ჩინური სამზარეულოს ნამდვილი შედევრია “გუმბაო”. მას ქათმის, ღორის ან ძროხის ხორცისგან ამზადებენ. საკმაოდ მარტივად მოსამზადებელი და სასარგებლო კერძია. დღეს მოვამზადოთ გუმბაო ქათმით.
მასალა: ქათმის ფილე _ 400-500 გრ; ცხარე წითელი წიწაკა ჩილი _ 2 ც; მწვანე ხახვი _ 5-6 ფოჩი; ერთი თავი ხახვი; წითელი ბულგარული _ 2 ც; შეგიძლიათ უყოთ ერთი ცალი პატარა ყაბაყიც; ნიორი _ 2 კბილი; ჯანჯაფილი _ 4 სანტიმეტრის ფესვი; 50 გრ. მიწის თხილი; მარილი გემოვნებით.
ქათმის მარინადისთვის საჭიროა: სოიოს სოუსი _ 2 ს/კ; კარტოფილის სახამებელი _1 ჩ/კ; თეთრი, მშრალი ღვინო _ 2 ს/კოვზი.
სოუსის მოსამზადებლად დაგვჭირდება: სოიოს სოუსი _ 3 ს/კ; შაქარი _ 2 ს/კ; კარტოფილის ან სიმინდის სახამებელი _ 1,5 ს/კ; ძმარი ბალზამირებული “ბალზამიკო” _ 40 მლ; ზეთი – 1 სუფრის კოვზი.
მომზადება: ქათმის ფილე დავჭრათ მოზრდილ ნაჭრებად, მოვაყაროთ სახამებელი და მოვასხათ სოიოს სოუსი, ღვინო. შევდოთ მაცივარში 40 წუთით.
სოუსის მასალა გადავურიოთ ერთმანეთს და დავაცადოთ, რომ კარგად გაიხსნას.
მარინადიდან ამოღებული ქათამი შევწვათ ცოტა ზეთში ყველა მხრიდან, ჩავაყაროთ მოხალული მიწის თხილი; გაცხელებულ ღრმა ტაფაში ჩავასხათ ცოტა ზეთი, დავაყაროთ დანით დაჭყლეტილი ნიორი, ცხარე წიწაკა ჩილი და წვრილად გახეხილი ჯანჯაფილი. რამდენიმეჯერ გადავურიოთ და დავაყაროთ მოზრდილ ნაჭრებად დაჭრილი ხახვი, 2-3 წუთის მერე კი _ ასევე დაჭრილი ბულგარული, ყაბაყი. ცეცხლზე ვაჩერებთ მაქსიმუმ, 5 წუთი _ ბოსტნეული ხრაშუნა უნდა იყოს. შევურევთ ამავე ტაფაზე თხილიან ქათამს, მოვასხამთ სოუსს და წამოვადუღოთ, რომ კარგად აერიოს მასალა და ოდნავ შესქელდეს. მოვაყრით რამდენიმე ნაწილად გაჭრილ მწვანე ხახვის ღეროებს. სუფრასთან მიგვაქვს ბრინჯის გარნირით.
