თავის დროზე ამერიკელი მსახიობი გოლდი ჰოუნი ერთ-ერთი ყველაზე ძლევამოსილი მსახიობი ქალი იყო ჰოლივუდში. მან სახელი კომედიებში თამაშით გაითქვა. დრამატული როლები მის კინოკარიერაში თითებზეა ჩამოსათვლელი, მაგრამ კომედიური ნიღაბის ტყვეობაში აღმოჩენილი ბევრი მსახიობისგან განსხვავებით, რომლებიც ცდილობენ, დრამატული როლების თამაშით დააღწიონ თავი ამ მდგომარეობას, გოლდი ჰოუნი არასოდეს უჩიოდა საკუთარ აქტიორულ ბედს და დღესაც წარმატებითა და დიდი სიამოვნებით განაგრძობს კომედიებში მუშაობას.
გოლდი ჰოუნი განეკუთვნება იმ მსახიობთა რიცხვს, რომელთა კარიერა ყოველთვის სტაბილურად და წარმატებულად მიედინებოდა. მიუხედავად იმ კლიშეებისა, რომელიც მან შექმნა ეკრანზე, იგი მშვენიერი და ნიჭიერი მსახიობია. გოლდი ჰოუნი მაღალი დონის პროფესიონალია, იგი განუმეორებელი მომხიბვლელობითა და გულწრფელობით ყველას ერთნაირად იპყრობს, მაყურებელსაც და სერიოზულ კინოკრიტიკოსსაც.
გოლდი ჰოუნი დაიბადა 1945 წლის 21 ნოემბერს ვაშინგტონში. დედამისი მოცეკვავე იყო, მამა კი პროფესიონალი მუსიკოსი. მისი წინაპარი მამის მხრიდან იყო ედვარდ რუთლეჯი, ყველაზე ახალგაზრდა ადამიანი, რომელმაც ხელი მოაწერა ამერიკის დამოუკიდებლობის დეკლარაციას 1776 წელს. გოლდი სამი წლის ასაკიდან სწავლობდა ცეკვასა და სიმღერას. თავისი პირველი როლი თეატრში მან 11 წლისამ შეასრულა სპექტაკლში “მაკნატუნა”, რისთვისაც დოლარნახევარი მიიღო. 16 წლისა გოლდი უკვე თამაშობდა ჯულიეტას თეატრალურ სცენაზე, ჩვიდმეტისა კი სხვებს ამეცადინებდა ცეკვაში, რათა კოლეჯში სწავლის ფული გადაეხადა. ცოტა ხანს სწავლობდა დრამატულ ხელოვნებას უნივერსიტეტში, მაგრამ მალე დაანება თავი და გადაბარგდა ნიუ-იორკში, სადაც განაგრძო პროფესიონალი მოცეკვავეს კარიერა. გოლდი ბევრს ცეკვავდა სხვადასხვა ბარებსა და კლუბებში, აგრეთვე ბროდვეიზეც. დღემდე იგი ბევრ დროს უთმობს ცეკვას და ეს არის ერთ_ერთი მიზეზი იმისა, რომ მსახიობს ასეთი მშვენიერი და მოხდენილი სხეული აქვს.
გოლდი ჰოუნი ყოველთვის გამოირჩეოდა იუმორის გრძნობით, როგორც ამბობენ, დღემდე ვერავინ ყვება მასზე უკეთესად ანეგდოტებს, იგი შეუდარებელია როცა ვინმეს აჯავრებს. როდესაც ეკითხებიან თუ როგორ ახერხებს ასე კარგად რომ გამოიყურებოდეს, იგი ამბობს: ”იფიქრეთ მხოლოდ კარგზე. იცხოვრეთ დღევანდელი დღით და ეცადეთ თქვენი ახლობლები გაახაროთ. ყოველთვის გახსოვდეთ, რომ ჩვენში, განურჩევლად ასაკისა, მუდმივად პატარა მხიარული ბავშვი ზის. საჭიროა მხოლოდ ვიცოდეთ თუ როგორ და როდის გამოვუშვათ იგი გარეთ”. “ჰოლივუდის ცაზე, სადაც ბატონობს შური, ფული და ეჭვიანობა, გოლდი ერთადერთი ნათელი ვარსკვლავია”, _ წერდა ერთი ჟურნალი.
