გურიის მხატვართა შემოქმედებითი კავშირის მეშვიდე საშემოდგომო გამოფენა გაიხსნა.
შეხვედრაზე მოსულ საზოგადოებას _დებიუტანტ და პროფესიონალ მხატვრებს, ოზურგეთის მუნიციპალიტეტის ხელმძღვანელ პირებს, ქალაქ ოზურგეთის მერს, ოზურგეთელ ხელოვნების მოყვარულ საზოგადოებას, ხელოვანი ლია ურუშაძე მიესალმა, შეხვედრა კი გურიის მხატვართა კავშირის თავმჯდომარემ თამაზ დარჩიამ გახსნა:
_ მოგესალმებით სიყვარულით და პატივისცემით. მიხარია, რომ დღეს აქ არიან წარმოდგენილი მხატვრები, რომლებიც გამოირჩევიან განასაკუთრებული ნიჭიერებით, საკუთარი ხელწერით და დარწმუნებული ვარ, თავიანთ მნიშვნელოვან სიტყვას იტყვიან სახვითი ხელოვნების 
სამყაროში. თქვენ გექნებათ საშუალება, გაეცნოთ აქ წარმოდგენილ ნიჭიერ, პერსპექტიულ მხატვართა ნამუშევრებს, _ თქვა მან.
გამოფენის გახსნაზე მისულ საზოგადოებას მიესალმა გურიის გუბერნატორი მერაბ ჭანუყვაძე და ქალაქ ოზურგეთის მერი ბეგლარ სიორიძე. მათ გამოთქვეს კმაყოფილება და მხატვრებს შეჰპირდნენ, რომ არასდროს გამოაკლდებიან ასეთ შეხვედრებს და მზად არიან, დახმარების ხელი გაუწოდონ მათ.
ოზურგეთის სახელმწიფო თეატრის სამხატვრო ხელმძღვანელმა ვასო ჩიგოგიძემ, ასეთი მხატვრების მშობელ გურიას, ბედნიერი მხარე უწოდა და და თქვა, რომ ისინი, საკუთარი ნიჭიერებით, მთელ მსოფლიოს დაამშვენებენ, არათუ ჩვენს ქვეყანას. მან, აგრეთვე შეკრებილ საზოგადოებას სასიამოვნო სიახლის, გალერეის და თეატრის ერთობლივი პროექტის შესახებ ესაუბრა, რაც ეხება უახლოეს მომავალში ირლანდიელი მწერლის სემიუელ ბეკეტის შემოქმედების ფილოსოფიური ხაზის კიდევ ერთხელ 
გაცნობას გურული მაყურებლისთვის.
_ ეს იქნება 25-წუთიანი წარმოდგენა და გაკეთდება გურიის ყველა მუნიციპალიტეტის სამხატვრო გალერეაში, სადაც ჩვენ ბეკეტის აზროვნების სიღრმეს, მის ფილოსოფიას გავიმეორებთ, _ თქვა ვასო ჩიგოგიძემ, რასაც დარბაზში მყოფთა ოვაცია მოჰყვა.
გალერეის დირექტორმა ავთანდილ თავართქილაძემ ისაუბრა გამოფენის მონაწილე ნიჭიერ მხატვრებზე. გამოთქვა სიხარული და კმაყოფილება იმის გამო, რომ აქ წარმოდგენილი გურული მხატვრების სახით თვითმყოფადი და საუკეთესო თაობა იღვწის.
_ კარგია თუ იქნება გამოფენა-გაყიდვები, რომ მათ საკუთარი ნამუშევრების რეალიზაციის საშუალება ექნეთ, _ თქვა მან.
გამოფენაზე მყოფმა სტუმრებმა დაათვალიერეს წარმოდგენილი ნამუშევრები.
გამოფენის ორგანიზატორებმა განმარტეს, გურულ მხატვართა მეშვიდე საშემოდგომო გამოფენა თვის ბოლომდე გასტანს და დაინტერესებულ საზოგადოებას საშუალება ექნება, სრულად გაეცნოს მისთვის საინტერესო ნამუშევრებს.
