„გურია ნიუსს“ დახმარებისთვის ლანჩხუთში, სოფელ სუფსაში მცხოვრებმა ჭანტურიების ოჯახმა მიმართა. ოჯახი სახელმწიფოს ძალადობაში ადანაშაულებს.
„ვის არ მივმართეთ დახმარებისთვის, მაგრამ არავინ ცდილობს, დაიცვას ჩვენი ოჯახის ინტერესები. გამოდის, რომ სახელმწიფო 592 კვ.მ-ს ძალადობრივად გვართმევს“, _ ამბობენ ჭანტურიები, რომლებსაც წლებია, საკუთარ საკარმიდამო მიწის ნაკვეთზე სანერგე მეურნეობა აქვთ გაშენებული და თავს სწორედ ამ საქმიანობით ირჩენენ. თუმცა, როგორც თავად ყვებიან, ჩქაროსნული ავტომაგისტრალის მშენებლობის გამო პრობლემები შექმნათ. ირკვევა, რომ ავტომაგისტრალის სამტრედია-გრიგოლეთის მეოთხე ლოტზე ავტობანის მშენებლობა სწორედ ჭანტურიების ზემონახსენებ მიწის ნაკვეთზე გადის.
„საავტომობილო გზების დეპარტამენტმა ჩვენი კუთვნილი 4805 კვ.მ მიწის ნაკვეთიდან მხოლოდ 592 კვ.მ. მიწის ნაკვეთის გამოსყიდვა მოითხოვა, რაც ავტობანისთვის სჭირდებათ.
ჩვენ ამაზე, რა თქმა უნდა, კატეგორიული უარი ვთქვით, რადგან ჩქაროსნული ორმხრივი მიმართულების ავტობანი საცხოვრებელ სახლთან ძალიან ახლოს გადის და იქ ცხოვრება გაუსაძლისი იქნება: ხმაურის, მტვერის, ვიბრაციისა და გამონაბოლქვის გამო, ოჯახის სამივე წევრს ისედაც სხვადასხვა სახის დაავადებები გვაწუხებს.
საყურადღებოა, ისიც, რომ ავტობანი 4,5 მეტრ სიმაღლეზე აიწევს საკარმიდამო მიწის ნაკვეთთან შედარებით, რის გამოც უკვე, მცირე წვიმის დროსაც, საკარმიდამო ნაკვეთზე წყალი გუბდება. უკვე ხუთჯერ დაიტბორა ჩვენი ეზო, ამის შესახებ მშენებელ კომპანიასაც ვაცნობეთ, თუმცა ყურადღება არავის მოუქცევია.
ზემოთ ნათქვამ გაუსაძლის მდგომარეობასაც რომ თავი დავანებოთ, საკარმიდამო ნაკვეთი, რაც ჩვენი ერთადერთი შემოსავლის წყაროა, კარგავს თავის დანიშნულებას და მოსავლის მოსაყვანად გამოუსადეგარი რჩება“, -ამბობენ ჭანტურიები და მშენებელი კომპანიისა და საავტომობილო გზების დეპარტამენტის წარმომადგენლებს ფსიქოლოგიურ ზეწოლაში ადანაშაულებენ.
მათივე თქმით, არაერთი მცდელობის მიუხედავად არ მიეცათ საშუალება ექსპერტიზა ჩაეტარებინათ.
„ჩვენი ეს მცდელობა რომ ექსპერტიზა ჩაგვეტარებინა, ამ დრომდე უშედეგოა, რადგან საავტომობილო გზების დეპარტამენტი არ იძლევა კოორდინატებს კონკრეტულად სად გაივლის ეს გზა.
თუმცა, ჩვენ ხელთ ჩაგვივარდა ტექნიკური ნახაზი, საიდანაც ირკვევა, რომ ავტობანიდან ჩვენი სახლი სულ რაღაც 18 მეტრის დაშორებითაა, თუმცა მშენებელ კომპანიას კიბის უჯრედი (ორი მეტრი) ნახაზში შეყვანილი არ აქვს.
