2017 წლის განავლობაში საჯარო სამსახურის ბიურო 13 მოსამართლის ქონებრივ დეკლარაციას შეამოწმებს, _ ამის შესახებ საიას მიერ გამოქვეყნებულ ინფორმაციაშია აღნიშნული. კვლევაში, რომელიც ორგანიზაციამ გამოაქვეყნა ნათქვამია, რომ კანონით დადგენილი ქონებრივი დეკლარაციების მონიტორინგის ვალდებულება 2017 წელს ნაწილობრივ სრულდება.
კვლევის თანდართულ დოკუმენტში დეტალურად წერია, თუ ვის შემოწმებას აპირებს საჯარო ინფორმაციის ბიურო 2017 წელს „საჯარო სამსახურში ინტერესთა შეუთავსებლობისა და კორუფციის შესახებ“ საქართველოს კანონით დადგენილი ქონებრივი დეკლარაციების მონიტორინგის ფარგლებში.
დოკუმენტში აღნიშნულია, რომ შემოწმდება როგორც რაიონული, ასევე საქალაქო და სააპელაციო სასამართლოების 13 მოსამართლის დეკლარაცია. აქედან ორი ყოფილი მოსამართლეა.
კერძოდ, საჯარო სამსახურის ბიურო აპირებს შეამოწმოს შემდეგი მოსამართლეების დეკლარაციები:
ბერაია გია (ახალციხის რაიონული სასამართლო); ბერაია თეა (ფოთის საქალაქო სასამართლოს ყოფილი მოსამართლე); ზამბახიძე თამარი ( თბილისის საქალაქო სასამართლო); კიკნაძე მარინა (ოზურგეთის რაიონული სასამართლო); ნოზაძე ლელა (თბილისის საქალაქო სასამართლო); სვანაძე დავითი (სამტრედიის რაიონული სასამართლო); სირაძე მარინა (ქუთაისის სააპელაციო სასამართლო); ურთმელიძე თამაზი (თბილისის საქალაქო სასამართლოს ყოფილი მოსამართლე); ჩხაიძე სიმონი (ქუთაისის სააპელაციო სასამართლო); ჩხიკვაძე ლაშა (თბილისის საქალაქო სასამართლო); ჯაშიაშვილი ნათელა (გურჯაანის რაიონული სასამართლო) და ჯინჭველაშვილი ეკატერინე (თბილისი საქალაქო სასამართლო).
ცნობისთვის, „2017 წლის 1 იანვრიდან საჯარო სამსახურის ბიურო ვალდებულია განახორციელოს თანამდებობის პირთა ქონებრივი დეკლარაციების მონიტორინგი. დეკლარაციების მონიტორინგის მიზანია თანამდებობის პირის მიერ ქონებრივ დეკლარაციაში წარმოდგენილი მონაცემების სისრულისა და სისწორის შემოწმება, კორუფციულ სამართალდარღვევათა გამოვლენა და პრევენცია.
მონიტორინგის მიზნებისათვის ქონებრივი დეკლარაციების შერჩევა შესაძლებელია განხორციელდეს სამი გზით: ა) ერთიანი ელექტრონული სისტემის მიერ დეკლარაციების შემთხვევითი შერჩევა; ბ) დასაბუთებული წერილობითი განცხადება; გ) ბიუროს უფროსის მიერ შექმნილი დამოუკიდებელი კომისიის მიერ შერჩეული დეკლარაციები.
თითოეულ შემთხვევაში, შერჩეული დეკლარაციების რაოდენობა არ უნდა აღემატებოდეს თანამდებობის პირთა საერთო რაოდენობის 5%-ს.
საქართველოს მთავრობამ 2017 წლის 14 თებერვალს დადგენილებით დაამტკიცა ქონებრივი დეკლარაციების მონიტორინგის ინსტრუქცია.
საჯარო სამსახურის ბიუროს ინფორმაციით, 2017 წლის განმავლობაში სულ განხორციელდება 271 თანამდებობის პირის დეკლარაციის მონიტორინგი, რომელთაგან 268 დეკლარაცია შერჩეულია შემთხვევითი შერჩევით, ხოლო 3 თანამდებობის პირის ქონებრივი დეკლარაციის მონიტორინგი წერილობითი მოთხოვნის საფუძველზე.
მოწოდებული ინფორმაციის თანახმად, 2017 წლის განავლობაში საჯარო სამსახურის ბიურო შეამოწმებს 14პარლამენტის წევრის, 1 მინისტრის, 6 მინისტრის მოადგილის, 7 სსიპ-ის ხელმძღვანელის, 13 მოსამართლის, 3 პროკურორის, 2 დამოუკიდებელი მარეგულირებელი და მაკონტროლებელი ორგანოს წარმომადგენლის და 1 სახელმწიფო საწარმოს ხელმძღვანელის ქონებრივ დეკლარაციას.
გარდა ზემოაღნიშნული თანამდებობის პირებისა, 2017 წლის განმავლობაში საჯარო სამსახურის ბიურო ასევე ამოწმებს სამინისტროებისა და ადგილობრივი თვითმმართველობის ორგანოებში დასაქმებულ, შემთხვევითი პრინციპით შერჩეულ სხვა თანამდებობის პირებს.
