„გურია ნიუსის“ ინფორმაციით, ლანჩხუთის საკრებულოს წევრმა, ელგუჯა ჩხაიძემ „თავისუფალი დემოკრატების“ რიგები დატოვა და თვითმმართველობის არჩევნების წინ არჩევანი „პატრიოტთა ალიანსზე“ გააკეთა. გარცელებული ინფორმაციით, ჩხაიძე პარტიის ადგილობრივ ორგანიზაციას ჩაუდგება სათავეში.
ლანჩხუთელ „პატრიოტებში“ ხელმძღვანელის პოსტი უკვე რამდენიმე თვეა ვაკანტურია, რადგან გურანდა მანაგაძემ, რომელიც ბოლო პერიოდში თავმჯდომარეობდა პარტიის ადგილობრივ ორგანიზაციას, პარტიიდან და, ზოგადად, პოლიტიკიდან წასვლის თაობაზე გადაწყვეტილება მიმდინარე წლის დასაწყისში მიიღო.
ელგუჯა ჩხაიძე საკრებულოში ფრაქციას „ლანჩხუთი-ევროატლანტიკური მომავლისთვის“ ხელმძღვანელობს, რომელიც მან 2015 წლის გაზაფხულზე „ერთიანი ნაციონალური მოძრაობის“ წევრებთან ერთად შექმნა. მაშინ ჩხაიძის ამ გადაწყვეტილებას „თავისუფალი დემოკრატების“ მხრიდან მკაცრი რეაგირება მოჰყვა _ ადგილობრივი ორგანიზაციის თავმჯდომარე პარტიის რიგებიდან გარიცხეს. ამის შემდეგ ჩხაიძე შოთა მალაშხიას „ქრისტიან-კონსერვატიული“ პარტიის რიგებს შეუერთდა, თუმცა, სამი თვის წინ ისევ „თავისუფალ დემოკრატებს“ დაუბრუნდა და ლანჩხუთში პარტიის თავმჯდომარეობა ჩაიბარა.
გავრცელებული ინფორმაციის გადამოწმების მიზნით თავად ელგუჯა ჩხაიძეს დავუკავშირდით. მისი თქმით, „თავისუფალი დემოკრატებიდან“ წასვლის თაობაზე გადაწყვეტილება მასშემდეგ მიიღო, რაც პარტიამ უარი თქვა მონაწილეობა მიიღოს წლევანდელ თვითმმართველობის არჩევნებზე.
„იქედან გამომდინარე, რომ „თავისუფალი დემოკრატები“ წელს გასამართ თვითმმართველობის არჩევნებში არ იღებენ მონაწილეობას, გადავწყვიტე, დამეტოვებინა პარტიის რიგები. ჯერჯერობით, ბოლომდე არაა გადაწყვეტილი ჩემი და „პატრიოტთა ალიანსის“ ურთიერთთანამშრომლობა, თუმცა, კონსულტაციები მიმდინარეობს ამ საკითხზე, შევხვდი კიდეც პარტიის ხელმძღვანელობას“, _ ამბობს ჩხაიძე “გურია ნიუსთან“ სატელეფონო საუბრისას.
_ თქვენ საკრებულოში წარმოადგენთ ფრაქციას, რომელიც ღიად უჭერს მხარს ქვეყნის დასავლურ კურსს, თქვენი თანაფრაქციელები კი წარმოადგენენ იმ პარტიას, რომელიც „პატრიოტთა ალიანს“ პრორუსულ ძალად მიიჩნევს. როგორ გაგრძელდება სამომავლოდ თქვენი თანამშროლობა ერთ ფრაქციაში?
_ მე ვარ თვითმმართველობის წარმომადგენელი და გლობალურ პოლიტიკასთან შეხება არ მაქვს. ჩემი მიზანია ოპოზიციური ფლანგიდან ვებრძოლო ამ ხელისუფლებას. თან მე მქონდა შეხვედრა „პატრიოტთა ალიანსის“ წარმომადგენლებთან და არანაირი პრორუსული ორიენტაცია არ დამინახავს ამ ადამიანებში. თუ ვინმე ჩავიდა რუსეთში და იქ ვიღაცას დაელაპარაკა, ამაში მე ტრაგედიას ვერ ვხედავ. ხელისუფლებასაც შეუძლია იგივე გააკეთოს. რაც შეეხება ფრაქციას, ჯერჯერობით, ამის თაობაზე არანაირი საუბარი არ ყოფილა. ვნახოთ, როგორც საჭირო იქნება, ისე მოვიქცევით.
ფრაქციის „ლანჩხუთი-ევროატლანტიკური მომავლისთვის“ სამომავლო გეგმებთან დაკავშირებით კომენტარს არც ჩხაიძის თანაფრაქციელი, „ერთიანი ნაციონალური მოძრაობის“ ადგილობრივი ორგანიზაციის თავმჯდომარე კახა ასკურავა აკეთებს.
„საერთოდ არაფერი არაა ჩემთვის ცნობილი ელგუჯა ჩხაიძის გადაწყვეტილებასთან დაკავშირებით, ამიტომ ვერანაირ კომენტარს ვერ გავაკეთებ. გავეცნობი სიტუაციას და გადაწყვეტილებასაც შესაბამისად მივიღებთ“, _ გვითხრა ასკურავამ.