როგორ შეიძლება 4,5 მეტრ სიმაღლიდან 16 მეტრში ცხოვრება, თავად განსაზღვრეთ. ჯერ კიდევ არ გაკეთებულა ავტომაგისტრალი და მიმდებარე ტერიტორიაზე არსებული სამუშაოების გამო სახლის კედლები და აივანი დაბზარულია. ადვილი მისახვედრი უნდა იყოს, უკვე ჩამორთმეულ მიწის ნაკვეთზე, ჩვენი სახლიდან 16 მეტრზე მიწის გაბურღვითი სამუშაოები რომ დაიწყება, რა საფრთხის ქვეშ დადგება ჩვენი ოჯახი“, -დასძენს ოჯახი, რომელიც სამი ქალბატონისგან შედგება.
ჭანტურიების აზრით, სახელმწიფოს მხრიდან მათ მიმართ გულგრილი დამოკიდებულება იმაშიც გამოიხატა, რომ აღებაში არ შეიყვანეს სასიმინდე, რომლის ერთი ბოძიც ასაღებ 592 კვ.მ-ზე მდებარეობს, ანუ გამოდის, რომ ნალია სამ ფეხზე ზედ ავტობანის საზღვარზე უნდა დარჩეს, ანდაც მისი სხვა ადგილას გადატანა საკუთარი ხარჯებით უნდა მოახდინონ.
„პირუტყვის სადგომის სხვა ადგილზე გადატანასაც გვთავაზობენ, მაგრამ არავინ ფიქრობს იმ კომპენსაციისა და ზარალის ანაზღაურებას, რაც ახალ ადგილზე მის გასაკეთებლად მინიმუმ 2000 ძირი ნერგის აღებით ოჯახს მიადგება“, _ ამბობენ ჭანტურიები და ეზოს დატბორილ ადგილს გვიჩვენებენ, სადაც ნერგების დიდი ნაწილი განადგურდა.
როგორც „გურია ნიუსთან“ საუბარში ქალბატონები ამბობენ, მათი შემთხვევა უთანასწორობის კლასიკური ნიმუშია.
„ჩვენს შემთხვევაში, ნათლად ჩანს, თუ როგორი დაჩაგრული და აბუჩად აგდებული ჰყავთ უმწეო ადამიანები ჩვენს ქვეყანაში. ეს კლასიკური ნიმუშია უთანასწორობისა და სახელმწიფოს მხრიდან ზეწოლის.
ჩვენ კი არ ვეწინააღმდეგებით ქვეყნის წინსვლასა და განვითარებას, უბრალოდ, ვითხოვთ ასახლებას და სრულ კომპენსაციას, რადგან 592 კვ.მეტრის ჩამორთმევით ჩვენი აქ დარჩენა უკიდურესად სახიფათოა“, _ ამბობენ ისინი.
აქვე ირკვევა, რომ ჭანტურიების მეზობლად, ანალოგიურ მდგომარეობაში მყოფი ერთი ოჯახი უკვე გაასახლეს და სრული კომპენსაციაც მისცეს.
აღნიშნულ საკითხთან დაკავშირებით „გურია ნიუსი“ კომენტარისთვის საავტომობილო გზების დეპარტამენტის ხელმძღვანელს, გიორგი სეთურიძეს დაუკავშირდა, რომლის თქმითაც, ჭანტურიების ოჯახის საკითხი განხილვის სტადიაშია.
„მათი სახლი, დაახლოებით, 15 მეტრის დაშორებითაა ავტობანიდან, რის გამოც ეს ოჯახი ასახლებას და სრულ კომპენსაციას ითხოვს. ამ საკითხზე იმსჯელა სპეციალურმა კომისიამ და უარყოფითი დასკვნა დადო, თუმცა, ეს საკითხი ჯერ კიდევ არ არის მოხსნილი დღის წესრიგიდან, ჭანტურიების საკითხზე ვიმსჯელებთ“,_ გვითხრა სეთურიძემ.
რაც შეეხება ჭანტურიების ოჯახის მხრიდან გაჟღერებულ ბრალდებებს, რაც საავტომობილო გზების დეპარტამენტის მხრიდან ზეწოლასა და კოორდინატების დამალვას უკავშირდება, დეპარტამენტის ხელმძღვანელი აბსურდულს უწოდებს.
