ლანჩხუთში „ქართული ოცების“ აქტივისტი და სკანდალური სახე ნუგზარ ცინცაძემ, იგივე ცანცუამ პრეკონფერენცია გამართა, სადაც მთავარი სასაუბრო თემა ლანჩხუთელი მსაჯის, ილო ტუღუშის გარდაცვალების საკითხი იყო. ტუღუში გასულ წლის დეკემბერში მალთაყვის ტყეში ნახეს ხეზე ჩამომხრჩვალი.
პრესკონფერენციას ოპოზიციური პარტიის წარმომადგენლები და საკრებულოს მმართველი გუნდის წევრებიც ესწრებოდნენ. პრესკონფერენციის მიმდინარეობისას არაერთხელ მოხდა სიტყვიერი დაპისრისპირებაა დეპუტატებსა და ნუგზარ ცინცაძეს შორის.
როგორც ცინცაძემ თქვა, ლანჩხუთის მერი, ალექსანდრე სარიშვილი, რომელიც გარდაცვლილი ილო ტუღუშის თანასოფლელი და ოჯახის ახლობელია, გამოძიებას ხელს უშლის. ცინცაძე მერს საფეხბურთო მატჩების მოსყიდვაშიც სდებს ბრალს: „მან წაიყვანა ილო ტუღუში გიორგი იმნაიშვილთან ბათუმში, რომ მსაჯების ფული ესესხებინა იმნაიშვილს.
„ბრალდება, რომელიც მე სარიშვილის მიმართ გამაჩნია, საკმაოდ რეალური და სერიოზულია, იმედი მაქვს, გამოძიება დაინტერესდება ჩემ მიერ გაკეთებული ბრალდებებით და დამკითხავს კიდეც.
ილო ტუღუში სწორედ სარიშვილმა ჩაიყვანა ბათუმში, შეხვდა გიორგი იმნაიშვილს და უთხრა, რომ ეს მსაჯია და შეეძლო „თელავთან“ თამაშში „გურიას“ დახმარებოდა. გამოძიება იმიტომ დაყოვნდა, რომ სარიშვილი ახალდარჩეული იყო, მოერიდნენ და ვერ მიიიღეს გადაწყვეტილება, მისთვის მოეთხოვათ პასუხი. ვიმეორებ, რომ სარიშვილმა წაიყვანა ტუღუში იმნაიშვილთან მსაჯების მოსასყიდი თანხისთვის“, _ ამბობს ნუგზარ ცინცაძე, რომლის თქმით, სარიშვილმა პასუხი უნდა აგოს კანონის წინაშე.
„ცანცუას“ მიერ გაჟღერებული ბრალდებები საქმის ახალ გარემოებად მიაჩნია „გურიას“ ყოფილ ერთ-ერთ ხელმძღვანელს, ნუგზარ ჩხაიძეს, რომელიც მსაჯის გარდაცვალების საქმის ერთ-ერთი ფიგურანტია. იგი არაერთხელ იყო საქმესთან დაკავშირებით გამოძიების მიერ დაკითხული.
„მაშინ, როცა მუნიციპალიტეტის მერი, მე და თენგიზ კიკვაძეს გვაბრალებს, რომ თითქოსდა ჩვენ ვიყავით ამ ყველაფერში თავიდათავი და გარკვეული ბრალი მიგვიძღვის მსაჯის გარდაცვალებაში, აღმოჩნდა, თავად ყოფილა მთავარი დამნაშავე. ეს ყველაფერი ჩემთვის საქმის ახალი გარემოებებია და იმედია, გამოძიება დაინტერესდება“, _ ამბობს ჩხაიძე.
პრესკონფერენციაზე მყოფმა საკრებულოს უმრავლეობის წევრებმა ნუგზარ ცინცაძის მხრიდან სარიშვილის მისამართით გაკეთებულ ბრალდებები გააპროტესტეს. მათი შეფასებით, ეს ყველაფერი აბსურდია და ვიღაცის მიერ შეკვეთილი ბინძური თამაში, რაც მერის დისკრედიტაციას ისახავს მიზნად.
თავად ალექსანდრე სარიშვილი ამ ეტაპზე „გურია ნიუსთან“ მოკლე კომენტარით შემოიფარგლა და მისი მისამართით გაკეთებულ ბრალდებებს აბსურდი უწოდა.
„ახლა შეხვედრაზე ვარ სოფელ ჯიხანჯირში, მოგვიანებით აუცილებლად გავაკეთებ დეტალურ კომენტარს ამ აბსურდულ ბრალდებებზე“, _ გვითხრა მერმა.
