თბილისის მუნიციპალიტეტის მთავრობის სხდომაზე, კახა კალაძე სოციალურ ქსელში გავრცელებულ ვიდეოს გამოეხმაურა, სადაც ლეკვი მკვდარ ძაღლებთან იყო მოთავსებული.
მან ასევე არასამთავრობო ორგანიზაციების მიერ შანტაჟზე და ცხოველთა მონიტორინგის სააგენტოს მიზანმიმართულ დისკრედიტაციაზე ისაუბრა.
„არ შემიძლია არ გამოვეხმაურო სოციალურ ქსელში გავრცელებულ ამაზრზენ კადრებს, რომელიც ნიშანია იმისა, რომ ხდება ცხოველთა მონიტორინგის სააგენტოს მიზანმიმართული დისკრედიტაცია, ხოლო მეორეს მხრივ ფაქტია, რომ საქმე გვაქვს სისხლის სამართლის დანაშაულთან. გამოძიება უკვე დაწყებულია 259-ე მუხლით, თუმცა, მგონია რომ ეს მუხლი გადასახედია და კიდევ უფრო გასამკაცრებელია, რომ ამგვარი ფაქტები ავიცილოთ თავიდან. ვიმედოვნებთ, რომ მოკლე ხანში გამოვლინდება ყველა ის ადამიანი, რომელმაც ჩაიდინა ეს ამაზრზენი დანაშაული. უმწეო ლეკვი განათავსა მკვდარ ცხოველებთან და დაარღვია შიდა სანიტარული წესები“,_განაცხდა კალაძემ.
მან ასევე აღნიშნა, რომ ცხოველთა მონიტორინგის სამსახურში მიმდინარე რეფორმების, საკადრო პოლიტიკის და გადაწყვეტილებების შედეგად ზოგიერთ არასამთავრობო ორგანიზაციასთან ხელშეკრულება გაწყდა.
„გვესმის, რომ არის პრობლემები. თუმცა, ამასთანავე გამოვხატავთ მზაობას, რომ გავაკეთოთ რეფორმები, გავახორციელოთ ცვლილებები, თუ დამატებითი თანხებია გამოსაყოფი, ამაზეც უკან არ დავიხევთ. თუმცა, შანტაჟის ენით საუბარი კატეგორიულად მიუღებელია პირადად ჩემთვის და ჩემი თანაგუნდელებისთვის. საუბარი იყო იმასთან დაკავშირებით, რომ სააგენტოს მხრიდან მომხდარიყო პასპორტების შესყიდვა კონკრეტული არასამთავრობო ორგანიზაციებისგან, ასევე დასაქმების მოთხოვნა იყო სააგენტოში, ასევე წამლების შესყიდვა. ვისაც სურს წამლების გაყიდვა, ტარდება ტენდერი და შეგიძლიათ მიიღოთ მონაწილეობა და შანტაჟის ენით საუბარი კატეგორიულად მიუღებელია. შანტაჟის ენით ელაპარაკეთ იმათ, სადაც გაგდიოდათ ეგ საუბარი. თუმცა, კიდევ ერთხელ ვიმეორებ ჩვენ მზად ვართ თანამშრომლობისთვის“,_განაცხადა კალაძემ და აღნიშნა, რომ სოციალურ ქსელში გავრცელებული ვიდეოს გამოძიების საქმე პირად კონტროლზე აიყვანა.
„ეს მიდგომები დაიწყო ჯერ კიდევ მაშინ, როცა საუბარი იყო ტიფანიზე, ძაღლზე რომელიც წამოვიყვანე თავშესაფრიდან, რომ თითქოს ჩვენ ძალიან ცუდ პირობებში ვამყოფებდით ძაღლს და ამაზე ჰქონდათ მცდელობა წამოეწყოთ კაპმანია, თუმცა არ გამოუვიდათ, რადგან ყველამ იცის ჩემი დამოკიდებულება ცხოველებთან და განსაკუთრებით ძაღლებთან. მეორე დღეს უკვე გავრცელდა ეს ვიდეო კადრები. გამოძიება ყველაფერს დაადგენს, როგორ მოხვდა სოციალურ ქსელში, ვინ გადაიღო ეს ამაზრზენი კადრები, ვინ განათავსა ლეკვი მკვდარ ცხოველებთან და ა.შ.პირად კონტროლზე მყავს აყვანილი ეს საქმე, რომ ბოლომდე მივიყვანო და ყველა დამნაშავემ აგოს საკადრისი პასუხი“,_განაცხადა კალაძემ.
