გურიის რეგიონში აზიური ფაროსანას საწინააღმდეგო საავიაციო წამლობა მიმდინარეობს. ავიაციის გამოყენებით, ოზურგეთისა და ლანჩხუთის მუნიციპალიტეტებში 5 ათასამდე საყანე ფართობისა და დიდი მასივების დამუშავება იგეგმება. ავიაციის პარალელურად, ისევე, როგორც სამეგრელოსა და იმერეთში, გურიის რეგიონში მუშაობს სოფლის მეურნეობის სამინისტროს და სურსათის ეროვნული სააგენტოს სპეციალური ტექნიკა, რომელიც დასავლეთ საქართველოშია მობილიზებული. თერმული ნისლის ტექნოლოგიით, სამანქანე და სატრაქტორე აგრეგატებით მავნებლის საწინააღმდეგოდ იწამლება ის ფართობები, სადაც ავიაციის გამოყენება შეუძლებელია. გურიის რეგიონში მიმდინარე საავიაციო წამლობას სურსათის ეროვნული სააგენტოს უფროსი ზურაბ ჩეკურაშვილი, გურიის გუბერნატორი მერაბ ჭანუყვაძე და ადგილობრივი ხელისუფლების წარმომადგენლები დაესწრნენ.
როგორც სურსათის ეროვნული სააგენტოს უფროსმა ზურაბ ჩეკურაშვილმა აღნიშნა, მავნებლის საწინააღმდეგო ღონისძიებები უცხოელი ექსპერტების ჩართულობით შემუშავებული გეგმის შესაბამისად მიმდინარეობს და გატარებული სამუშაოების შედეგად მავნებლის გეოგრაფია არ გაზრდილა და არსებულ საზღვრებში ლოკალიზება მოხერხდა. მავნებლის პოპულაციის შემცირების მიზნით ღონისძიებები კვლავ გაგრძელდება.
“გურიაში ავიაციის გამოყენებით იწამლება საყანე ფართობები და პარალელურად გაგრძელდება ის ღონისძიებები, რომლებიც მიმდინარეობს. ჩვენ აქტიურად ვმუშაობთ სურსათის ეროვნულ სააგენტოსთან და ყველაფერი გაკეთდება იმისათვის, რომ მავნებლის პოპულაცია შევამციროთ. ასევე მოვუწოდებთ მოსახლეობას ჩართულობისკენ. აზიური ფაროსანას საწინააღმდეგო ღონისძიებების ფარგლებში, გურიაში 17 ათას ჰექტარზე მეტი ფართობია შეწამლული“, _ განაცხადა გუბერნატორმა, მერაბ ჭანუყვაძემ.
სურსათის საავიაციო შეწამვლითი სამუშაოები დადგენილი წესების სრული დაცვით ტარდება. (R)
