ:

_ბატონო ემზარ, თქვენი ინტერვიუს შემდეგ, მამუკა ცინცაძეს ვესაუბრეთ. ის ჩვენთან ინტერვიუში იქეთ გადანაშაულებთ ცილისწამებაში და ამბობს, რომ თქვენ და თამილა ქუთათელაძემ მის წინააღმდეგ მიზანმიმართულად, დავალებით გაავრცელეთ ე.წ. ცრუ აგენტობასთან დაკავშირებით ინფორმაცია.

_ვისი მხრიდან მართულ პროცესზე საუბრობს? კონკრეტულ პირს ასახელებს?

_კონკრეტული პირი მას არ დაუსახელებია. თუმცა, ის ჩვენთან ინტერვიუში თქვენ გიყენებთ ბრალდებებს.

_რა ბრალდებებზე საუბრობს?

_ ცინცაძე ამბობს: "ემზარს თავისი ბოღმა აინტერესებს. ემზარს ჰქონდა ერთხელ შესაძლებლობა დაემსახურებინა და ყოფილიყო კაი კაცი, პოლიციელად რომ მუშაობდა. მაშინ კაცი მოკლა კამერაში ცემით და წამებით, მაგაზე ციხეში იჯდა". რაიმე კავშირშია ეს საქმეები ერთმანეთთან თუ რაზე საუბრობს თქვენი აზრით ცინცაძე?

_აზრზე არ ვარ რაზე საუბრობს. ცრუობს…

_პოლიციელად მუშაობდით?

_ვმუშაობდი პოლიციაში 1996-97 წლებში, მაგრამ დანარჩენზე ცრუობს. თითქოს მე  მსჯავრდებული ან ბრალდებული ვიყავი მკვლელობაზე. თავის ბინძურ თეთრეულს მიხედოს…

_მსჯავრდებული ან ბრალდებული არცერთ საქმეზე არ ყოფილხართ?

_მკვლელობასთან და  მსგავს უბედურებებთან დაკავშირებით არაფერზე ბრალდებული არ ვყოფილვარ. ეგ კაცი არის ცრუ აგენტი. თავის საქმეს მიხედოს. პირველად კი არ არის რომ ასეთ რამეებს იგონებენ. მაგ კაცი ვამხილე დანაშაულში. მთავარი ესაა, თუ რაიმე ცილისმწამებლურ ქმედებას ექნება ადგილი ჩემს წინააღმდეგ ამაზეც გავცემ პასუხს აუცილებლად. ყველაფერზე მოუწევს პასუხის გაცემა. თუ მე კაცი მოვკალი, ხომ უნდა არსებობდეს ეს მკვდარი კაცი? არაფერზე კონკრეტულად ეგ არ საუბრობს. რამდენი ხანი ვიჯექი ერთი ეგ მითხრას, ერთი დღე ვიჯექი თუ ერთი საათი მკვლელობისთვის? ბოდიალობს რაღაცეებს. ეს ადამიანი ცდილობს რომ  სხვა თემაზე გადაიტანოს საუბარი, მაგრამ ამას ვერ შეძლებს. ხვალ პროკურატურაში ვარ დაბარებული და აუცილებლად ვიტყვი ყველაფერს. ადამიანი თაღლითობისთვის იყო დაკავებული, მოიხადა სასჯელი და პოლიციაში აღადგინეს, თვითონ ამბობს პოლიციის პოლკოვნიკი ვარო. თანამდებობაზეა და კითხვები რატომ არ უნდა მქონდეს? რაც შეეხება თამილა ქუთათელაძეს, რაც არ უნდა თქვას მასზე, ქუთათელაძე გაამართლა სასამართლომ და ამ გამართლებულ ადამიანს ეძახის თაღლითს. თვითონ რომ თაღლითობაზე იჯდა ამაზე იძახის არ ყოფილაო. არც კი ვიცი რა ვთქვა", _ აღნიშნა "გურია ნიუსთან" საუბრისას ემზარ პაქსაძემ.

ადვოკატზე განხორციელებულ ზეწოლაზე საუბრობს ადვოკატთა ასოციაციის თავმჯდომარე ზაზა ხატიაშვილიც. მან დღეს ემზარ პაქსაძის საქმესთან დაკავშირებით განცხადება გაავრცელა და სახელმწიფოსგან ადვოკატის ოჯახის უსაფრთხოება მოითხოვა.

 "ადვოკატთა ასოციაციის თავმჯდომარე  გაოგნებული ვარ პროკურატურის უმოქმედობით  ადვოკატ ემზარ პაქსაძეთან მიმართებაში განხორციელებული ძალადობის  გამო. ადვოკატმა ემზარ პაქსაძემ მიმართა მთავარ პროკურატურას და წარუდგინა მტკიცებულებები გარკვეული პირების მხრიდან, სავარაუდო დანაშაულის ჩადენის ფაქტთან მიმართებაში და  რამოდენიმე მოქალაქე მტკიცებულებათა ფალსიფიკაციაში ამხილა სამართალდამცავი ორგანოების მხრიდან, რამოდენიმე სისხლის სამართლის საქმეზე მოწმის სტატუსით ერთი და იგივე პირების გამოყენებაში, რასაც, სამწუხაროდ, ხშირად მიმართავენ სამართალდამცავი ორგანოები ე.წ "შეკერილი" ბრალის დამტკიცების მიზნით.

 სამართლებრივ სახელმწიფოში, ნებისმიერი პროკურატურა  უმოკლეს ვადაში ეფექტურ გამოძიებას  ჩაატარებდა  აგენტ–პროვოკატორების გამოვლენის და დასჯის მიზნით. მაგრამ პროკურატურის, სავარაუდო  დანაშაულებრივი უმოქმედობით,  გათავხედებულმა ერთ-ერთმა  სავარაუდო  დამნაშავემ, კერძოდ, მურად (მამუკა) ცინცაძემ ადვოკატ ემზარ პაქსაძის მიმართ განახორციელა მუქარა, რაც დაკავშირებულია ემზარ პაქსაძის საადვოკატო უფლებამოსილებასთან და წარმოადგენს ადვოკატის საქმიანობაში ხელის შეშლას.

ადვოკატ ემზარ პაქსაძის ოჯახს უსაფრთხოება შეიძლება დარტყმის ქვეშ დადგეს, რაზედაც ვალდებულია იზრუნოს სახელმწიფომ. მოვითხოვ დაუყოვნებლივ დაიწყოს სისხლისსამართლებრივი დევნა მურად (მამუკა) ცინცაძის მიმართ, ადვოკატ ემზარ პაქსაძის  საადვოკატო საქმიანობაში ხელის შეშლის გამო. მოვითხოვ სახელმწიფომ უზრუნველყოს ადვოკატ ემზარ პაქსაძის ოჯახის უსაფრთხოება", _ აღნიშნულია ადვოკატთა ასოციაციის თავმჯდომარის განცხადებაში.