დღეს საქართველოს უზენაეს სასამართლოში საქართველოს ეკონომიკისა და მდგრადი განვითარების სამინისტროსა და საქართველოს საკონსტიტუციო სასამართლოს ყოფილ თავმჯდომარე გიორგი პაპუაშვილთან, მოქალაქე როლანდ ბლადაძის სადავო, ჩამორთმეულ ქონებაზე საქმის არსებითი განხილვა და გადაწყვეტილების მიღება ვერ მოხერხდა.
რამდენიმე ალტერნატიული ფართი რაც სახელმწიფოს მხრიდან ბლადაძესთვის შეთავაზებული იქნა, მოსარჩელე მხარის დაუკმაყოფილებლობა საცხოვრებლად სათანადო პირობების არ არსებობის გამო გამოიწვია.
უზენაეს სასამართლოს მოსამართლეებმა ნინო ბაქაქურმა, ბესარიონ ალავიძემ და ზურაბ ძლიერიშვილმა მიიჩნიეს, რომ საქმის მორიგებით გადაწყვეტის შანსი მაინც არსებობდა და სხდომა 1 საათის განმავლობაში დახურულ კარს მიღმა, უშუალოდ დავაში ჩართული მხარეების მონაწილეობით მიმდინარეობდა.
დარბაზის დატოვება სხდომაზე მისულ აუდიტორიასთან ერთად, ბლადაძის ადვოკატს, არჩილ კაიკაციშვილსაც მოუხდა, რაც დარბაზში შესვლის შემდეგ გააპროტესტა, თუმცა, მოსამართლეებმა განმარტეს, რომ მათ კაიკაციშვილი დარბაზიდან არ გაუძევებიათ, არამედ შეუძლებელი იყო სხდომაზე რომელიმე მინისტრის ან თუნდაც გიორგი პაპუაშვილის დასწრება, რომელიც სასამართლო პროცესში უშუალოდ არ მონაწილეობს.
როგორც დახურულ კარს მიღმა გადაწყდა, საქართველოს უზენაესი სასამართლო მხარეებს დავის მორიგებით გადაწყვეტის შესაძლებლობას კიდევ 1 კვირის განმავლობაში აძლევს და სხდომა 12 აპრილს 15:30 საათზე განახლდება.
საქართველოს უზენაესი სასამართლოს შენობა როლანდ ბლადაძემ ისევ უკომენტაროდ დატოვა.
მისი წარმომადგენელი, არჩილ კაიკაციშვილი კი არ გამორიცხავს, რომ საქმემ სტრასბურგში გადაინაცვლოს, რადგან ეკონომიკისა და მდგრადი განვითარების სამინისტროს შეთავაზება არარეალურია.
„მოხდა ისე, რომ სასამართლომ გადაწყვეტილება მიიღო და დარბაზში როლანდ ბლადაძის წარმომადგენლის გარეშე დაიტოვა პროცესის მონაწილე ყველა მხარე და ესაუბრა მორიგების პირობებთან დაკავშირებით. მორიგების პირობა ეხება თბილისში ე.წ. დანელიას კორპუსში მე-12 სართულზე შავი კარკასის გადაცემას, სადაც 10 ტონა ნარჩენია მოგროვებული, საცხოვრებლად ვარგისად გასახდომად კი საჭიროებს 50 000-იდან 70 000-მდე აშშ დოლარია საჭირო, რის საშუალებაც მოცემულ ეტაპზე ბლადაძეს არ გააჩნია. სამინისტროს შემოთავაზება ამ თვალსაზრისით არის არარეალური და არა ადეკვატური. ვნახოთ რა გადაწყვეტილებები იქნება მიღებული. სხდომა გაგრძელდება 12 აპრილს და თუ კი ეკონომიკის სამინისტრო დასაბუთებას არ წარმოადგენს, როგორ აპირებს როლანდ ბლადაძის ქონებრივი უფლებების აღდგენას და დაკმაყოფილებას მაშინ, სასამართლო მიიღებს არსებით გადაწყვეტილებას საქმესთან დაკავშირებით და ჩვენ სამართლიანობის აღდგენის მოლოდინი ან საქართველოს უზენაესი სასამართლოს გადაწყვეტილების სტრასბურგში გასაჩივრების შანსი, სადაც სახელმწიფო კიდევ ერთხელ სამარცხვინოდ წააგებს დავას. ამაში ღრმად ვარ დარწმუნებული. მოცემულ შემთხვევაში დაველოდოთ სასამართლოს გადაწყვეტილებას“,_ამბობს კაიკაციშვილი.
