გრიგოლეთის საფეხბურთო ბაზაზე სარემონტო სამუშაოების გასახორციელებლად ლანჩხუთის მუნიციპალიტეტის ბიუჯეტიდან 20 ათასი ლარი გამოიყო. არადა, ბაზაზე, დაახლოებით, 400 ათასი ლარის ღირებულების სარეაბილიტაციო სამუშაოები ორი წლის წინ, ზაზა ურუშაძის გამგებლობის პერიოდში გახორციელდა. თუმცა, აღმოჩნდა ობიექტის ჩაბარებიდან მალევე ბაზის რეაბილიტირებულ შენობას გარკვეული პრობლემები შეექმნა, მათ შორის, მწყობრიდანაა გამოსული სველი წერტილები.
აღნიშნულთან დაკავშირებით მუნიციპალიტეტის მთავარ საფინანსო დოკუმენტში ცვლილების გახორციელებას საკრებულომ მხარი რამდენიმე დღის წინ გამართულ რიგგარეშე სხდომაზე 18 ხმით დაუჭირა. წინააღმდეგი მხოლოდ ერთი იყო, ოთხმა დეპუტატმა კი თავშეკავება ამჯობინა და კენჭისყრაში მონაწილეობა არ მიიღო.
კერძოდ, დამტკიცებული ასიგნების ფარგლებში, საგზაო ინფრასტრუქტურის მშენებლობა-რეაბილიტაციის და მოვლა-შენახვის, სხვა საქონელი და მომსახურების მუხლის 40000 ლარით შემცირების ხარჯზე, სოციალური და ჯანდაცვის სამსახურის, შიდა აუდიტის და ინსპექტირების სამსახურისა და ჩიბათის ადმინისტრაციულ ერთეულში სამუშაო ოთახების სარემონტო სამუშაოებზე ბიუჯეტიდან მიიმართება 20000 ლარი. ლანჩხუთის მუნიციპალიტეტის საფეხბურთო ბაზის სარემონტო სამუშაოებზე _ 20000 ლარი.
აღინიშნა, რომ 20 ათასი ლარის ღირებულების სარემონტო სამუშაოების შემდგომ, ბაზა მზად იქნება საფეხბურთო კლუბ „გურიას“ მისაღებად, რომელიც, დღესდღეობით, სხვა სასტუმროშია დაბინავებული.
თუმცა, ბაზაზე ელემენტარული საცხოვრებელი პირობების შესაქმნელად ზემონახსენები თანხის გამოყოფას საკრებულოში ხმამაღალი განცხადებების გარეშე არ ჩაუვლია. „ნაციონალური მოძრაობის“ წევრის კახა ასკურავას თქმით, რომელიც ერთადერთი დეპუტატი იყო, რომელმაც კენჭისყრისას საკითხს მხარი არ დაუჭირა, ამბობს, რომ გრიგოლეთის ბაზა კატასტროფულ მდგომარეობაშია და ამასთან დაკავშირებით კონკრეტულ პირების პასუხისმგებლობის საკითხი უნდა დაისვას.
„ორი წლის წინ ზარზეიმით გაიხსნა ეს ბაზა და ახლა აღმოჩნდა, რომ იქ ძალიან ცუდი მდგომარეობა ყოფილა. ვინმემ ამაზე პასუხი არ უნდა აგოს?! ვინც ეს გააკეთა, სად არიან ისინი?! ეს 20 ათასი იმისთვის გინდათ, რომ იქაურობას ხელმეორედ ჩაუტაროთ კოსმეტიკა“, „შეთითხნას“ მე მხარს ვერ დავუჭერ. წესით, ყველას უნდა გვიჩნდებოდეს კითხვები ამ საკითხთან დაკავშირებით“, _ ამბობს ასკურავა.
მმართველ გუნდში კი განმარტავენ, რომ ამ ეტაპზე უმთავრესი მიზანია „გურია“ იმ სიტუაციიდან როგორმე ამოვიდეს, რომელშიც, დღესდღეობით, იმყოფება, მითუმეტეს, რომ ზემონახსენები 20 ათასი ლარის გამოყოფით გაცილებით მეტი თანხის დაზოგვა მოხდება.
„კლუბის სასტუმროში ცხოვრება გაცილებით მეტი ჯდება და აქ ამაზეა საუბარი. როცა 20 ათასი ლარითაა შესაძლებელი საქმე გააკეთო, 100 ათასები რატომ უნდა გადავყაროთ?!“, _ ამბობს საკრებულოს საფინანსო კომისიის თავმჯდომარე ალექსანდრე მახათაძე.
