ჩოხატაურის მუნიციპალიტეტის სოფლების _ დიდი ვანის, შუა სურების და ზემო სურების საინიციატივო ჯგუფის წევრები დახმარებას ითხოვენ. მათი ინფორმაციით, 2016 წელს გაკეთებული, ბუკისციხე – სურების გზის 6-კილომეტრიან მონაკვეთზე გავლა კვლავ შეუძლებელია, რისთვისაც ადგილობრივ ხელისუფლებას და საქართველოს მთავრობას დახმარების თხოვნით მიმართავენ.
მათივე ინფორმაციით, 2016 წელს, ადგილობრივმა ხელისუფლებამ გზის 6-კილომეტრიანი მონაკვეთის მოხრეშვას 385 ათასი ლარი დაახარჯა, თუმცა, სამუშაოები ტენდერში გამარჯვებულმა კომპანიამ – „შარაგზამშენი პირველი“ უხარისხოდ შეასრულა. რის გამოც, გზის ეს მონაკვეთი ისევ დაზიანებულია. მოსახლეობა კი, ამ გზის მოასფალტებას უშედეგოდ ითხოვს.
„სუფსას გაატანეს 385 ათასი ლარი. სამუშაოები ტენდერში გამარჯვებულმა კომპანიამ არ შეასრულა. შარშან აგვისტოში, როცა სამუშაოები უნდა ეწარმოებინათ, ტექნიკა ქობულეთში გადაიტანეს, ოქტომბრის ბოლოს დაბრუნდნენ, მაშინ, როდესაც უკვე წვიმები იყო და ტალახიანი გზის მოხრეშვას აზრი აღარ ჰქონდა. რაც იყო მასალა მოტანილი, ისიც წყალმა წაიღო ისე, რომ გზაზეც არ გაუშლიათ“, _ აცხადებს „გურია ნიუსთან“ საუბრისას სურების საინიციატივო ჯგუფის წევრი ზურა დარსალია.
„ჩვენი ხეობა მაღალმთიანია ზამთარში დიდი თოვლი მოდის, გზა ტექნიკით იწმინება და მოხრეშილ გზას გააფუჭებს. ამიტომ საჭიროა მოასფალტება“,_ აცხადებს საინიციატივო ჯგუფის პრეზიდენტი გიორგი ტრაპაიძე.
თუმცა, სურების საინიციატივო ჯგუფის წევრები ამბობენ, რომ გზის ამ მონაკვეთის მოასფალტების დაპირება უკვე მიღებული ჰქონდათ, ახლა კი, ასფალტის ნაცვლად, არც მოხრეშილი გზა აქვთ და სოფლებამდე მისვლა ისევ გართულებულია.
„როგორც ადგილობრივი ხელისუფლება, ასევე რეგიონული განვითარებისა და ინფრასტრუქტურის სამინისტრო გვპირდებოდა, რომ გზის ამ მონაკვეთს 2017 წელს მოაასფალტებდნენ, ხოლო დარჩენილ 12 კილომეტრს ისევ მოხრეშავდნენ და მომავალი წლისთვის დაიგეგმებოდა მთლიანად მოასფალტება. რელიეფიდან გამომდინარე, გზის ამ მდგომარეობაში დატოვებას აზრი არ აქვს, მეწყრული ადგილებია, სადაც ხრეში ვერ გაჩერდება. გზაზე წყლები გადმოდის, რის გამოც, ამდენი ნაწვალები მდინარე სუფსას მიაქვს“, _ აცხადებენ სურების საინიციატივო ჯგუფის წევრები.
მათივე ინფორმაციით, ბუკისციხე – დიდი ვანის გზის 6-კილომერიანი მონაკვეთის მოასფალტებისთვის, დაახლოებით 1 მილიონ 400 ათასი ლარია საჭირო, რაც მუნიციპალური განვითარების ფონდს დათვლილი აქვს.
აღნიშნულს არ ადასტურებენ მუნიციპალური განვითარების ფონდში. როგორც „გურია ნიუსს“ ფონდიდან წერილობით აცნობეს, 2016 წელს ბუკისციხე – დიდი ვანის გზის 6-კილომერიანი მონაკვეთის შეკეთების სამუშაოები მათ არ უწარმოებიათ. მათი ინფორმაციით, ხარჯები ადგილობრივმა მუნიციპალიტეტმა გაიღო.
„ჩოხატაურის მუნიციპალიტეტში ბუკისციხე–ზემო სურების გზის 16,5 კმ–იანი გზის რეაბილიტაციის სამუშაოები 2017 წლის თებერვალში დაიწყო და 2018 წლის თებერვალში დასრულდება. დაფინანსების წყარო ევროპის საინვესტიციო ბანკია.
ბუკისციხე–ზემო სურების გზა ძალიან ვიწრო და გაუვალი იყო. მიმდინარეობს ფერდობების ჩამოჭრა, რათა მოხდეს გზის გაგანიერება. მოსახლეობისთვის გადაადგილება პრობლემას წარმოადგენდა. ეს გზა რამდენიმე სოფელს აკავშირებს ერთმანეთთან. სამუშაოების დასრულების შემდეგ, სოფლების მოსახლეობა კომფორტული გზით შეძლებს გადაადგილებას“, _ აღნიშნულია წერილში რომელიც რეგიონული განვითარების ფონდიდან მივიღეთ.
მათივე განმარტებით, გზის რეაბილიტაციისთვის 2 მილიონ 644 444 ლარია გამოყოფილი, ხოლო სამუშაოებს შპს „ნიუ როუდი“ ასრულებს. ფონდში აცხადებენ, რომ რეაბილიტაციის შემდეგ გზა მოხრეშილი იქნება, რაც შეეხება მოასფალტებას, ჯერჯერობით არაფერია დაგეგმილი.
