“თუ ყურადღებას არ მოგვაქცევენ, ჩვენ შემდგომი რეაქცია იქნება ისეთი, რაც მთავრობას არ ესიამოვნება. კატეგორიულად გთხოვთ, მოგვხედოთ!” _ ასეთია ლანჩხუთის მუნიციპალიტეტის სოფელ სუფსაში მცხოვრები ნინო დუმბაძის პოზიცია, რომელიც მეზობლების სახელით ხმამაღლა საუბრობს იმ გაუსაძლის მდგომარეობაზე, რაც მათ ქუჩაზეა შექმნილი.
გზა, რომელიც სუფსას ღრმაღელესთან აკავშირებს და რომლითაც სისტემატურად სარგებლობენ მძიმეწონიანი მანქანები, ადგილობრივთა ინფორმაციით, უკიდურესად მძიმე მდგომარეობაშია და აქ ცხოვრება დღითიდღე გაუსაძლისი ხდება.
“უკვე აღარაა საუბარი იმაზე, რომ ყოველი გაწვიმებისას ქუჩა წყლით იფარება და ეზოები გვეტბორება. ამ გზით სისტემატურად სარგებლობენ ასფალტის ქარხნიდან მომავალი მძიმეწონიანი მანქანები, აქეთ, ასევე, ჩინური კომპანიის კუთვნილი ეზოებია. ისეთ დღეში ვართ ჩავარდნილები, რომ გზის კაპიტალურ გაკეთებას ვინღა ამბობს, ის მაინც გააკეთონ, რომ ყოველდღიურად მორწყონ ქუჩა, რომ მტვერსა და ბუღში არ დავიხრჩოთ პაპანაქება სიცხეში. ვეღარ ვსუნთქავთ ამ მტვერსა და ბუღში. ეს საკითხი მაინც მოგვიწესრიგოს ადგილობრივმა ხელისუფლებამ”, _ ითხოვენ სუფსაში, რკინიგზის მიმდებარე ქუჩაზე მცხოვრებლები.
მოსახლეობის მხრიდან გამოთქმულ უკმაყოფილებას ეთანხმება და მათი რეაქცია მართებულად მიაჩნია სუფსის მაჟორიტარ დეპუტატს ჯუმბერ ბლაგიძეს, რომელიც გზის ამ მონაკვეთზე შექმნილ მდგომარეობას გაუსაძლისად მიიჩნევს:
“სწორია მოსახლეობის რეაქცია _ გაუსაძლისი მდგომარეობაა ამ ქუჩაზე. რამდენი ხანია ვითხოვ ამ საკითხის მოწესრიგებას, მაგრამ ამ დრომდე არაფერია. რაც მუნიციპალიტეტში კეთილმოწყობის სამუშაოები ჩატარდა და რკინა-ბეტონის არხები გაკეთდა. ყველაფერი აქ არსებულ ასფალტის ქარხანაშია გაკეთებული. 11-კილომეტრიანი გზის მონაკვეთი რომ დაიგო ჩოჩხათი-გულიანი-სუფსის მონაკვეთზე და ქალაქში მილიონი ლარის ღირებულების ინფრასტრუქტურული სამუშაოები რომ ხორციელდება ამ ქარხნიდან გატანილი მასალით, 500 მეტრის სიგრძის გზის მოწესრიგება არ უნდა წარმოადგენდეს პრობლემას.
ხალხი ისეთ დღეშია ჩავარდნილი, გზის კაპიტალურ მოწესრიგებას ვინ ამბობს, ქუჩის მორწყვაზეც თანახმა არიან. ისე, რამდენჯერმე დაგვპირდნენ, რომ გზა მოირწყვებოდა, მაგრამ პირობა აქამდე არ შესრულებულა, ამიტომაც გახდა მოსახლეობა იძულებული საკუთარი უკმაყოფილება ხმამაღლა დაეფიქსირებინა”, _ ამბობს ჯუმბერ ბლაგიძე, რომლის მოსაზრებით, პრობლემის მოსაგვარებლად გამგეობის შესაბამისი სამსახურების მხრიდან მეტი ძალისხმევა და მონდომებაა საჭირო.
ლანჩხუთის გამგეობაში კი ამ საკითხთან დაკავშირებით გვპასუხობენ, რომ მუნიციპალიტეტის მასშტაბით ეტაპობრივად მიმდინარეობის გზების რეაბილიტაცია და შესაბამისად, გზის აღნიშნული მონაკვეთიც მოწესრიგდება. თუმცა, როდის, ამაზე კონკრეტული პასუხი გამგეობის ინფრასტრუქტურის სამსახურში არ აქვთ.
