,,ქართული ოცნების“ მხარდაჭერილი საპრეზიდენტო კანდიდატის სალომე ზურაბიშვილის შემომწირველთა სია ბოლო დღეების განმავლობაში საგრძნობლად გაიზარდა.
საპრეზიდენტო კანდიდატს ქველმოქმედმა მოქალაქეებმა 1-3 ოქტომბერს, ჯამში, მილიონამდე ლარი შესწირეს.
ზურაბიშვილის შემომწირველთა შორის არიან ადამიანები, რომლებმაც, თავის დროზე, თანხა ,,ნაციონალურ მოძრაობას“ გადაურიცხეს:
სამშენებლო კომპანია “ბაკურიანი ბიზნეს გრუპისა” და შპს „კრისტალსერვისის“ დირექტორმა და პარტნიორმა ვლადიმერ სტეფანიანმა, რომელმაც 2012 წელს “ნაციონალურ მოძრაობას” 2 500 ლარი შესწირა, წელს სალომე ზურაბიშვილი 60 ათასი ლარით დააფინანსა.
ბიზნესმენმა, შპს ,,კასა ჯის“ დირექტორმა დავით შენგელიამ 2012 წელს 60 ათასი ლარი ,,ნაციონალურ მოძრაობას“ გადაურიცხა, წელს კი ამავე რაოდენობის თანხა (60 ათასი ლარი) _ სალომე ზურაბიშვილს.
ბიზნესმენს თანხის შეწირვა არც ,,ქართული ოცნებისთვის“ დაუკლია.
დავით შენგელიამ 2017 წელს პარტია ,,ქართული ოცნების“ ყულაბაში 55 ათასი ლარი გადარიცხა.
შპს „სიფუდ გრუპის“ დირექტორმა გიორგი ქსოვრელმა 2012 წელს “ნაციონალურ მოძრაობას” 60 ათასი ლარი შესწირა, წელს სალომე ზურაბიშვილს კი 60 ათასი ლარი ჩაურიცხა.
ავთანდილ გულიკაშვილმა, რომელმაც 2012 წელს „ნაციონალურ მოძრაობა“ 18 ათასი ლარით დააფინანსა, წელს ზურაბიშვილს 60 ათასი ლარი გადაურიცხა.
2017 წელს კი მან “ქართულ ოცნებას” 50 ათასი ლარი შესწირა.
გაიზრდება თუ არა ყოფილი სახელისუფლებო ძალის შემომწირველთა სია სალომე ზურაბიშვილის „საარჩევნო ყულაბაში“, ჯერჯერობით, უცნობია.
აღსანიშნავია, რომ სალომე ზურაბიშვილის შემომწირველთა შორის არის ბიძინა ივანიშვილის ძმა ალექსანდრე ივანიშვილი, რომელმაც საპრეზიდენტო კანდიდატს 45 000 ლარი შესწირა.
თბილისის მერმა კახა კალაძემ კი 1-ელ ოქტომბერს ზურაბიშვილს 50 000 ლარი გადაურიცხა.
