16 მაისს. “ნატოს და ევროკავშირის საგამოფენო სივრცეში” სტუდია “ქაითის” სოციალური პროექტის ფოტოგამოფენის პრეზენტაცია გაიმართება. პრეზენტაციაში მონაწილეობას იღებენ ქართული და აზერბაიჯანული მედიის წარმომადგენლები, ფოტოგრაფები. ფოტოგამოფენის ჟიურის თავმჯდომარე ცნობილი ქართველი ფოტოგრაფი გურამ წიბახაშვილია. პროექტის თანაპარტნიორები არიან თემქის მოხუცთა თავშესაფარი და უსინათლო გოგონათა ანსამბლი “ედელვაისი”.
როგორც სტუდია “ქაითის” რეჟისორი ხათუნა კეთილაძე “გურია ნიუსთან” საუბარში აცხადებს, “სტუდია “ქაითმა” პროექტ “აჩუქე შეხების” ფარგლებში, თემქის მოხუცთა თავშესაფართან ერთად პირველი ეტაპი უკვე განახორციელა, რომლის მხარდამჭერიც “ნანუკას შოუ” გახლდათ: “თავშესაფრის ბინადარ მოხუცებს შევუსრულეთ ყველაზე სანუკვარი ოცნება _ ვაჩუქეთ დიდი ხნის მონატრებული ადამიანების შეხება.
პროექტის მეორე ეტაპი 16 მაისს თბილისში დაიწყება და აზერბაიჯანის ორ ქალაქში გაგრძელდება. არა მარტო ქართველი, აზერბაიჯანელი ფოტოგრაფებიც სიამოვნებით შემოუერთდნენ ჩვენს კეთილ პროექტს.
განსაკუთრებით მიხარია და მინდა მადლობა გადავუხადო “გურია ნიუსს”. რომელიც ჩვენი პროექტის მედიამხარდამჭერია, ქალბატონ ია მამალაძეს და თქვენს ნიჭიერ ფოტოგრაფს მაგდა მამალაძეს, რომლის ფოტომაც მოწონება დაიმსახურა.
განსაკუთრებულ მადლობას ვუხდით საქართველოს პირველ ლედის, რომელმაც ორი სურათი უსახსოვრა ფოტოგამოფენას.
პროექტ “აჩუქე შეხების” მესამე ეტაპზე იგეგმება კლიპის გადაღება,რომლის მოსამზადებელი სამუშაოები უკვე დაწყებულია. უახლოეს მომავალში სტუდია ფილმის გადაღებასაც გეგმავს,” _ ამბობს სტუდიის რეჟისორი.
გურამ წიბახაშვილი თვლის, რომ ნდობასა და სიკეთის მოლოდინზე დამყარებული ადამიანების ურთიერთობის ფასი გაცილებით მეტია და პროექტ “აჩუქე შეხებაც” ამიტომაა მნიშნელოვანი: “ადამიანების ურთიერთობა ძალიან მნიშვნელოვანია. ეს ცხოვრების არსია. როცა ურთიერთობები ნდობის მოლოდინით და იმედით არის გამყარებული, მაშინ მისი მნიშვნელობა ათმაგად იზრდება. სტუდია “ქაითის” პროექტში “აჩუქე შეხება” სწორედ ამასთან გვაქვს საქმე და ეს ძალიან მნიშვნელოვანია”, _ აცხადებს გურამ წიბახაშვილი “გურია ნიუსთან” საუბარში.
აზერბაიჯანული სააგენტოს Turnaz.az-ის დამფუძნებელს და პროექტის აზერბაიჯანული მხარის კოორდინატორ აითან ალიევას მიაჩნია, რომ პროექტის თემა საოცრად საინტერესოა, განსაკუთრებით მაშინ, როცა ფიზიკური შეხება ფოტოგრაფის დაჭერილ ვირტუალურ მომენტს ერწყმის: “ფიზიკური შეხების და ფოტოგრაფის მიერ დაჭერილი ვირტუალური მომენტის შერწყმა, თვითგამოხატვის უნიკალური შესაძლებლობაა. ქართულ-აზერბაიჯანულ პროექტში როგორც ახალგაზრდა, ისე გამოცდილი ფოტოგრაფები მონაწილეობენ. ახალგაზრდები ღელავენ, პროფესიონალები ქართველ მეგობრებთან შეხვედრას მოუთმენლად ელიან.
აზერბაიჯანული მხარე დარწმუნებულია, რომ პროექტიც და ფოტოგამოფენაც საქართველოში უმაღლეს დონეზე ჩაივლის”, _ აცხადებს აითან ალიევა “გურია ნიუსთან” საუბარში.
