გიორგი კვირიკაშვილის მიერ საქართველოს პრემიერ-მინისტრის თანამდებობიდან გადადგომის შესახებ გაკეთებული განცხადება THE NEW YORK TIMES-ის გვერდზეც მოხვდა.
როგორც მაუწყებელი წერს, კვირიკაშვილმა აღნიშნული გადაწყვეტილება მმართველი პარტიის დამფუძნებელთან და ქვეყნის უმდიდრეს კაცთან უთანხმოების მოტივით მიიღო.
მაუწყებელი ასევე აღნიშნავს, რომ პრემიერის მიერ გადადგომის შესახებ განცხადების გაკეთებას წინ უძღოდა ანტი სამთავრობო საპროტესტო აქციები დედაქალაქში.
„გასული თვეების განმავლობაში განსხვავებული შეხედულებები გვქონდა მე და პარტიის ლიდერს“, _ განაცხადა კვირიკაშვილმა და ზუსტი მიზეზები არ დააკონკრეტა_ „დღეს არის დრო, როცა პარტიის ხელმძღვანელს უნდა მიეცეს შესაძლებლობა საკუთარი შეხედულებების საფუძველზე ჩამოაყალიბოს გუნდი“.
როგორც THE NEW YORK TIMES წერს, ივანიშვილმა მაისში განაცხადა, რომ პოლიტიკაში ბრუნდებოდა საქართველოში, ყოფილ საბჭოთა რესპუბლიკაში, რომელიც რუსეთსა და თურქეთს შორის, კავკასიის მთებში მდებარეობს.
ივანიშვილი, ბიზნესმენი, მმართველი პარტიის თავმჯდომარედ იქნა არჩეული, რომელიც თვითონ დააარსა.
საბჭოთა კავშირის დაშლის შემდეგ ივანიშვილმა რუსეთში საბანკო და საინჟინრო ინდუსტრიაში მილიარდები იშოვნა. 2012 წელს მან საკუთარი პარტია დააარსა საქართველოში, რომელმაც იმავე წელს საპარლამენტო არჩევნებში მიხეილ სააკაშვილის „ერთიანი ნაციონალური მოძრაობა“ დაამარცხა.
ივანიშვილი პრემიერ-მინისტრი გახდა, თუმცა განზე გადგა დიდი ხნის ბიზნეს პარტნიორის, ირაკლი ღარიბაშვილის სასარგებლოდ, 2013 წელს.
მისი ქონება საქართველოს მთლიანი შიდა პროდუქტის ერთ მესამედს შეადგენს. ივანიშვილი პოლიტიკას მისი ფუტურიასტული სასახლიდან აკონტროლებს, რომელიც ერთ-ერთ ფერდობზე დგას და თბილისს გადაჰყურებს.
პარტიის ყრილობაზე სიტყვით გამოსვლისას ივანიშვილმა პოლიტიკაში დაბრუნების მიზეზად ეკონომიკური განვითარების დაბალი დონე, პარტიასთან უთანხმოება და მისი ოპონენტების მტრული დამოკიდებულება დაასახელა.
ოლესია ვართანიანის, თბილისში დაფუძნებული საერთაშორისო კრიზისების ჯგუფის ანალიტიკოსის თქმით, ივანიშვილის პოლიტიკაში დაბრუნება და პროტესტიც, საზოგადოების მიერ მთავრობის მიმართ ნდობის შემცირებას უკავშირდება.
„საქართველოს ხელისუფლება საკმაოდ დიდი ხანია კრიზისშია. ივანიშვილის დაბრუნებაც და აქციებიც ამის სიმპტომებია“,_განაცხადა მან.
როგორც მაუწყებელი წერს, პროტესტის ერთი ტალღა, დეკემბერში, ჩხუბის დროს 2 მოზარდის ცივი იარაღით მკვლელობით არის პროვოცირებული. დაღუპული 16 წლის ბიჭებიდან, ერთ-ერთის მშობელი, ზაზა სარალიძე ქვეყნის პროკურორებს თავდამსხმელების დაცვაში ადანაშაულებს.
ზაზა სარალიძე დემონსტრაციას მაისის ბოლოდან მართავს, პარლამენტის წინ კარვებიც განათავსა და პერიოდულად თბილისის მთავარ გამზირსაც კეტავს.
ქვეყნის მთავარი პროკურორი იძულებული გახდა გადამდგარიყო, მაგრამ აქციის მონაწილეები პრემიერ-მინისტრის გადადგომასაც ითხოვდნენ.
მაისის დასაწყისიდან თბილისი სხვადასხვა სახის აქციების სცენა იყო. ათასობით ახალგაზრდა პარლამენტის წინ 2 ღამის კლუბში პოლიციის მიერ რეიდის გახორციელებას აპროტესტებდა. თუმცა, პოლიტიკური სლოგანების ყვირილის ნაცვლად აქციაზე ტექნო მუსიკაზე ცეკვავდნენ.
