ლანჩხუთში, ქალაქის ცენტრში არსებულ მიტოვებულ შენობასთან დაკავშირებით, სადაც წლების წინ რესტორანი ფუნქციონირებდა, როგორც რიგითი მოქალაქეები, ისე ადგილობრივი ხელისუფლების წარმომადგენლები თანხმდებიან, რომ საფრთხის შემცველია და ფაქტობრივად, აღდგენას აღარ ექვემდებარება. მიმდებარე ტერიტორიაზე მცხოვრებთა თქმით, აქაურობა ანტისანიტარიის ბუდედაა ქცეული, მიუხედავად იმისა, რომ შენობის პირველი სართული ალუმინის ფირფიტებითაა შენიღბული, საქმეს ეს დიდად ვერ შველის.
“სირცხვილია ქალაქის ცენტრში ასეთი შენობა იდგეს, მაგრამ ამას რომ თავი დავანებოთ, ადვილი შესაძლებელია ვინმე, ქუჩაში შემთხვევით გამვლელი დაშავდეს კიდეც. წლებია ვერ გაურკვევიათ, ვის ეკუთვნის ეს შენობა. ამასობაში კი შეიძლება ტრაგედიაც დატრიალდეს. ის მაინც ქნან, რომ სახურავის ნაწილი, რომელიც გარეთა მხარესაა გამოწეული, ჩამოიღონ, სანამ თავში დაეცემა ვინმეს.
შენობის შიგნითაც აუტანელი მდგომარეობაა, პირველ სართულზე ალუმინის ფირფიტები კი ააკრეს, მაგრამ ეს ვის ან რას დააკავებს?! ანტისანიტარიის ბუდეა აქაურობა”, _ ამბობენ ადგილობრივები.
მიუხედავად არსებული მდგომარეობისა, მარტივად ამ შენობასთან დაკავშირებით რაიმე სახის გადაწყვეტილების მიღება შეუძლებელია, რადგან იგი წლებია რამდენიმე სუბიექტს შორის დავის საგანს წარმოადგენს. როგორც ჩვენთვისაა ცნობილი, ამ შენობასთან დაკავშირებით წლებია სასამართლო დავა მიმდინარეობს სახელმწიფოსა და კერძო პირს შორის.
ლანჩხუთის მერის პირველი მოადგილე გოგი ფაცურია “გურია ნიუსთან” გაკეთებულ კომენტარში ამბობს, რომ ამ შენობთან დაკავშირებით მუნიციპალიტეტის ხელმძღვანელობაც გაურკვევლობაშია.
“აქამდე ვიკვლევთ, მაგრამ რეალურად ვერაფერს მივაკვლიეთ, თუ რა ხდება რეალურად ამ შენობასთან დაკავშირებით და ვინაა ქონების მესაკუთრე. გარკვეული დროის განმავლობაში მას სახელმწიფო კოდიც ჰქონდა. დაახლოებით, ორი თვის წინ შესაბამისი უწყებისგან მივიღეთ პასუხი, რომ სასამართლო დავა ამ შენობასთან დაკავშირებით ისევ მიმდინარეობდა, თუმცა, როდემდე გაგრძელდება არაფერი ვიცით“, _ ამბობს ფაცურია.
ცნობისთვის, წინა ხელისუფლების პერიოდში, აღნიშნული შენობის აუქციონის წესით გაყიდვა დაგეგმილი იყო და მაშინ მუნიციპალიტეტის ხელმძღვანელობა პირობითი აუქციონის სახით 60 ათას ლარად ითხოვდა შენობის გაყიდვას, თუმცა, ეს წინადადება არ იქნა გათვალისწინებული, ეკონომიკის სამინისტრომ შენობა 200 ათას ლარად შეაფასა. მაშინ ამ ფასად შენობის მყიდველი არავინ გამოჩნდა, შესაბამისად, აუქციონიც ჩაიშალა. სწორედ ამის შემდეგ გაუჩნდა გარკვეულ სუბიექტებს მასზე პრეტენზია და აგერ რამდენიმე წელია, უკვე საქმეს სასამართლო იხილავს.
