ცოტა ხნის წინ, ლანჩხუთის მუნიციპალიტეტის მერიის სააქტო დარბაზში დამთავრდა ლანჩხუთი-ჩოხატაურის მაჟორიტარი დეპუტატის ნინო წილოსანის შეხვედრა მოსახლეობასთან. დეპუტატმა და მისმა სამაჟორიტარო ბიურომ მოსახლეობას ერთი წლის მუშაობის ანგარიში წარუდგინეს.
ანგარიშის პირველ ნაწილში დეპუტატმა თავის საპარლამენტო საქმიანობასა და საკანონმდებლო პროცესში მონაწილეობაზე ისაუბრა. ყურადღება გაამახვილა საპენსიო რეფორმაზე, ასევე, იმ კანონპროექტების განხილვასა და მომზადებაზე, რომლებიც ახალგაზრდების ჯანსაღ მომავალსა და გენდერული თანასწორობის საკითხებს ეხება და მისთვის პრიორიტეტულია.
დეპუტატის ანგარიშის შემდეგი ნაწილი დაეთმო 2017 წელს მუნიციპალიტეტებში მისი ძალისხმევით განხორციელებულ პროექტებსა და ბიუროს აქტივობებს.
კერძოდ, დეპუტატის ინფორმაციით, ერთი წლის განმავლობაში მათთან კომუნიკაცია დაამყარა 2500-ზე მეტმა ამომრჩეველმა; კონსულტაცია გაეწია 1500-ზე მეტ მოქალაქეს; სხვადასხვა სახის დახმარება მიიღო 500-ზე მეტმა მოქალაქემ; ჯანდაცვისა და სოციალური უზრუნველყოფის საკითხებზე, ბიუროს შუამდგომლობით და მერიის დაფინანსებით, დაიხარჯა 70 000 ლარზე მეტი; დეპუტატის უშუალო ძალისხმევით, უფასო სამედიცინო მომსახურებით ისარგებლა 700-ზე მეტმა ადამიანმა; 5 მილიონი ლარით გაიზარდა შშმ პირების სოციალური რეაბილიტაციის პროგრამების დაფინანსება;
მაჟორიტარმა დეტალური ინფორმაცია წარმოადგინა ლანჩხუთისა და ჩოხატაურის მუნიციპალიტეტებში განხორციელებულ, მიმდინარე და დაგეგმილ ინფრასტრუქტურულ პროექტებზე, მათ შორის არის – გზების შეკეთება, სკოლების და სპორტული მოედნების მშენებლობა/რეაბილიტაცია, სანიაღვრე არხების მოწყობა, სასმელი წყლის სისტემის რეაბილიტაცია, გაზიფიცირება, 
რომელიც 2017 წელს ჯამში 20-მდე სოფელში განხორციელდა.
მსგავსი პროექტები მაჟორიტარისთვის კვლავ გამოწვევებად რჩება და 2018 წელს უფრო დიდი მასშტაბებით გაგრძელდება.
ასევე დიდი სამუშაო იგეგმება ფაროსანასთან საბრძოლველად. წილოსანი აქტიურად არის ჩართული ამ მიმართულებით 2018 წლის სტრატეგიის პროექტის შემუშავებაში.
2018 წლისთვის დეპუტატის პრიორიტეტულ საკითხებს შორის არის: დასაქმება, მცირე და საშუალო ბიზნესის განვითარების ხელშეწყობა, გურიის ტურისტული პოტენციალის განვითარების ხელშეწყობა, ახალგაზრდობის განვითარების მხარდაჭერა, თვითმმართველობის გაძლიერება.
ანგარიშის პრეზენტაცია ეროვნულ-დემოკრატიული ინსტიტუტის (NDI) მხარდაჭერით გაიმართა.
(R)
