საქართველოს პარლამენტის რეზოლუციის პროექტი „საქართველოს საგარეო პოლიტიკის შესახებ" პარლამენტის სხდომაზე განსახილველად პარლამენტის თავმჯდომარის პირველმა მოადგილემ, თამარ ჩუგოშვილმა წარმოადგინა.
მისი განმარტებით, პარლამენტის ახალი შემადგენლობის გზავნილები 2013 წლის 7 მარტს მიღებულ დოკუმენტს ეფუძნება, რითაც ქვეყნის საგარეო კურსის ურყევობა საკანონმდებლო ორგანოს მიერ კიდევ ერთხელ მკაფიოდ ფიქსირდება.
თამარ ჩუგოშვილმა, რეზოლუციაში მოცემული ძირითადი მიმართულებების შესახებ ისაუბრა. ერთ-ერთი უმთავრესი მიმართულება ქვეყნის ტერიტორიული მთლიანობის აღდგენა და დეოკუპაციაა. რეზოლუციის ერთ-ერთი მიმართულება დემოკრატიული ინსტიტუტების და დემოკრატიული პროცესების გაძლიერება და განმტკიცებაა.
ქვეყნის პრიორიტეტული მიმართულებაა ევროკავშირში გაწევრიანება და ამ მიმართულებით გრძელდება ასოცირების ხელშეკრულების შეთანხმების შესრულება, ღრმა და ყოვლისმომცველი თავისუფალი სავაჭრო სივრცის კომპონენტის მაქსიმალურად გამოყენება. „ამ მიმართულებით რეფორმები გრძელდება, მაგრამ ამავე დროს ჩვენ ვამბობთ, რომ ასოცირების შეთანხმება არ არის საქართველოსთვის ბოლო ნაბიჯი და საქართველოს საბოლოო მიზანია ევროკავშირიში გაწევრიანება, ევროკავშირის ხელშეკრულების 49-ე მუხლის შესაბამისად, საქართველოსთვის უალტერნატივო პრიორიტეტად რჩება ნატო-ში გაწევრიანება. ჩვენი ქვეყანა აგრძელებს მუშაობას, რათა პრაქტიკულად განხორციელდეს 2008 წელს ბუქარესტის სამიტზე მოკავშირეების მიერ მიღებული გადაწყვეტილება, რომ საქართველო გახდება ნატო-ს წევრი და საქართველო აგრძელებს თავდაცვისუნარიანობის განმტკიცების და ნატო-სთან თავსებადობის ამაღლების კუთხით რეფორმების განხორციელებას. ასევე მნიშვნელოვანი პრიორიტეტია ჩვენს მთავარ სტრატეგიულ პარტნიორთან, ამერიკის შეერთებულ შტატებთან კიდევ უფრო დაახლოება და სტრატეგიული პარტნიორობის ქარტიის შესაბამისად, ურთიერთობის კიდევ უფრო გაღრმავება.
საქართველო აქცენტს აკეთებს მრავალმხრივ ფორმატებზე, რომლის წევრიც არის ჩვენი ქვეყანა და საქართველოს როლი კიდევ უნდა გაძლიერდეს და გააქტიურდეს გაერთიანებული ერების ორგანიზაციის, ევროპის უსაფრთხოებისა და თანამშრომლობის ორგანიზაციის, ევროპის საბჭოს, შავი ზღვის ეკონომიკური თანამშრომლობის ორგანიზაციის, სუამის და სხვა საერთაშორისო ორგანიზაციების ფორმატებში და ეს მაქსიმალურად უნდა იყოს გამოყენებული რათა მოხდეს საქართველოს სტრატეგიული ინტერესების როგორც ადვოკატირება, ასევე ჩვენი მხრივ წვლილის შეტანა ამ საერთაშორისო ფორმატებში", – განაცხადა თამარ ჩუგოშვილმა.
რეზოლუციის მიხედვით, საქართველო, როგორც თანამედროვე საერთაშორისო თანამეგობრობის პასუხისმგებლიანი წევრი და საერთაშორისო მშვიდობის მხარდამჭერი, სრულად გაიზიარებს მოვალეობებს იმ გამოწვევებთან გამკლავებაში, რომელთა წინაშეც დგას ცივილიზებული მსოფლიო. საქართველოს ხელისუფლება განსაკუთრებულ ყურადღებას დაუთმობს საერთაშორისო უსაფრთხოებისა და სტაბილურობის განმტკიცების მიზნით მიმდინარე სამხედრო ოპერაციებში მნიშვნელოვანი წვლილის შეტანას, საერთაშორისო ტერორიზმთან და ორგანიზებულ დანაშაულთან ბრძოლას, აგრეთვე მასობრივი განადგურების იარაღის, ჩვეულებრივი შეიარაღებისა და სამხედრო ტექნიკის უკონტროლო გავრცელების პრევენციას.
დოკუმენტში ხაზგასმულია საქართველოს ურთიერთობა რუსეთთან. იმის გათვალისწინებით, რომ რუსეთს ჩვენი ქვეყნის ტერიტორიების 20% აქვს ოკუპირებული და იმ პირობებში, როდესაც დეოკუპაცია რჩება ჩვენს მთავარ პრიორიტეტად, გრძელდება რაციონალური, პრაგმატული და პრინციპული პოლიტიკა რუსეთთან.
