“გურულები რეგიონის განვითარებისთვის” _ ასე ჰქვია არასამთავრობო ორგანიზაციას, რომლის პრეზენტაციაც გუშინ, თბილისში, საქართველოს პარლამენტის ეროვნულ ბიბლიოთეკაში გაიმართა.
მოქალაქეების აქტიურად ჩართვა რეგიონის განვითარებაში, სამოქალაქო პროექტები და პროგრამები, ინვესტიციები და თანამშრომლობა დონორ ორგანიზაციებთან, პროფესიული გადამზადებები, თანამშრომლობა სოციალური პრობლემების მოსაგვარებლად, საკანონმდებლო ცვლილებებზე მუშაობა, ევროპული გამოცდილების დანერგვა გურიის რეგიონში, კავშირები ბიზნესმენებთან, სამთავრობო და არასამთავრობო ორგანიზაციებთან_ ეს ის ჩამონათვალია, რის გაკეთებასაც ორგანიზაცია გურიის რეგიონის გასავითარებლად აპირებს.
საიდან გაჩნდა არასამთავრობო ორგანიზაციის შექმნის იდეა, ვინ არიან ადამიანები, რომლებიც ამ ორგანიზაციას უდგანან სათავეში, რა აქვთ გაკეთებული გურიის რეგიონისთვის და რის გაკეთებას გეგმავენ მომავალში _ ამ საკითხებზე “გურია ნიუსს” “გურულები რეგიონის განვითარებისთვის” თავმჯდომარე, მაია ბარამიძე ესაუბრა.
როგორც ის ამბობს, მათი დამსახურებით სუფსის ხეობაში მდებარე სოფლებს დღეს ელექტროენერგია მიეწოდება, გარდა ამისა, ბუკისციხე-ზემო სურების 17 კმ-იანი გზის მშენებლობა სრულდება, თუმცა, მოასფალტებისთვის საჭირო თანხა წელს ბიუჯეტს არ გამოუყვია.
“გურიის რეგიონში სუფსის ხეობის განვითარებისთვს ვმუშაობდით და გვაქვს უკვე 3 წლიანი გამოცდილება. ჩვენმა, ასევე მოქალაქეების აქტიურობამ და ხელისუფლებასთან თანამშრომლობამ გამოიღო კარგი შედეგები. სუფსის ხეობის სოფლებს 25 წლის განმავლობაში არ ჰქონდათ შუქი, დღეს უკვე ელექტროგამრიცხველიანება მომხდარია. ყველაზე მთავარი პროექტი, რომელიც საუკუნის პროექტადაა წოდებული არის ბუკისციხე-ზემო სურების 17 კმ-იანი გზი„1234567 მშენებლობა, რომლის მესამე ეტაპიც დაახლოებით 10 დღეში სრულდება და მოსაასფალტებლად იქნება მზად. ეს არის ძალიან რთული გზა და ტექნიკურად რთული შესასრულებელია. ამ გზის მოსაასფალტებლად თანხა წლევანდელ ბიუჯეტში არაა გამოყოფილი და ჩვენ ისევ მოგვიწევს ბრძოლა. თუ გზა არ მოასფალტებდა ეს იქნება ძალიან ცუდი, კლიმატური პირობებიდან გამომდინარე გზას ერთ წელში წყალი ჩარეცხავს და უკვე დახარჯული თანხა წყალში გადაიყრება”, _ ამბობს ბარამიძე.
ბარამიძის თქმით, არასამთავრობო ორგანიზაციის ჩამოყალიბებისკენ რეგიონში არსებულმა პრობლემებმა და დაგროვილმა გამოცდილებამ უბიძგა. პირველი ნაბიჯი კი რასაც ორგანიზაცია გადადგამს საკანონმდებლო ინიციატივაა, რომელიც თვითმმართველობაში მოქალაქეების ჩართულობას ეხება.
