ქალაქ ოზურგეთის შპს “სოფლის ნობათს“ (ბაზარი) ახალი დირექტორი ჰყავს. ნოდარ ცინცაძე 1 ივნისიდან დაინიშნა, მან ამ პოსტზე ოლეგ შარაშენიძე შეცვალა.
შარაშენიძე 2015 წლის პირველი ოქტომბრიდან დღემდე მუშაობდა, მისი დანიშვნის დროს 11 თანამშრომელი სამსახურიდან გათავისუფლდა.
ქალაქ ოზურგეთში ე.წ. ძველ ბაზარს სახელი ოფიციალურად ძალიან ბევრჯერ შეეცვალა, ბოლოს ის შპს “ოზურგეთის სავაჭრო ცენტრად“ იყო დარეგისტრირებული, ახლა კი შპს “სოფლის ნობათი“ ჰქვია.
როგორც “გურია ნიუსს“ ბაზრის ახალდანიშნულმა დირექტორმა ნოდარ ცინცაძემ განუცხადა, ის ვაჭრობის სისტემაში გამოცდილი კადრია; მუშაობდა ე.წ რაიკავშირში, იყო ლუდის ქარხნისა და “იზაბელას“ დირექტორი 10 წლის განმავლობაში.
ჩვენს კითხვაზე თუ ვისი პროტექციით დაინიშნა ახალი უფროსი, ცინცაძე გვპასუხობს, რომ ე.წ. ძველი ბაზარი აღარ ეკუთვნის სახელმწიფოს, შესაბამისად, არც ქალაქ ოზურგეთის მერის მიერ არის დანიშნული, უფრო მეტიც ცინცაძის თქმით, მერს საერთოდ არ იცნობს:
“ბაზარი გაყიდულია, ოღონდ ვინ არის მფლობელი მაგას ნამდვილად ვერ გეტყვით. მერს შეხება არ აქვს. კი ბატონო, აქ არიან მეწილეები, თუმცა ბაზრის ტერიტორია სახელმწიფოს აღარ ეკუთვნის, თანხა კი ქალაქ ოზურგეთის ბიუჯეტში შედის ნამდვილად“ _ამბობს ცინცაძე.
როგორც “გურია ნიუსს“ ცინცაძემ უთხრა, ბაზრის უფროსების შეცვლის ერთადერთი მიზეზი თანხის ამოღების პრობლემაა.
“შეიცვალნენ ასევე თანამშრომლებიც. თანხის ამოღებაა პრობლემა, უჭირთ 1 ლარის გაცემა დღეში მოვაჭრეებს, ასევე გვინდა გარემოვაჭრეების შიგნით შემოყვანა, მე ამ საკითხს აუცილებლად დავაყენებ ხელისუფლებასთან“,_ ამბობს ცინცაძე.
შეგახსენებთ, რომ ე.წ. ძველი ბაზარი მუდამ იყო ხელისუფლების დაინტერესების მთავარი საკითხი.
იცვლებოდა ხელისუფლება, იცვლებოდნენ დირექტორები, რომელთა ინტერესებს გამუდმებით ეწირებოდნენ მოვაჭრეები.
“გურია ნიუსი“ ბაზრის თემასთან დაკავშირებულ ინფორმაციებს ინტენსიურად აშუქებდა.
ოფიციალური ინფორმაციის საფუძველზე ქალაქ ოზურგეთის მერიამ 2015 წლის 15 სექტემბერს აუქციონი ჩაატარა და 4 400 კვ.მ-ის მიწის ნაკვეთი 35-წლიანი იჯარით გასცა.
აუქციონში მონაწილეობა ერთმა პრეტენდენტმა – შპს “სოფლის ნობათმა” მიიღო.
ქონებით სარგებლობის უფლებით იჯარით გაცემის ქირის საწყისი საფასური 24 516 ლარს შეადგენდა. ბაზრის ტერიტორიის 4 400 კვ.მ. მიწის ნაკვეთი გაიცა იჯარის ფორმით 26 968 ლარად, მოიჯარე კი შპს “სოფლის ნობათის” დამფუძნებელი ზურაბ გობრონიძეა.
ამავე თემაზე:
ვინ აიღო ბაზარში ტერიტორია 35-წლიანი იჯარით