ცნობილი მსახიობი ალან ოლდა დარწმუნებულია რომ გოლდის გააჩნია თერაპევტული ეფექტი გარშემო მყოფებზე. იგი ტკბება ცხოვრებით და ეს თვისება გადამდებია სხვებზეც. ერთხელ მსახიობი მანქანით მიემგზავრებოდა. რადიო გადმოსცემდა მის საყვარელ სიმღერას ელტონ ჯონის შესრულებით. სიმღერამ ისე ჩაითრია იგი, რომ გოლდიმ მანქანა გააჩერა, ბოლომდე აუწია ხმას, გადმოვიდა მანქანიდან და ცეკვა დაიწყო. იქვე მიმავალმა ახალგაზრდა მძღოლმა, რომელმაც იცნო ცნობილი ვარსკვლავი, გააჩერა მანქანა და სიამოვნებით უცქერდა მას. გოლდი მიეჭრა მძღოლს, გადმოიყვანა მანქანიდან და აიძულა მასთან ერთად ეცეკვა. ცეკვის შემდეგ ახალგაზრდამ განაცხადა რომ ასე კარგად მას დრო დიდი ხანია არ გაუტარებია. აღსანიშნავია, რომ გოლდის ყოველთვის იტაცებდა როკ_მუსიკა, მისი საყვარელი ჯგუფებია დორს და როლინგ სთოუნზ.
კარიერის დასაწყისში გოლდი ჰოუნი ტელევიზიაში მოღვაწეობდა, ჯერ როგორც მოცეკვავე, შემდეგ კი მას ეპიზოდური როლებიც მიანდეს. 1967-68 წლებში იგი მონაწილეობდა ტელედადგმაში “დილა მშვიდობისა, მსოფლიო!”, მას მოჰყვა ძალიან პოპულარული “ლაფ ინ”, სადაც დაიბადა სასაცილო და მიმზიდველი ქერათმიანი გოგონას იმიჯი, რომელიც აი, უკვე ლამის 40 წელია მილიონობით მაყურებელთა გულებს იპყრობს.
როგორც წესი, თუ მსახიობმა სახელი გაითქვა ტელევიზიაში მისი პერსონით ჰოლივუდი ინტერესდება ხოლმე. ასე მოხდა გოლდი ჰოუნის მაგალითზეც. მისი მეორე ფილმი “კაქტუსის ყვავილი” ნამდვილ სენსაციად იქცა. თავისი თამაშით მან პარტნიორები_ ლეგენდარული მსახიობები ინგრიდ ბერგმანი და უოლთერ მატაუ დაჯაბნა. ჟურნალ გაზეთები მას მერილინ მონროს მსგავს წარმატებას უწინასწარმეტყველებდნენ, ჟურნალმა თაიმმა კი ერთ წერილში აღნიშნა: ”გოლდის ნამდვილად შეუძლია თამაში”. აკადემიამ მას ოსკარი მიანიჭა ქალის მეორეხარისხოვანი როლის შესრულებისათვის. გოლდი არც კი ოცნებობდა ამ სანუკვარ ჯილდოზე. იმ დროს იგი ინგლისში იმყოფებოდა გადაღებებზე. ამ დიდი გამარჯვების შესახებ მას მეგობრებმა მეორე დღეს შეატყობინეს.
ოსკარმა ხელ_ფეხი გაუხსნა ახალგაზრდა დამწყებ მსახიობს, მას უკვე შეეძლო თავისი გემოვნებით შეერჩია როლები. როგორც წესი ეს ფილმები კომედიური ხასიათისა იყო. 1974 წელს მან ამპლუა შეიცვალა და დრამატული როლი ითამაშა სთივენ სპილბერგის ფილმში “შუგარლენდის ექსპრესი”. ეს მსახიობის თქმით მისის საყვარელი როლია. ამ როლმა ნათლად წარმოაჩინა, რომ გოლდი ჰოუნი მრავალმხრივი ნიჭით დაჯილდოებული სერიოზული მსახიობია.
