„კვირის პალიტრა“ ბიზნესმენ ვანო ჩხარტიშვილის სიგარეტის საიდუმლო სქემაზე წერს, რომლის მიხედვით, ჩხარტიშვილი ბიუჯეტში ათეულობით მილიონი ლარის გადახდას არიდებს თავს.
აღნიშნული სქემის მიხედვით ირკვევა, რომ თამბაქოს ბიზნესში ჩართული პირები ფილტრიან სიგარეტს უფილტროდ ასაღებენ, რაც ბიუჯეტში შესატანი თანხების მითვისებას უსვამს ხაზს.
გვსურს, მკითხველს შეახსენოთ, რომ რამდენიმე დღის წინ „საქართველოს თამბაქოს აქციონერი“ ირაკლი ჩუბინიშვილისა და „ომეგა ჯგუფის“ დამფუძნებლის ზაზა ოქუაშვილის მონაწილეობით აუდიოჩანაწერი გავრცელდა, რომლის მიხედვით ირკვევა, რომ ფინანსთა ყოფილი მინისტრი დიმიტრი ქუმსიშვილი თამბაქოს მწარმოებლების 26 მილიონი ლარით დაჯარიმებას გეგმავდა, თუმცა ყოფილი პრემიერის, ბიძინა ივანიშვილის ჩარევით აღნიშნული ვეღარ გახორციელდა.
_ რა კავშირი აქვს ბიძინა ივანიშვილს ვანო ჩხარტიშვილთან და ქვეყნის პირველი პირები აფარებენ თუ არა ხელს ვანო ჩხარტიშვილის უკანონო საქმიანობას? _,,გურია ნიუსთან“ ექსპერტები და პოლიტიკოსები საუბრობენ.
ექსპერტი კავკასიის საკითხებში მამუკა არეშიძე კანონის უზენაესობაზე საუბრობს და აცხადებს, რომ კანონის დამრღვევმა ყველა პირმა, მათ შორის, ვანო ჩხარტიშვილმაც შესაბამისი პასუხი უნდა აგოს.
_ ივანიშვილს არ ვიცავ, მაგრამ ამ შემთხვევაში ყოფილი პრემიერი ჩხარტიშვილს ხელს არ დააფარებდა. მგონია, რომ ხელი სხვა ადამიანებმა დააფარეს ან საგადასახადოში ან ფინანსთა სამინისტროში.
თავის დროზე ბიძინა ივანიშვილსა და ჩხარტიშვილს ჰქონდათ ძალიან თბილი ურთიერთობა, მაგრამ შემდეგ მათი გზები გაიყარა. ახლა, როგორც ამბობენ, ისევ დაუახლოვდნენ ერთმანეთს.
დარწმუნებული ვარ, რომ ეს ინფორმაცია არის სიმართლე და კანონი ყველა ადამიანზე ერთნაირად უნდა ვრცელდებოდეს.
თუ ოქუაშვილი იმისთვის ისჯება, რომ გადასახადებს არ იხდის სახელმწიფო ხაზინაში, მაშინ დაისაჯოს კანონის დამრღვევი ყველა პირი, მათ შორის, ვანო ჩხარტიშვილიც“, _გვითხრა არეშიძემ.
ვანო ჩხარტიშვილის ბინესსაქმიანობაში კითხვის ნიშნებს ხედავს „ქართული ოცნების“ ყოფილი წევრი დავით ჭიჭინაძე.
როგორც ჭიჭინაძე აცხადებს, ჩხარტიშვილი არაკანონიერი გზით თამბაქოს ბიზნესში არის ჩართული.
_ ჩხარტიშვილი რომ სიგარეტთან არის დაკავშირებული ყველამ იცის, რაც რთულ ვითარებაზე მიუთითებს. მისი წარსულიდან და საქმიანობიდან გამომდინარე, ამ ადამიანთან ყოველთვის ნეგატიური დამოკიდებულება მქონდა.
პარტიის თავმჯდომარეს რაც შეეხება, თუ იქნება გარკვეული მასალები, პასუხის გაცემა ლონდონის სასამართლოში მოუწევს.
ვანო ჩხარტიშვილს ერთი სიკეთე არ გაუკეთებია. მახსოვს ხმამაღალი განცხადებები, რომ სააკაშვილთანაც გარიგებული იყო, პატარკაციშვილთანაც და ვფიქრობ, რომ ნებისმიერი ხელისუფლებისთვის მასთან კავშირის დაჭერა სამარცხვინო საქციელია“, _ განაცხადა ჭიჭინაძემ.
ზემოთ ხსენებული აუდიოჩანაწერის ავთენტურობის დადგენის შემთხვევაში, გამოდის, რომ ვანო ჩხარტიშვილმა მაღალჩინოსნების დახმარებით ბიუჯეტში შესატანი 26 მილიონი ლარის გადახდას აარიდა თავი.
ჩანაწერების ავთენტურობას არ ადასტურებს ვანო ჩხარტიშვილის ადვოკატი ზაზა ხატიაშვილი. მისი თქმით, ლონდონის ექსპერტიზის ბიურომ ჩანაწერების ავთენტურობა არ დაადასტურა.
„ლონდონის ექსპერტიზის ბიუროს „აუდიო ფორენზიქ სერვისიზის“ 2018 წლის 01 ოქტომბრის დასკვნის თანახმად, სამივე ჩანაწერი, სადაც ფიგურირებს ვანო ჩხარტიშვილი, ხელით არის მანიპულირებული, გადაკეთებული ან დამონტაჟებული. სამივე ჩანაწერი იძლევა ძალზე მყარ საფუძველს იმის სათქმელად, რომ აუდიოჩანაწერებზე აღინიშნება წყვეტა.
განსაკუთრებით საგანგაშოა ის ფაქტი, რომ ერთ-ერთ 02.06-წუთიან ფარულ ჩანაწერში, სადაც ასახულია ვანო ჩხარტიშვილის, ზაზა ოქუაშვილისა და ირაკლი ჩუბინიშვილის დიალოგი, აღინიშნება 7 სხვადასხვა ჩანაწერის გამოყენება და 6 მონტაჟი, რაც რეკორდული მიგნებაა ქართულ სატელევიზიო სივრცეში“, _აღნიშნავს ხატიაშვილი.
რა სამართლებრივი რეაგირება ექნება აღნიშნულ საქმეს ქართულ მართლმსაჯულებაში და კანონის დარღვევის შემთხვევაში, მოუწევს თუ არა ჩხარტიშვილს პასუხისგება სამართლებრივად, ჯერჯერობით, უცნობია.
