ოზურგეთის მუნიციპალიტეტის საკრებულოს რიგგარეშე სხდომაზე, რომელიც 29 ივნისს შედგა, ხუთი საკითხი განიხილეს, რომელთაგან ოთხი განკარგულების მიღებას დაექვემდებარა.
პირველი საკითხის: “ოზურგეთის მუნიციპალიტეტის 2017 წლის ბიუჯეტის დამტკიცების შესახებ” ოზურგეთის მუნიციპალიტეტის საკრებულოს 2016 წლის 23 დეკემბრის დადგენილებაში ცვლილების თაობაზე, საფინანსო სამსახურის უფროსმა გია მამაკაიშვილმა ისაუბრა.
მან ცვლილების მიზეზად გამოყოფილ თანხებში გაჩენილი ეკონომია დაასახელა, ამიტომ შემცირდა ტრანსფერი შემოსავლების ნაწილში 742 913 ლარით. შემოსავლების ნაწილში ტრანსფერები გაიზრდება _ საპროექტო დოკუმენტაციისა და სამშენებლო სამუშაოების ტექნიკური ზედამხედველობის მომსახურების შესყიდვისთვის ოზურგეთის მუნიციპალიტეტს გამოეყო 18 036 ლარი; საკუთარი შემოსავლების ნაწილში ქონების გადასახადი 67 250 ლარით გაიზარდა.
დღის წესრიგის მეორე საკითხის _ “ოზურგეთის მუნიციპალიტეტის საკრებულოს საშტატო ნუსხის დამტკიცების შესახებ” განკარგულების მიღების თაობაზე, საკრებულოს აპარატის უფროსმა ნანა თავდუმაძემ ისაუბრა.
როგორც მან განმარტა, საკრებულოში ახალი საშტატო ნუსხა დამტკიცდა _ გადაწყვეტილების მიღება საქართველოს მთავრობის ამ წლის აპრილის #215 დადგენილების მიღებამ განაპირობა. ჩინოვნიკი აქამდე საჯარო მოხელე თუ იყო, ახლა პროფესიული საჯარო მოხელე ხდება:
“მუნიციპალიტეტის საკრებულოში შეიქმნა კომისია, რომელმაც მოახდინა ანალიზი, არსებული თანამდებობების იერარქიულ რანგებში გადანაწილების მიზნით. აქ საინტერესოა ის, რომ რანგირება ეხება თანამდებობებს. მთავრობის დადგენილების გათვალისწინებით, 15 საჯარო მოხელე გადავიყვანეთ პროფესიულ საჯარო მოხელედ (ესენი არიან მუნიციპალიტეტის გამგებლის წარმომადგენლები სოფლებში. ავტ.) რაც ნიშნავს იმას, რომ ამიერიდან თითოეული ამ მოხელის დასაქმება დამოკიდებული იქნება პროფესიონალიზმზე, კვალიფიკაციასა და კომპეტენციაზე. დასაქმება ხელშეკრულებით მოხდება”, _ თქვა მან.
ნანა თავდუმაძემ, ასევე, განმარტა, რომ დღეს მოქმედი საკრებულოს საშტატო ნუსხიდან, ხელშეკრულებით დასაკავებელ პოზიციაზე გადავიდა საკრებულოს თავმჯდომარის თანაშემწე. სხვა დანარჩენი შტატით გათვალისწინებული თანამდებობები გარდაიქმნა პროფესიულ საჯარო მოხელის თანამდებობად, შესაბამისი იერარქიული რანგის მინიჭებით. რაც შეეხება სახელფასო ანაზღაურებას, ამ მხრივ არაფერი იცვლება.
ოპოზიციონერმა დეპუტატებმა კერძო საუბარში აღნიშნეს, რომ ეს ყოველივე სასურველი სიახლე არ არის იმ ადამიანებისთვის, რომლებიც შტატით გათვალისწინებული სამსახურებრივი პოზიციიდან ხელშეკრულების პრინციპზე გადავლენ. აღნიშნული ქმედება მოახლოებულ არჩევნებს უკავშირდება და ამ ნაბიჯით გამგებლის წარმომადგენლებს სოფლებში მიანიშნეს, თუ მმართველი გუნდის სასარგებლოდ მაქსიმალურად არ გაირჯებით, ხელშეკრულება შეგიწყდებათ და სამსახურს დაკარგავთო. ამ აზრს არ დაეთანხმნენ სხვა დეპუტატებიც _ თუ სამსახურიდან კაცის გაშვება უნდა ხელმძღვანელს, მიზეზი არ დაილევა, საარჩევნოდ იქნება ეს თუ სხვა ვითარებაშიო. ამ საუბარს ოფიციალური სახე არ მიუღია და არც დეპუტატებს დაუსვამთ საკითხის წარმომდგენისთვის. განკარგულებაც წინააღმდეგობის გარეშე მიიღეს.
გამგებლის მოადგილემ ბადრი გობრონიძემ ისაუბრა “საქართველოს რეგიონებში გასახორციელებელი პროექტების ფონდიდან ოზურგეთის მუნიციპალიტეტის სოფელ წითელმთისა და მაკვანეთის ადმინისტრაციული ერთეულის შემაერთებელი გზის რეაბილიტაციის პროექტის მოწონების თაობაზე” განკარგულების მიღების შესახებ, რაც დეპუტატებმა სასურველ სიახლედ და კარგი საქმის გაგრძელებად მიიჩნიეს. განსაკუთრებით, მაკვანეთის მაჟორიტარმა დეპუტატმა გამოთქვა კმაყოფილება _ ხალხს გაუხარდება და კარგიაო.
როგორც ბადრი გობრონიძემ თქვა, გზის რეაბილიტაცია ხდება საქართველოს რეგიონებში გახორციელებული პროექტების ფონდიდან. მაკვანეთისა და წითელმთის ერთმანეთთან დამაკავშირებელი გზის რეაბილიტაცია იწყება ამ წლის აგვისტოში და პროექტის ღირებულება მილიონ 345 ათას ლარს შეადგენს. აღნიშნული თანხის ხუთი პროცენტი _ 67 ათას 250 ლარი, ადგილობრივი ბიუჯეტიდან დაემატება. გზის სიგრძე 2 კილომეტრი და 330 მეტრია.
დეპუტატებმაც პროექტის მოწონების თაობაზე განკარგულებას სასწრაფოდ დაუჭირეს მხარი.
