სოციალურ ქსელ „ფეისბუქის“ ერთ-ერთი მომხმარებელი პოსტს აქვეყნებს, სადაც ამბობს, რომ საქართველოს ფოსტის ჯიხურებში მარიხუანას მოსაწევი მოწყობილობა მიიტანეს და მის განთავსებას ვიტრინაში თვალსაჩინო ადგილებში გეგმავენ.
მისი თქმით, მომხდარი რეაგირების გარეშე არ უნდა დარჩეს.
„ამ დილით საქართველოს ფოსტის ჯიხურებში მარიხუანას მოსაწევი მოწყობილობა მიიტანეს და დაავალეს გამყიდველებს, რომ ვიტრინაში თვალსაჩინო ადგილზე უნდა დადონ. ეს უკვე ბოლო წვეთია. არავითარ შემთხვევაში რეაგირების გარეშე არ უნდა დარჩეს ეს ყველაფერი. ქუდზე კაცი უნდა გამოვიდეს ქუჩაში და უნდა აღვკვეთოთ ყოველი ქმედება, რომელიც ისედაც გადაშენების პირას მდგარი ქართველების მოსპობას ემსახურება. მივმართავ ყველა ჩემს მეგობარ ჟურნალისტს! ნუ დავიმალებით ჩირგვებში და ნუ შევუწყობთ ხელს ჩვენი ქვეყნის მიზანმიმართულ გენოციდს. ნუ დავღუპავთ მომავალ თაობას. გავერთიანდეთ და ყველაფერს შევძლებთ. უფალი დაგვეხმარება, რომ სწორი გზა ვიპოვოთ. ჩვენს ქვეყანას არა აქვს იმის რესურსი, რომ პლანის პლანტაციებს და მისგან გამოწვეულ პრობლემებს მოვერიოთ“,_წერს ის.
„გურია ნიუსი“ აღნიშნული ინფორმაციის გადასამოწმებლად „საქართველოს ფოსტას“ დაუკავშირდა.
კომპანიაში ჩიბუხის ტიპის მოწყობილობის შეტანას ადასტურებენ და როგორც ამბობენ, გადაჭრით იმის თქმა, რომ აქსესუარი კონკრეტულად მარიხუანას მოსაწევად გამოიყენება არ შეუძლიათ.
რაც შეეხება, მის ვიტრინებში თვალსაჩინო ადგილებში განთავსებას, თამბაქოს მოსაწევი აქსესუარების გამოჩენას კანონი არ კრძალავს.
„ვერ ვიტყოდით, რომ ეს კონკრეტულად მარიხუანას მოსაწევი მოწყობილობაა. ჩიბუხის ტიპის მოწყობილობაა, რომლითაც ნებისმიერი ტიპის თამბაქოს ნაწარმის მოწევაა შესაძლებელი. რაც შეეხება, გამყიდველებისთვის ვიტრინებში თვალსაჩინო ადგილას მისი განთავსების დავალებას, არასწორი ფორმულირებაა. ესენი გახლავთ, თამბაქოს ჯიხურები, სადაც იყიდება თამბაქოს ნაწარმი და შესაბამისად, მისი აქსესუარები. რადგან კანონი არ კრძალავს თამბაქოს მოსაწევი აქსესუარების თუნდაც, გამოსაჩენ ადგილებში განთავსებას, ამიტომ ის შესაძლებელია იყოს განთავსებული გამოსაჩენ ადგილას. აკრძალვა ეხება მხოლოდ თამბაქოს პროდუქციას“,_ამბობენ საქართველოს ფოსტაში.