“საქართველოში ბევრი პრობლემებია და გურიის რეგიონს მეტად უჭირს. ჩვენმა გამოცდილებამ მოგვცა გამბედაობა, რომ მთლიანად რეგიონისთვის გვემუშავა. ჩვენ ვიყავით საინიციატივო ჯგუფი, ვაპირებდით ევროპასთან თანამშრომლობას და ოფიციალური სახე რომ ჰქონოდა გადავწყვიტეთ გავმხდარიყავით იურიდიული პირები: დათო შარაშიძე, ზურაბ კიკვაძე, ხათუნა ბარამიძე, ჯაბა სოროზანაშვილი, ნათია შათირიშვილი, ანა ბალამცარიშვილი. პირველი ნაბიჯი, რაც იქნება, საკანონმდებლო ინიციატივაა,თვითმმართველობის კანონების შესაცვლელად. ვიბრძოლებთ იმისთვის, რომ პარლამენტმა მიიღოს ეს კანონი. ეს იქნება კარგი არამხოლოდ გურიის რეგიონისთვის, არამედ მთლიანად საქართველოსთვის. დეტალებს არ ვიტყვი, მაგრამ არის მოქალაქეების ჩართულობაზე თვითმმართველობაში. ეს არის ევროპული გამოცდილება, რომელსაც ჩვენ ევროპელ მეგობრებთან ერთად ვმუშაობდით. ახლა მიმდინარეობს მუშაობა. კიდევ ვაპირებთ დავუმეგობრდეთ ბელგიის ერთ-ერთ ქალაქს, ჩვენი ერთ-ერთი დამფუძნებელი არის ბელგიის მოქალაქე. ვაპირებთ თანამშრომლობას ხელისუფლებასთან, სხვადასხვა ორგანიზაციებთან. ვეცდებით, ყველა ინიციატივა, რომელიც მოქალაქეებიდან წამოვა ვაქციოთ საქმედ და ვიმუშაოთ პროექტებზე და მთლიანად გამოვიყენოთ ის რესურსი, რაც არის გურიაში”,_ამბობს ის.
“გურულები რეგიონის განვითარებისთვის” თავმჯდომარე აღნიშნავს, რომ საქართველოში ყველაფერი ნელ-ნელა კეთდება, თუმცა, რეგიონები იცლება და მოქალაქეები ან საზღვარგარეთ მიდიან ან დედაქალაქში ვაჭრობით კავდებიან.
ის ასევე აღნიშნავს რომ საქართველოში, განსაკუთრებით კი გურიაში არის საინტერესო კურორტები, რომელთა არსებობაც ბევრმა არ იცის, გაკეთება კი შესაძლებელია.
“მთლიანად საქართველოში ყველაფერი ნელ-ნელა კეთდება, მაგრამ ეს არ არის საკმარისი. ჩვენი ისტორია ასეთია, ვირჩევთ ხელისუფლებას, შემდეგ არ მოგვწონს, ვლანძღავთ, რევოლუციას ვუწყობთ, გადავაყენებთ და ა.შ. ჩვენ არა ვართ არც პოზიცია, არც ოპოზიცია, ჩვენმა თანამშრომლობამ ხელისუფლებასთან გამოიღო შედეგი და ვაპირებთ სხვებსაც მოვუწოდოთ თანამშრომლობისკენ. კრიტიკა აუცილებელია, მაგრამ მხოლოდ ხელისუფლების კრიტიკით შორს ვერ წავალთ. საქართველოში ან ემიგრაციაში მიდიან ან თბილისში ჩამოდიან და რეგიონებში არავინ რჩება. თბილისში საწარმოები არ არის და ვაჭრობენ. ქვეყანა ვერ მიდის წინ, როცა შესაძლებლობები არის და გურია არის კუთხე, რომელსაც აქვს ზღვა, მთა და ბარი. რამდენიმე საინტერესო კურორტია, რომლებიც საერთოდ ათვისებული არ არის და არც ისე დიდი თანხები დაჭირდება ალბათ იქ კურორტის გაკეთებას. ეს არის მაგალითად, ჯარჯის ტბა სურების თავზე. ბევრი რამის გაკეთება შეიძლება, მაგრამ ქვეყანაში არ არის საშალება. ვერ გამოვედით საბჭოთა მენტალობიდან. ვფიქრობთ, რომ ხელისუფლებამ უნდა გაგვიკეთოს მაგრამ ის, რომ სახელმწიფოს არ აქვს საშუალება ან ხელისუფლებას სხვა პრიორიეტები აქვს, არ ვფიქრობთ. რა თქმა უნდა ქვეყანაში ბევრი რამე კეთდება, მაგრამ კიდევ ბევრი არის გასაკეებელი და მოქალაქეებმა თვითონ უნდა აიღონ ვალდებიულებები, აკონტროლონ ხელისუფლება და მოითხოვონ”,_ამბობს ბარამიძე.
