საქართველოს რეგიონული განვითარებისა და ინფრასტრუქტურის სამინისტროს მუნიციპალური განვითარების ფონდმა, სკოლების მშენებლობასთან დაკავშირებით, ღია კარის დღე გამართა და სამშენებლო კომპანიებს გამოსაცხადებელი ტენდერები წინასწარ წარუდგინა.
ფონდი 22 მუნიციპალიტეტში 27 სკოლის მშენებლობას იწყებს. პროექტი საქართველოს მთავრობის დაფინანსებით ხორციელდება და მისი ღირებულება, დაახლოებით, 68 მილიონი ლარია.
როგორც “გურია ნიუსისთვის” გახდა ცნობილი, 22 მუნიციპალიტეტიდან გურიის ორ მუნიციპალიტეტში _ ჩოხატაურში და ოზურგეთში, კერძოდ, სოფლებში: გუთურსა და შრომაში (ეკალდიდში) სკოლების მშენებლობა წელს დაიწყება.
გარდა 27 სკოლისა, მუნიციპალური განვითარების ფონდს 2019-2020 წლებში ევროპის საბჭოს ბანკის (CEB) და სკანდინავიურ გარემოს საფინანსო კორპორაციის (NEFCO) დაფინანსებით 31 სკოლის (სია მომავალ კვირას იქნება დაზუსტებული, რომელსაც “გურია ნიუსი” მკითხველს ოპერატიულად მიაწოდებს) რეაბილიტაცია და ენერგოეფექტურობის კომპონენტის გაძლიერება აქვს დაგეგმილი. ასევე, საქართველოს მთავრობის დაფინანსებით დაგეგმილია ათეულობით სკოლის რეაბილიტაცია, მათ შორისაა ადიგენის მუნიციპალიტეტში სოფელ ზარზმისა და მოხის საჯარო სკოლების რეაბილიტაცია.
როგორც მინისტრმა მაია ცქიტიშვილმა განაცხადა, სკოლების ინფრასტრუქტურული საჭიროებები შესწავლილია მთელ საქართველოში, მათი რეაბილიტაცია იგეგმება მაღალმთიან რეგიონებშიც:
“განათლების სამინისტროსთან მჭიდრო თანამშრომლობით შევარჩიეთ ის რეგიონები, სადაც საჭიროა ახალი სკოლების მშენებლობა, ან მათი კაპიტალური შეკეთება. სამწუხაროდ, რამდენიმე სოფლიდან ბავშვებს უწევთ ერთ სკოლაში სიარული. ვცდილობთ, რომ ჩვენი გეოგრაფიული დაფარვა იყოს მაქსიმალურად უზრუნველყოფილი, რადგან ყველა რეგიონს სჭირდება სკოლა. მაღალმთიანი რეგიონები ჩვენი ყურადღების ცენტრშია, სკოლების რეაბილიტაციაც და ახალი სკოლების მშენებლობაც ყველა რეგიონს შეეხება”, _ აღნიშნა მაია ცქიტიშვილმა.
“გურია ნიუსი” დაინტერესდა, შენდება თუ არა 2019 წელს ნასაკირალის საჯარო სკოლა. როგორც ცნობილია, შენობა არასახარბიელო მდგომარეობაშია და ასევე, გასულ წელს ბათქაში ჩამოვარდა სკოლის ერთ-ერთ ოთახში.
“გულდასაწყვეტი ფაქტია, რომ ნასაკირალის სკოლის რეაბილიტაციის საკითხი მხოლოდ არჩევნების დროს არის აქტიური. როგორც ჩემთვისაა ცნობილი, წელს არ იგეგმება იმ შენობის სარეაბილიტაციო სამუშაოების ჩატარება, რომელშიც მიმდინარეობს სასწავლო პროცესი. არადა, ყველამ კარგად იცის, რომ ძალიან მძიმე სიტუაცია. ამ სკოლის თემას ძალიან სამარცხვინოდ იყენებენ არჩევნების დროს. სანამ სავალალო შედეგი არ დადგება, მანამდე, ალბათ, ყურადღებას არავინ მიაქცევს.
მაქვს ინფორმაცია, რომ მშობლებს გადაჰყავთ შვილები სხვა სკოლებში, რადგან ეშინიათ, რაიმე არ მოხდეს. შენობა ან უნდა გარემონტდეს ან ახალი აშენდეს, მაგრამ ეს როდის მოხდება, არ ვიცი”, _ ამბობს ჩვენთან საუბრის დროს ოზურგეთის მუნიციპალიტეტის საკრებულოს და “ერთიანი ნაციონალური მოძრაობის” წევრი ბესო ქათამაძე.
ოზურგეთის საგანმანათლებლო რესურსცენტრის უფროსის, ლელა იმედაშვილის თქმით, ნასაკირალის სკოლის პროექტი 2019 წელს გაკეთდება, რის შემდეგ დაიწყება აქტიური მუშაობა:
“2019 წელს მოხდება პროექტირება მშენებლობის და შემდეგ დაიწყება მშენებლობა”, _ თქვა ლელა იმედაშვილმა.
კითხვაზე _ ტოვებენ თუ არა სკოლას მოსწავლეები იმას გამო, რომ იქ არასახარბიელო მდგომარეობაა, იმედაშვილი გვპასუხობს, რომ ნასაკირალის სკოლა სხვა სკოლებზე უარეს მდგომარეობაში არ არის:
“ჩვენთვის ცნობილი არ არის, რომ განსაკუთრებული გადინებაა ნასაკირალის სკოლიდან. ეს სკოლა არის არასახარბიელო მდგომარეობაში, მაგრამ არაფრით სხვაზე უარეს მდგომარეობაში”, _ თქვა “გურია ნიუსთან” საუბრის დროს ლელა იმედაშვილმა.
ბავშვების სკოლიდან გადინების შესახებ ინფორმაციას არ ადასტურებს ნასაკირალის სკოლის დირექტორის მოვალეობის შემსრულებელი ზაზა ცეცხლაძე:
“პირიქით, 2018 წელს სამი ბავშვი მოგვემატა. სკოლიდან მოსწავლეების წასვლას არ ვადასტურებ”, _ აღნიშნა საუბრის დროს ზაზა ცეცხლაძემ.
მისივე თქმით, ზუსტად არ იცის, როდის დაიწყება სკოლის ახალი შენობის მშენებლობა:
“2018 წელს გავიგე მედიით, რომ წელს დაიწყებოდა ახალი სკოლის მშენებლობა, _ სხვა ინფორმაცია არ მაქვს. შემიძლია გითხრათ ის, რომ დღეს დაიწყო საპირფარეშოს მშენებლობა და მოწესრიგება”, _ თქვა ზაზა ცეცხლაძემ.
ოზურგეთის მუნიციპალიტეტის მერიის პრესსამსახურის უფროსის, ეკატერინე მგელაძის მიერ მოწოდებული ინფორმაციით, “საქართველოს მთავრობის განკარგულებით, ოზურგეთის მუნიციპალიტეტის 4 საჯარო სკოლის რეაბილიტაციისთვის გამოყოფილია 64 730 ლარი, აქედან დელეგირებული უფლებით, ნასაკირალის საჯარო სკოლაში სველი წერტილის მოწყობაზე 48 500 ლარი დაიხარჯება”.