ამ პოლიტიკის მთავარი მიზანია საგარეო საფრთხეების მინიმიზაცია, საქართველოს სუვერენიტეტის განმტკიცება, ტერიტორიული მთლიანობის აღდგენა და რეგიონში სტაბილურობის ხელშეწყობა.
საქართველო რეგიონში სტაბილურობის უზრუნველყოფასა და ეკონომიკური, სოციალური და კულტურული კავშირების განვითარებაში მნიშვნელოვან წვლილს შეიტანს.
საქართველოს საგარეო პოლიტიკის პრიორიტეტია ტრანსნაციონალური პროექტებისათვის ხელსაყრელი გეოპოლიტიკური მდებარეობის ქმედითი გამოყენება და ეკონომიკური და სხვა სახის ურთიერთობების გაფართოება აღმოსავლეთის ქვეყნებთან.
ასევე მნიშვნელოვანია საზღვარგარეთ მყოფი საქართველოს მოქალაქეების უფლებებისა და კანონიერი ინტერესების დაცვა, ქართულ დიასპორასთან ურთიერთობის განმტკიცება და უცხოეთში მყოფი საქართველოს მოქალაქეების სამშობლოში ღირსეული დაბრუნება და ინტეგრაცია.
ქვეყნის ევროპული და ევროატლანტიკური კურსის შესახებ ჩვენი საზოგადოების მეტი ინფორმირებისთვის აქტიური მუშაობა წარიმართება, რაც საზოგადოებაში ქვეყნის დასავლური კურსის გაცნობიერებულ მხარდაჭერას უზრუნველყოფს.
„ჩვენ მიგვაჩნია, რომ მნიშვნელოვანია არ დავასრულოთ წლევანდელი წელი და ეს სესია ისე, რომ კიდევ ერთხელ არ დააფიქსიროს საქართველოს პარლამენტმა ქვეყნის საგარეო პრიორიტეტები. ეს პოლიტიკური გზავნილი, როგორც ჩვენი უცხოელი მეგობრებისთვის, ჩვენი სტრატეგიული პარტნიორებისთვის, ასევე ჩვენი მოქალაქეებისთვის არის მნიშვნელოვანი პოლიტიკური გზავნილი და გთხოვთ მხარი დაუჭიროთ ამ დოკუმენტს," – მიმართა თამარ ჩუგოშვილმა კოლეგებს.
რეზოლუციის შესახებ თავიანთი პოზიციები დააფიქსირეს ფრაქციების, საპარლამენტო უმრავლესობისა და უმცირესობის წარმომადგენლებმა.
უმცირესობას მიაჩნია, რომ დოკუმენტი უნდა განიხილებოდეს დახურულ ფორმატში, რასაც საკითხის მნიშვნელობიდან გამომდინარე, უმრავლესობა არ დაეთანხმა.
პარლამენტის თავმჯდომარის, ირაკლი კობახიძის განცხადებით, „პრინციპულად მნიშვნელოვანია ამ დადგენილების პროექტის წელს მიღება, გამომდინარე იქიდან, რომ მნიშვნელოვანია პარლამენტმა თავისი მუშაობის საწყის ფაზაში მიიღოს დადგენილება, რომელიც ზუსტად ასახავს ჩვენი ქვეყნის საგარეო პოლიტიკურ პრიორიტეტებს," – განაცხადა პარლამენტის თავმჯდომარემ .
საკითხის განხილვა სხდომაზე ღია ფორმატში გაგრძელდა. საპარლამენტო ოპოზიციის წარმომადგენლებს მიაჩნიათ, რომ დოკუმენტში ძირითადი მიმართულებები სწორადაა ასახული, თუმცა რეზოლუციის ის ნაწილი, სადაც რუსეთთან ურთიერთობის საკითხზეა საუბარი, მათი მხრიდან უარყოფითად შეფასდა.
ფრაქცია „ერთიანი ნაციონალური მოძრაობის" წევრის, გიორგი წერეთლის აზრით, „ჩვენი მთავარი ამოცანა მართლა არის ის, რომ ჩვენი ქვეყანა იყოს ძლიერი. რაც უფრო მეტად ძლიერი ვიქნებით, მით უფრო ნაკლები საფრთხე დაემუქრება ეკონომიკურადაც, პოლიტიკურადაც, სამხედრო თვალსაზრისითაც. მეტი სიძლიერე ნიშნავს საფრთხეების მინიმიზებას, ამიტომ ამ შემთხვევაში ვფიქრობ, რომ შეგვიძლია უფრო მშვიდად მივიღოთ გადაწყვეტილება და განვსაზღვროთ ჩვენი ქვეყნის ძირითადი საგარეო პრიორიტეტები და ვფიქრობ, რომ ამდენი აჟიოტაჟი არ იყო საჭირო ამ საკითხთან დაკავშირებით".
