რა შეცდომები დაუშვა ყოფილმა ხელისუფლებამ აგვისტოს ომის დაწყების წინ _ პოლიტიკოსთა ნაწილი აცხადებს, რომ აგვისტოს ომის მთავარი შემოქმედი მიხეილ სააკაშვილია.
დღეს, საქართველოს პრემიერ-მინისტრმა, მამუკა ბახტაძემ აგვისტოს ომის დაწყებაში საქართველოს ყოფილი პრეზიდენტი პირდაპირ არ დაადანაშაულა, თუმცა, ღიად განაცხადა, რომ მოსალოდნელი საფრთხის არიდება მაშინდელმა ხელისუფლებამ ვერ შეძლო.
,,ბევრი ევროპელი პოლიტიკოსი, მათ შორის, ჩვენი ამერიკელი მეგობრები აცხადებენ, რომ ჩვენი მეგობარი ქვეყნები აფრთხილებდნენ საქართველოს მაშინდელ ხელმძღვანელობას, რომ რუსეთი გეგმავდა საომარი ოპერაციების სცენარის გახორციელებას. სამწუხაროდ, მაშინდელმა ხელმძღვანელობამ იმის ნაცვლად, რომ თავიდან აერიდებინა მსგავსი მოვლენების განვითარება და დაეწყო ჩვენი მეგობარი ქვეყნების ჩართულობით პრევენციაზე ორიენტირება, ვერ შეუშალა ხელი რუსეთის მიერ დაგეგმილი სცენარის გახორციელებას საქართველოში. მათ ვერ აარიდეს ქვეყანას საფრთხე და მთელი ქვეყანა აღმოჩნდა კატასტროფულ სიტუაციაში“,_ განაცხადა ბახტაძემ.
სტრატეგიული კვლევების ცენტრის თავმჯდომარე და საგარეო საქმეთა ყოფილ მინისტრი, ირაკლი მენაღარიშვილი 2008 წლის აგვისტოს ომთან დაკავშირებით აცხადებს, რომ ჯერ კიდევ გამოსაკვლევია, რა შეცდომები დაუშვა ქართულმა მხარემ ომის დაწყების წინ, თუმცა, მენაღარიშვილი კატეგორიულად ემიჯნება აზრს იმის, შესახებ, რომ აგვისტოს ომი ქართულმა მხარემ დაიწყო.
,,მიმაჩნია, რომ 2008 წლის რუსეთ-საქართველოს ომის ბევრი ნიუანსი, მათ შორის, როგორ და რატომ ჩაება საქართველო ამ ომში, ჯერ კიდევ გამოსაკვლევია. რუსეთს იმედი ჰქონდა, რომ ამ ოპერაციით შეაჩერებდა საქართველოს სვლას ევროპული და ევროატლანტიკური ინტეგრაციის გზაზე, რაც პირდაპირ და ხმამაღლა განაცხადა მაშინდელმა პრეზიდენტმა, მედვედევმა, რომელმაც განკარგულება გასცა სამხედრო ოპერაციის დაწყების.
ის, თუ რა შეცდომა დაუშვა ქართულმა მხარემ, ქართულ მხარეს არ გამოუკვლევია, თუმცა, კატეგორიულად შემიძლია განვაცხადო, ომი წამოიწყო არა საქართველომ, არამედ ეს იყო რუსეთის მიერ დაგეგმილი და გახორციელებული სპეცოპერაცია“, _ გვითხრა მენაღარიშვილმა.
რაც შეეხება მმართველი გუნდის პოზიციას, დეპუტატები ერიდებიან საკუთარი პოზიციის დაფიქსირებას იმასთან დაკავშირებით, თუ რომელმა მახარემ წამოიწყო აგვისტოს ომი.
როგორც ,,ქართული ოცნება-კონსერვატორების“ თავმჯდომარე, გიგა ბუკია ,,გურია ნიუსთან“ აცხადებს, საკითხის ასე დაყენება არასწორია.
,,ომის დაწყება არ არის, თავისთავად, მნიშვნელოვანი. მთავარია, ვინ წააგო და როგორ დამთავრდა ომი. რუსეთთან საქართველომ ომი წააგო ისე, რომ ოკუპირებულ ტერიტორიებს დაემატა ახალგორი და სხვა ტერიტორიები. ეს უფრო მნიშვნელოვანია ჩემთვის. ამ საკითხზე უფრო ვიმსჯელებდი და არა იმაზე, თუ ვინ დაიწყო ომი“,_ გვითხრა ბუკიამ.
რუსეთ-საქართველოს ომი 5 დღის განმავლობაში გაგრძელდა.12 აგვისტოს კონფლიქტურმა მხარეებმა, ევროკავშირის თავმჯდომარის შუამდგომლობით, ცეცხლის შეწყვეტის შესახებ შეთანხმებას მიაღწიეს, რომელთა ვალდებულებები რუსეთის ფედერაციას შეუსრულებელი აქვს.
