ზაზა ჩემპიონია!

დღეს, თბილისში რომ თენდებოდა, აშშ-ის ქალაქ ოკლენდში ეროვნული საკალათბურთო ასოციაციის ფლეი ოფის მორიგი ფინალური შეხვედრა გაიმართა. ზაზა ფაჩულიას „გოლდენ სტეიტმა“ ლებრონ ჯეიმსის „კლივლენდს“ უმასპინძლა.

ამ მატჩის წინ კალიფორნიული გუნდი სერიაში დაწინაურებული გახლდათ – 3:1. ჩემპიონის ტიტულამდე „გოლდენ სტეიტს“ მხოლოდ ერთი მოგება აშორებდა. ყველას გვახსოვს შარშანდელი ფინალური სერია. ფაჩულიას ამჟამინდელი თანაგუნდელები „კლივლენდს“ ასევე 3:1-ს ამარცხებდნენ, მაგრამ მიჯრით სამი მატჩი წააგეს და საბოლოო გამარჯვება მოწინააღმდეგეს გადაულოცეს.

საბედნიეროდ, ისტორია არ განმეორდა. „გოლდენ სტეიტმა“ მეტოქე 129:120 დაამარცხა და აშშ-ის ეროვნული საკალათბურთო ასოციაციის მიმდინარე პირველობის გამარჯვებულის ტიტული მოიპოვა.

ზაზა ფაჩულიამ ქართული კალათბურთის ისტორიაში ახალი სახელოვანი ფურცელი ჩაწერა. ის გახდა პირველი თანამემამულე კალათბურთელი რომელმაც „NBA“-ში ასეთ წარმატებას მიაღწია.

გასული წლის ზაფხულში ფაჩულია სერიოზული არჩევანის წინაშე იმყოფებოდა: გაეფორმებინა ერთწლიანი მინიმალური ანაზღაურების მქონე კონტრაქტი საჩემპიონო ამბიციების გუნდთან, თუ პირიქით, რამდენიმეწლიან და მაღალანაზღაურებად სამსახურს დათანხმებოდა კლუბ „ვაშინგტონთან“.

საბოლოოდ ზაზამ სეზონში 20 მილიონ დოლარზე უარი განაცხადა და „გოლდენ სტეიტს“ მიაშურა. ოკლენდელებმა მას წელიწადში მხოლოდ 2.6 მილიონი დოლარი შესთავაზეს. როგორც აღმოჩნდა ზაზას გადაწყვეტილება სწორი აღმოჩნდა. მან გუნდთან ერთად შესანიშნავი სეზონი ჩაატარა.

წლის განმავლობაში იყო შიში რომ ფაჩულია ტრავმას მიიღებდა, ან „გოლდენ სტეიტი“ მას რომელიმე სხვა მოთამაშეში გაცვლიდა. მსუბუქ ტრავმებს ზაზა ვერ გადაურჩა. რაც შეეხება გაცვლას. ფაჩულიამ ვარსკვლავური გუნდის ძირითად ხუთეულში ადგილი მყარად მოიპოვა და ის ბოლომდე შეინარჩუნა.

ფაჩულიას სეზონის განმავლობაში მთელი საქართველო გვერდით ედგა. დღეს დილით, როდესაც „გოლდენ სტეიტმა“ ჩემპიონის წოდება უკვე ოფიციალურად გაიფორმა, პირველი რაც ზაზამ გააკეთა, საქართველოს დროშის აფრიალება გახლდათ. დროშა მას მთელი საზეიმო ცერემონიალის განმავლობაში ხელში ეჭირა და მთელ მსოფლიოს ჩვენი პატარა ქვეყნის სახელი კიდევ ერთხელ შეახსენა.

ვულოცავთ ზაზა ფაჩულიას ამ დიდ წარმატებას. მან სამშობლოს დიდი სიხარული მოუტანა. ერთმა ჩინებულმა კალათბურთელმა მსოფლიოში პატარა საქართველოს პოპულარიზაციის საქმეში იმაზე ბევრად მეტი გააკეთა, ვიდრე თუნდაც რამდენიმე ათეულმა თანამემამულე პოლიტიკოსმა.

მალე ფაჩულია ახალი სპორტული გამოწვევების წინაშე დადგება. უახლოეს მომავალში გაირკვევა, მომავალი სეზონისთვის „გოლდენ სტეიტში“ დარჩება თუ ახალი გუნდის მოძიება მოუწევს. შემოდგომაზე კი მას საქართველოს ეროვნულ გუნდთან ერთად ევროპის პირველობაზე სერიოზული გამოცდის ჩაბარება ელოდება.

გუშინდელი დღე ქართული სპორტის ისტორიაში მნიშვნელოვან ადგილს დაიკავებს. ზაზა ფაჩულიას გარდა წარმატებას ქართველმა მოფარიკავე თეოდორა კახიანმაც მიაღწია. თბილისში, ფარიკაობაში ევროპის პირველობა დაიწყო და მოხმალავეთა ტურნირში თეოდორა კახიანმა იმარჯვა.  საქართველოს ფარიკაობის ისტორიას მსგავსი რამ არ ახსოვს – ქართველი მოხმალავე ქალი ევროპის ჩემპიონატის გამარჯვებული გახდა.