საპარლამენტო უმრავლესობის წევრებმა დადებითად შეაფასეს წარმოდგენილი დოკუმენტი და მის მნიშვნელობასა და საჭიროებაზე ისაუბრეს. უმრავლესობას მიჩნია, რომ ეს არის ის საგარეო კურსი, რომელსაც ჩვენმა მოქალაქეებმა დაუჭირეს მხარი. „ძალიან მნიშვნელოვანია შეიქმნას ყველა პირობა, რომ ქვეყანაში იყოს მეტი კეთილდღება და სტაბილურობა, კანონის უზენაესობა და დემოკრატიული ინსტიტუტების განვითარება. სწორედ ეს დოკუმენტია ის ქმედითი ინსტრუმენტი, რომლის მეშვეობითაც უნდა განხორციელდეს დასახული ამოცანები,"-განაცხადა საგარეო ურთიერთობათა კომიტეტის თავმჯდომარემ, სოფიო ქაცარავამ.
დოკუმენტთან დაკავშირებით, თავის გამოსვლაში გიორგი ვოლსკიმ 2004-2006 წლებში განვითარებული მოვლენები გაიხსენა და იმ ფაქტებზე ისაუბრა, რომლებიც სოხუმსა და ცხინვალთან სამშვიდობო მოლაპარაკებების პერიოდს მოიცავდა. მისი განცხადებით, სამშვიდობო მოლაპარაკებები მაშინდელი ხელისუფლების არასწორი პოლიტიკის გამო ჩიხში შევიდა და საბოლოო ჯამში, დადებითი შედეგის გარეშე დასრულდა. მანვე პარლამენტის რეზოლუციის პროექტი შეაფასა და მას სწორი და დაბალანსებული უწოდა.
„ყველა საკითხთან დაკავშირებით გამართული დოკუმენტია, რომელსაც პრაქტიკული გამოყენების რესურსი გააჩნია და რომელიც მიუთითებს სწორ მიმართულებებს საით უნდა ვიაროთ. თუ ამ დაწერილის მიღმა კიდევ რაიმე დადებითი ნაბიჯი გადაიდგმება, არც ამაზე შეიკავებს ვინმე თავს", – განაცხადა გიორგი ვოლსკიმ.
ფრაქცია „საქართველოს პატრიოტების" სახელით, რეზოლუციასთან დაკავშირებით, საკუთარი პოზიცია დააფიქსირა ადა მარშანიამ. მისი თქმით სამშობლოს დაკარგული ტერიტორიების დასაბრუნებლად არა ევროსტრუქტურებთან და ნატოსთან, არამედ რუსეთთან ინტენსიური თანამშრომლობაა საჭირო.
ფრაქცია „ქართული ოცნება – მრეწველების" თავმჯდომარემ, სიმონ ნოზაძემ წარმოდგენილი რეზოლუციის პროექტის შესახებ ფრაქციის პოზიცია დააფიქსირა. „ძალიან მნიშვნელოვანი რეზოლუციის პროექტია, რაც იმითაც დასტურდება, რომ უმცირესობაც მზად არის მხარი დაუჭიროს ამ პროექტს," – განაცხადა ფრაქციის თავმჯდომარემ.
სიმონ ნოზაძემ ყურადღება საქართველო-რუსეთის ურთიერთობაზეც გაამახვილა. „რუსეთთან ურთიერთობის მხოლოდ ერთი ფორმატი გვაქვს – ჟენევის ფორმატი და იქ რისი თქმაც შეიძლება, იმაზე მიმდინარეობს ლაპარაკი", _ განაცხადა სიმონ ნოზაძემ და აქვე აღნიშნა, რომ შესაძლოა, მსოფლიო ფუნდამენტური ცვლილებების წინაშე აღმოჩნდეს და მეტი სიფრთხილეა საჭირო.
„ჩვენ ამაზე უფრო პრინციპულ პოზიციას, რომელიც ამ რეზოლუციაშია, ვერ დავიკავებდით. ამაზე უფრო პრაგმატული პოზიციის დაკავება ამ ეტაპზე გაუმართლებელიც კი იქნება. პრაგმატული პოზიცია მაშინ არის გამართული, როდესაც ზურგს გიჭერს ან ძალიან ძლიერი ეკონომიკა, ან ძალიან ძლიერი ჯარი, ან ძალიან ძლიერი მოკავშირეები. ჩვენი მოკავშირეები მხარს გვიჭერენ, ევროკაშირი მხარს გვიჭერს და აშშ მხარს გვიჭერს, განვაცხადეთ კიდეც, რომ ჩვენი სწრაფვა ევროკავშირისკენ და ნატოსკენ უალტერნატივოა", _ განაცხადა სიმონ ნოზაძემ.
საპარლამენტო უმრავლესობისა და უმცირესობის წარმომადგენლების გამოსვლების შემდეგ, თამარ ჩუგოშვილმა კოლეგების შეკითხვებს უპასუხა.
მისი შემაჯამებელი სიტყვის შემდეგ პარლამენტმა კენჭი უყარა წარმოდგენილ დოკუმენტს, რომელიც ერთხმად, 91 ხმით მიიღეს.