კაიკაციშვილი ასევე აღნიშნავს, რომ ბლადაძე 500 კვ.მ-ის ფართობის შავ კარკასის მიღებას სამინისტროდან იმ შემთხვევაში დათანხმდება, თუ აღნიშნული ფართის პაპუაშვილთან გაცვლა მოხდება.
„დაზუსტდა, რომ ეკონომიკისა და მდგრადი განვითარების სამინისტრო მზადაა ალტერნატიული ფართი 500 კვ. მ.-ის შავი კარკასის მქონე 2 ბინის ბლადაძესთვის გადასაცემად. თუკი აღნიშნული ქონება გაიცვლება და გადაეცემა გიორგი პაპუაშვილს, ამ შემთხვევაში, როლანდ ბლადაძე თანახმა იქნება მიიღოს აღნიშნული ქონება და გაუცვალოს პაპუაშვილს ალტერნატიული ფართი ჩამორთმეულ საცხოვრებელ ფართთან მიმართებაში. ერთკვირიანი ტაიმ აუტი სასამართლომ ამ მოლაპარაკებებისთვისაც აიღო. რამდენად იქნება თანახმა გიორგი პაპუაშვილი და როლანდ ბლადაძე ეს გამოჩნდება ამ 1 კვირის განმავლობაში და ჩვენ ყველანი ვნახავთ შედეგებს“, _აცხადებს კაიკაციშვილი.
ცნობისთვის: 2017 წლის 1 ივნისს, სასამართლომ როლანდ ბლადაძის საკასაციო საჩივარი წარმოებაში მიიღო. 2017 წლის 1 ივნისს მიღებული კიდევ ერთი განჩინებით – არ დაკმაყოფილდა როლანდ ბლადაძის შუამდგომლობა საქმიდან საქმის განხმილველი მოსამართლეების, მაია ვაჩაძისა და ნუგზარ სხირტლაძის აცილებასთან დაკავშირებით, რასაც მხარის ადვოკატის, „ახალგაზრდა ადვოკატების“ ხელმძღვანელის, არჩილ კაიკაციშვილის დასაბუთებული სამართლებრივი პროტესტი მოჰყვა. 2017 წლის 20 ივნისის სასამართლოს განჩინებებით, მაია ვაჩაძემ და ნუგზარ სხირტლაძემ საქმიდან თვითაცილება განაცხადეს. საქმე განმხილველი ახალი პალატისთვის გადაეცა უზენაესი სასამართლოს თავმჯდომარე ნინო გვენეტაძეს, რომელმაც განსაზღვრა ახალი შემადგენლობა – ნინო ბაქაქური (თავმჯდომარე), ბესარიონ ალავიძე და პაატა სილაგაძე. 2017 წლის 8 სექტემბრის განჩინებით, პაატა სილაგაძემ, აგრეთვე მიიღო საქმიდან თვითაცილების შესახებ გადაწყვეტილება და საქმის განმხილველი საბოლოო შემადგენლობა, ჩამოყალიბდა ნინო ბაქაქურის (თავმჯდომარე), ბესარიონ ალავიძისა და ზურაბ ძლიერიშვილის შემადგენლობით. სასამართლომ 2017 წლის დეკემბერში, საქმეზე ზეპირი მოსმენით სხდომის ჩანიშვნის გადაწყვეტილება მიიღო.