ცნობისთვის, 2017 წლის 1 აპრილს ჩოხატაურის მუნიციპალიტეტში ბუკისციხე – ზემო სურების 17 კმ-იანი საავტომობილო გზის სარეაბილიტაციო სამუშაოების მიმდინარეობასთან დაკავშირებით ადგილობრივმა ხელისუფლება განცხადება გაავრცელა, სადაც აღნიშნულია, რომ გზის რეაბილიტაციის პროექტი ითვალისწინებს სავალი გზის გაფართოებას, წყალგამტარი მილების, სანიაღვრე არხების და გაბიონების მოწყობას. სამუშაოებზე დასაქმებულია 20 – მდე ადგილობრივი მცხოვრები.
მიმდინარე სამუშაოებს გურიის გუბერნატორი გია სალუქვაძე და მუნიციპალიტეტის გამგებელი ირაკლი კუჭავა გაეცნენ. კუჭავამ მაშინ აღნიშნა, რომ „ეს იქნება საუკუნის პროექტი ამ ხეობაში მაცხოვრებელთათვის. იქნება გზა და შესაბამისად გაძლიერდება ტურისტული პოტენციალი“.
„გურია ნიუსი“ ბუკისციხე-ზემო სურების გზის სარეაბილიტაციო სამუშაოების შესახებ არაერთხელ წერდა.
გზის პირველი – ბუკისციხე დიდი ვანის 6 კმ-იანი მონაკვეთის სარეაბილიტაციო სამუშაოების ჩატარებაზე პასუხისმგებელ კომპანიაზე (შპს „შარაგზამსენი პირველი), რომელსაც ტენდერი (ღირებულება 386 990 ლარი), ჰქონდა მოგებული, დაწვრილებით „გურია ნიუსის“ ჟურნალისტური გამოძიებიდან შეგიძლიათ გაეცნოთ _ „ერთი კომპანიის სამი ტენდერი _ რატომ უნდა გავუფრთხილდეთ მოწმეებს კარგად“.
სტატიაში აღნიშნულია, რომ ბუკისციხე-ზემოსურების დამაკავშირებელი გზის რეაბილიტაციისას შპს „შარაგზამშენი პირველის“ საქმიანობასთან დაკავშირებით საეჭვო კითხვის ნიშნები გაჩნდა. კერძოდ, საკითხი ხეობიდან დიდი რაოდენობით ლოდების გატანას ეხებოდა.
როგორც სტატიაშია აღნიშნული, სურების ხეობიდან გატანილი ლოდები აღნიშნულმა კომპანიამ 20 კილომეტრის დაშორებით ბუკნარის ნაგავსაყრელზე გაიტანა, სადაც ასევე ნაპირსამაგრი სამუშაოები უნდა განეხორციელებინა და ამისთვის საქართველოს მყარი ნარჩენების კომპანიის ტენდერიც ჰქონდა მოგებული.
მოგვიანებით, ამ სტატიის გამოქვეყნების შემდეგ, გარემოს დაცვის სამინისტროს ზედამხედველობის დეპარტამენტმა კომპანია „შარაგზამშენი პირველი“ გარემოსთვის მიყენებული ზიანისთვის დაჯარიმდა. უწყების ინფორმაციით, რამდენიმე დარღვევის ფაქტი გარემოს დაცვის ზედამხედველობის დეპარტამენტის თანამშრომლებმა ადგილზევე ნახეს. მათი ინფორმაციით, კომპანიას საჯარიმო ოქმი მდინარის და მიწის დაბინძურებისთვის, ასევე მიწის არამიზნობრივად გამოყენებისთვის შეუდგინეს.
საბოლოო ჯამში, შპს “შარაგზამსენი პირველის” მიერ, ბუკისციხე-დიდი ვანის გზის მონაკვეთზე შესრულებული სამუშაოები მუნიციპალიტეტმა ჩაიბარა. თუმცა, როგორც ადვილობრივი მაცხოვრებლები „გურია ნიუსთან“ საუბრისას აღნიშნავენ, სამუშაოები უხარისხოდ შესრულდა. ნახევრად მოხრეშილი გზა წყალმა წაიღო, მოასფალტების დაპირება კი, რომელიც, მათივე თქმით, მიმდინარე წლიდან უნდა დაწყებულიყო, ამ დრომდე შეუსრულებელია.
სურების საინიციატივო ჯგუფის წევრების განცხადებით, თუ ადგილობრივი ხელისუფლებისა და მთავრობის დაპირება, გზის მოასფალტებასთან დაკავშირებით, არ შესრულდება, არ არის გამორიცხული, ადგილობრივმა მაცხოვრებელებმა საპროტესტო აქციებს ისევ მიმართონ.
ამავე თემაზე:
“დროებითი” გზის ბზარებში ჩაკარგული 200 000 ლარი
უგზოდ დარჩენილი მოსახლეობა ხელისუფლების დახმარების მოლოდინში
სურების გზის სამ მილიონიანი ტენდერი შპს New Road-მა მოიგო
ბუკისციხე – ზემო სურების 17 კმ-იანი გზის სარეაბილიტაციო სამუშაოები მიმდინარეობს (R)
სურების გზის სარეაბილიტაციო სამუშაობი დაიწყო
აქცია გზის ასფალტირების და მთის სტატუსის მინიჭების მოთხოვნით
მაღალმთიანი დასახლების სტატუსის მიღების მოლოდინში