მისი ფილმები ყოველთვის წარმატებით სარგებლობდა, 70- 80-იან წლებში იგი ექვსჯერ იყო წარდგენილი ოქროს გლობუსზე. სამსახიობო ნიჭის გარდა გოლდი ჰოუნს ორგანიზატორული ნიჭიც აღმოაჩნდა. მან ფილმების პროდიუსირებასაც მიჰყო ხელი და საკმაოდ ნაყოფიერად. გოლდი იხსენებდა:”მე არ ვიყავი კმაყოფილი იმით, რომ ვარ უბრალოდ მსახიობი, რომელიც ვიღაცის დაწერილ ტექსტს იზეპირებს და შემდეგ ელოდება რომ ვინმე ამისაგან რაღაცას შექმნის. მე საკუთარ თავს შევეკითხე: რა მიშლის ხელს რომ ყველაფერი მე გავაკეთო?” ასე დაიბადა კომედია “რიგითი ბენჯამენი”, სადაც პროდიუსერმა და მსახიობმა გოლდი ჰოუნმა დიდი ოსტატობითა და დამაჯერობლობით გვიჩვენა თუ როგორ გარდაიქმნა განებივრებული, მდიდარი და ეგოისტი ქალი ემანსიპირებული და დამოუკიდებელ ადამიანად, რომელსაც სამხედრო კარიერის გაკეთება სურს. ‘რიგითმა ბენჯამენმა” იმ დროისთვის დიდი შემოსავალი_ 22 მილიონი დოლარი მოიტანა. ეს იყო ერთ-ერთი პირველი ფილმი, სადაც მთავარ როლს ქალი ასრულებდა და მამაკაცები დამხმარე როლებზე იყვნენ. წინათ, როგორც წესი, მსახიობ ქალს ყოველთვის მთავარი როლის შემსრულებელი მამაკაცი ედგა გვერდით. 1980 წელს “რიგითი ბენჯამენი” და გოლდი ჰოუნი ოსკარზე წარადგინეს.
პროფესიონალური მოღვაწეობისაგან საპირისპიროდ მისი პირადი ცხოვრება არც თუ ბედნიერად მიედინებოდა. ძალიან ბევრს საუბრობენ რომ ჰოუნი ლესბოსელია და მას ჰქონდა ურტიერტობა ცნობილ მსახიობტან სალი ფილდსთან. მისი ორი ქმარი ერთმანეთზე უარესი აღმოჩნდა, განქორწინების შემდეგ ისინი კომპენსაციის სახით დიდ თანხებს ითხოვდნენ. 1983 წელს გოლდი შეხვდა ცნობილ ამერიკელ მსახიობს, მასზე ექვსი წლით უმცროსს კურტ რასელს და მას შემდეგ ისინი ერთად ცხოვრობენ. მათ ერთად რამდენიმე ფილმში ითამაშეს, რომელთაგან ყველაზე ცნობილია “ბორტს მიღმა”. გოლდი ჰოუნი რასელს საკუთარი ცხოვრების ნამდვილ სიყვარულს უწოდებს. როგორც ამბობენ, მსგავსი წყვილი ჰოლივუდში ძნელად თუ მოიძებნება. ისინი ერთად ოთხ შვილს ზრდიან. გოლდის ქალიშვილი ქეით ჰადსონი ცნობილი ახალგაზრდა მსახიობია. გოლდი აცხადებს რომ ქვეყანაზე ვერავითარი სიმდიდრე ვერ შეედრება ოჯახურ სიამტკბილობას.
გოლდი ჰოუნი ბუდისტია და საკუთარ თავს ებრაელ ბუდისტს უწოდებს. 80_იანი წლებიდან გოლდი ჰოუნი აქტიურად ჩაება ცხოველთა დაცვის მოძრაობაში, იგი ბევრს მოგზაურობს მსოფლიოში და ველურ ბუნებაზე დოკუმენტურ ფილმებს იღებს. დრო თითქოს უძლურია გოლდის წინაშე, ჰოლივუდის ქერათმიანი სასაცილო გოგონა ისევ ჩვეული ენერგიით განაგრძობს ტრიუმფალურ სვლას ეკრანზე.
