ოზურგეთის მუნიციპალიტეტის ახალი მოწვევის საკრებულო ხვალ, 12 საათზე შეიკრიბება.
როგორც “გურია ნიუსი” უკვე წერდა, საკრებულოს თავმჯდომარის პოსზე დავით დარჩია იქნება წარდგენილი, ხოლო მოადგილის კანდიდატურას ღურჯუმელიძე დაიკავებს.
ვინ იქნებიან კომისიების თავმჯდომარეები ? მათი ვინაობა დღეს უმრავლესობის შეხვედრაზე გადაწყდა.
“გურია ნიუსს” რამდენიმე დეპუტატმა მიაწოდა ინფორმაცია, რომ საკრებულო ხვალინდელ სხდომასთან დაკავშირებით დღეს იკრიბებოდა და თბილისიდან გურიის გუბერნატორის მერაბ ჭანუყვაძის ჩამოსვლას ელოდებოდა.
“3 საათზე შეგვკრიბეს უმრავლესობა, იქ იყვნენ დავით დარჩია და გიორგი ღურჯუმელიძე. ოფიციალური სახე არ ჰქონია ამ შეხვედრას. შევიკრიბეთ და გადაწყდა, თუ ვინ იქნებიან საკრებულოში ხელმძღვანელი პირები. მერაბ ჭანუყვაძე იყო თავიდან და მერე გავიდა”, _ გვითხრა ერთ-ერთმა დეპუტატმა.
აღსანიშნავია, რომ კომისიების თავმჯდომარეებად დასახელებული დეპუტატები ძველი სახეები არიან და ისინი წინა მოწვევის საკრებულოშიც ხელმძღვანელობდნენ კომისიებს.
გიორგი ღურჯუმელიძე “გურია ნიუსთან” ამბობს, რომ დეპუტატებთან კოსნულტაციები დღეს დასრულდა:
_ კომისიის თავმჯდომარეებს აირჩევენ ხვალ. დღეს მოხდა ამ გადაწყვეტილების მიღება კონსესუსის საფუძველზე. რაც შეეხება ძველ კადრებს, ისინი ჩვენ მიერ მხარდაჭერილი კანდიდატურები არიან.
ჩვენ მიერ მოპოვებული ინფორმაციით, სივრცით-ტერიტორიული დაგეგმარების და ინფრასტრუქტურის კომისიას ლავრენტი ბიგვავა უხელმძღვანელებს; განათლების, კულტურის, სპორტის, ახალგაზრდულ საქმეთა, ჯანმრთელობისა და სოციალურ საკითხთა კომისიას _ ისევ ლელა საჯაია ჩაიბარებს; აგრარულ საკითხთა და ქონების მართვის, ბუნებრივი რესურსების საკითხების კომისიას გოჩა კილაძე უხელმძღვანელებს; სამანდატო, საპროცედურო, იურიდიულ საკითხთა და ეთიკის კომისიას ისევ ეროდი გორდელაძე ჩაიბარებს; საფინანსო-საბიუჯეტო კომისიას _ გიორგი ჩაგანავა; ფრაქცია “ქართულ ოცნების” თავმჯდომარე ტარიელ აროშიძე იქნება.
