თბილისში, მარიჯანის ქუჩაზე „ცენტრ პოინტის“ შენობა დგას. 16-სართულიანი კორპუსის მხოლოდ ნაწილია აშენებული, ისიც დაუსრულებელია. შენობის გარშემო და შენობაშიც საშინელი ანტისანიტარიაა. მიუხედავად იმისა, რომ ტერიტორია შემოსაზღვრულია (ქუჩის მხრიდან ხის ღობე აქვს), ღობის დაზიანებული ნაწილიდან უცხო პირები შიგნით შესვლას მაინც ახერხებენ.
„გურია ნიუსმა“ დააფიქსირა, როგორ შეძვრა დაახლოებით 10-მდე მოზარდი ღობის დაზიანებული ნაწილიდან ჯერ ეზოში, შემდეგ კი შენობის შიგნით. მოზარდები, დაახლოებით, 40 წუთის განმავლობაში შენობის მაღალი სართულებიდან იხედებოდნენ. აღსანიშნავია, რომ ობიექტს დაცვის სამსახური არ იცავს.
დარაჯი, „გურია ნიუსის“ ჟურნალისტს ადგილზე არ დახვდა. ის მოგვიანებით მოვიდა და განაცხადა, რომ არანაირი ვალდებულება არ აქვს, ობიექტზე მყოფ პირებს გაფრთხილება მისცეს. როგორც მან განაცხადა, ობიექტის დაცვისთვის არავინ არაფერს უხდის.
„არ ვიცი, არაფერი, ასე დაბოდიალობენ ეს ბავშვები, მანქანებიც კი შემოდიან. მე რა ვალდებულება მაქვს, რომ გავყარო? აქ დაცვა კი არ ვარ, უბრალოდ ვტრიალებ… ვცხოვრობ აქ. მივდივარ-მოვდივარ… მე ვიყავი აქ ბლოკის „ცეხში“, ახლა აღარ ვმუშაობ, მაგრამ აქ ვცხოვრობ. პაატა სვანიძესთან მაქვს ვალდებულება, მოდის ხოლმე დილაობით“, _ აღნიშნა „გურია ნიუსთან“ საუბრისას მან თუმცა, თავისი ვინაობა არ გაგვიმხილა.
კორპუსის ერთ-ერთმა მენაშენემ, რომელიც ფაქტს ადგილზე შეესწრო, საპატრულო პოლიცია გამოიძახა. თუმცა, პოლიციელების მოსვლამდე ბავშვები შენობიდან გამოვიდნენ და გაიქცნენ. მათი თქმით, შენობაში დღეს პირველად შევიდნენ.
თუმცა, როგორც ჩვენთან საუბრისას შენობის მენაშენე მაია წულუკიძემ განაცხადა, რამდენიმე ხნის წინ შენობის ერთ-ერთ ნაწილში, რომელიც შედარებით დაცული იყო, ავეჯი და ჭურჭელი დააწყო, თუმცა, მოგვიანებით აღმოაჩინა, რომ ჭურჭლის ნაწილი დამსხვრეული, ხოლო ავეჯი განადგურებული იყო. მაია წულუკიძის ნივთები შენობის ერთ ფლიგელში ახლაც აწყვია. როგორც წულუკიძე აცხადებს, შენობას არც დაცვა ჰყავს და არც პატრონი.
„შეხედეთ, ამ შენობას ჰყავს პატრონი? რაზე ვლაპარაკობთ საერთოდ? ამდენი მილიონი მიისაკუთრეს, ეს შენობა ასე მიატოვეს და ჩვენს ამბავს არავინ კითხულობს. 429 ოჯახისაა ეს შენობა და ყველა განადგურებულია. ნაქირავებ ბინებში ვცხოვრობთ. ვალებს ვიღებ და პროცენტებს ისე ვიხდი. მთელი ოქრო ლომბარდში მიდევს. ყოველთვიურად 6 ათას დოლარზე მეტი მაქვს გადასახდელი პროცენტი… რა უნდა ვქნა? ვინმე გაგვცემს პასუხს“, _ აცხადებს წულუკიძე.
„2-3 კაცი ვჩანვართ, ვინც რაღაცას მოვითხოვთ, მაგრამ ბევრს აღარ აქვს უკვე არაფრის მოთხოვნის თავი. რამდენს დაემართა ინფარქტი, არც ვიცით“, _ აცხადებენ მენაშენეები და დასძენენ, რომ მთელი ტერიტორია ტუალეტად არის გადაქცეული.
„წეღან, რომ შემოვედით, შენობის ეზოს უკანა მხრიდან უცხო პირი გამოვიდა, დაცვა გვეგონა, მაგრამ რომ გვითხრა, რომ პარკის გამწვანებაზე მუშაობს და აქ ტუალეტისთვის შემოვიდა“, _ განუცხადეს „გურია ნიუსს“ მენაშენეებმა.
საპატრულო პოლიცია გამოძახებიდან დაახლოებით 12 წუთში მოვიდა, თუმცა, როგორც მათ განაცხადეს, თუ შენობიდან არაფერია მოპარული, ვალდებულება არ აქვთ, მოკვლევა დაიწყონ.
„გურია ნიუსი“ ცდილობს „ცენტრ პოინტის“ წარმომადგენელს დაუკავშირდეს. მათ პოზიციას მოგვიანებით შემოგთავაზებთ.
