ლანჩხუთში, სოფელ ნიგოითში, ტრაპაიძეების ოჯახი, რომელიც მეწყერსაშიშ ზონაში ცხოვრობს, ადგილობრივი ხელისუფლებისგან დახმარებისა და რეაგირების მოლოდინშია. ოჯახის დიასახლისის, მანანა ტრაპაიძის თქმით, მთავარი, რასაც ითხოვს ისაა, რომ გაირკვეს, არის თუ არა მათი საცხოვრებელი სახლი სიცოცხლისთვის საფრთხის შემცველი.
“დაახლოებით, ოთხი წლის წინ, მე და ჩემი მეუღლე სახლის წინ, აივანზე ვისხედით. მოულოდნელად ეზოს წინ საკმაოდ დიდი სისქის ბეტონის ჯებირი ერთიანად მოწყდა და ცენტრალურ ავტომაგისტრალზე დაშვავდა. მაშინ შემთხვევის ადგილზე გეოლოგებიც იყვნენ მოსულები, შეამოწმეს და თქვეს, საშიში არაფერიაო. ახალი ჯებირი და ღობე გააკეთეს, მაგრამ ამით ჩემი ოჯახის პრობლემა არ მოგვარებულა. პირიქით, პრობლემა ყოველწლიურად უფრო იზრდება. ამ შემთხვევიდან ერთი წლის შემდეგაც მივმართე ადგილობრივ ხელისუფლებას დახმარებისთვის. მოსული იყვნენ სპეციალისტები, თუმცა, ისევ დაგვაიმედეს, საშიში არააო. თან გეოლოგმა გამაფრთხილა _ ქალბატონო, ეს ბუნებრივი მოვლენაა და მეტი აღარ შეგვაწუხოთ.,ნიადაგი დაიშლება, აბა, რა იქნებაო”, _ გვიყვება მანანა ტრაპაიძე და თან ეზოში იმ ადგილებს გვიჩვენებს, სადაც მიწა ჩავარდნილია და დიდი სიღრმის ორმოებია გაჩენილი.
ოჯახის დიასახლისის თქმით, ეზოში მიწის ჩავარდნის შედეგად გამოქვაბული რამდენიმე ადგილას წარმოიშვა, საიდანაც წვიმის დროს წყლის დიდი ნაკადი გადმოდის და საცხოვრებელ სახლს აზიანებს:
“ბოლო ერთი წლის განმავლობაში საგრძნობლად მოიმატა ორმოების სიღრმემ და სიგანემაც, რამდენიმე ადგილას საკმაოდ დიდი სიღრმის უფსკრულია წარმოქმნილი. როცა წვიმს, მათგან წყლები გამოდის და პირდაპირ სახლის ქვეშ გადის მდინარედ, რის გამოც სახლის პირველ სართულზე მუდმივად ნესტი და სისველეა. ფანჯრები მუდმივად ღია მაქვს, ერთი საათითაც რომ დავკეტო, ოთახებში საშინელი სუნი დგება.
წვიმაში წყალი პირველი სართულის ბოლო ოთახშიც შემოდის და იგი წინ მდებარე საძინებელ ოთახში რომ არ გავიდეს, გამოსავალი სხვა რომ ვერაფერი მოვიფიქრე, ბეტონის იატაკი ამოვტეხე და წყალს გარეთ გასასვლელი ისე მოვუნახე.
ვითხოვ, შემოწმდეს ჩემი ეზო და რაღაც მომიხერხონ, მირჩიონ მაინც, რა გავაკეთო. როცა წვიმს, ღამეს თეთრად ვათენებ შიშით, რომ იატაკი არ ჩავარდეს და შიგ არ ჩაგვიტანოს. რა ვიცი, რას იზამს ეს მიწისქვეშა მდინარეები, ეზოს წინ იმხელა კედელი გადააგდო და სადაა გარანტია, რომ ამ სახლსაც თავზე არ დაგვამხობს. მიწისქვეშა წყლების გამო, მთელი ეზო სავსეა ღრმულებითა და ორმოებით, ხეებს დაბლა ნიადაგი არ აქვთ, ფესვებით ჰაერშია გამოკიდული”, _ ამბობს მანანა ტრაპაიძე.
ტრაპაიძეების ოჯახის პრობლემასთან დაკავშირებით ლანჩხუთის მუნიციპალიტეტის გამგეობის ინფრასტრუქტურისა და არქიტექტურის სამსახურის უფროსს, ლევან ჩხაიძეს დავუკავშირდით.
“მუნიციპალიტეტის ხელმძღვანელობა საქმის კურსშია ამ ოჯახის მდგომარეობასთან დაკავშირებით, რამდენიმე დღის წინ ეს ქალბატონი თავადაც იყო ჩვენთან მოსული. ამ ეტაპზე, ვინაიდან წინასაარჩევნო პერიოდია, ვერაფრით დავეხმარებით. თუმცა, ნამდვილად ვადასტურებ, რომ იქ სერიოზული გეოლოგიური კვლევებია ჩასატარებელი. უნდა მოხდეს ტერიტორიის დაბურღვა. უახლოეს ხანში, არ არსებობს არანაირი სერიოზული საფრთხის საშიშროება ამ ოჯახთან მიმართებაში. როგორც კი შესაძლებლობა გამოჩნდება, მოვიწვევთ შესაბამის სპეციალისტებს, რომ მოხდეს ტერიტორიის დეტალური შესწავლა”, _ ასეთ პასუხს გვაძლევს გამგეობის ინფრასტრუქტურის სამსახურის უფროსი.
