“ქართულმა ოცნებამ” მთაწმინდის ოლქში მაჟორიტარ კანდიდატად ექიმი ლადო კახაძე წარადგინა.
ლადოს კარგად იცნობს ყველა და წარდგენა რეალურად არ სჭირდება. დარწმუნებული ვართ, რომ ის გაამდიდრებს საქართველოს პარლამენტს“, – ეს განცხადება საქართველოს პარლამენტის თავმჯდომარემ, ირაკლი კობახიძემ მთაწმინდის მაჟორიტარი დეპუტატობის კანდიდატის შეფასებისას გააკეთა.
კობახიძე დარწმუნებულია, როომ მმართველი გუნდი შუალედურ არჩევნებზე დამაჯერებელ გამარჯვებას მოიპოვებს.
მისი თქმით, მაჟორიტარობის და მერობის კანდიდატებთან დაკავშირებით გუნდში საკმაოდ დიდხანს მიმდინარეობდა მსჯელობა და ეს მხოლოდ პოლიტიკაში დაბრუნებული ირაკლი ღარიბაშვილის გადაწყვეტილება არ იყო.
ლადო კახაძე ამბობს, რომ მან შეთავაზება “ქართული ოცნების ოჯახიდან” მიიღო:
“ჩემთვის განსაკუთრებული პატივია, განსაკუთრებული ქალაქის, მისი ასევე გამორჩეული ერთ-ერთი ულამაზესი რაიონის მაჟორიტარობა და აქ დაგროვილი პრობლემატიკის საკანონმდებლო სივრცეში მიტანა.
თბილისი არის განსაკუთრებული ქალაქი, როგორც მოსახლე პოპულაციით, ასევე იმ პრობლემატიკით, რომელიც უძველეს ქალაქს უდგას. ჩვენ მოწოდებული ვიქნებით ყველანი ერთმანეთთან შევიდეთ პოლემიკაში და ეს პოლემიკა იყოს გამართული იმ ენაზე მოუბარი, რომელსაც მოსახლეობა კარგად აღიქვამს.
მოსახლის სატკივარის, სწორი ტრასფორმირება მოხდება საკანონმდებლო სივრცეში. ამ დიდებულ ქალაქში ძალიან ბევრი მეგობარი და ახლობელი მყავს. მართალი გითხრათ პირადად ბატონ ბიძინას ასეთი სითბოთი არ ვიცნობდი, როგორც დღეს გამოვლინდა და კიდევ ერთხელ დადასტურდა, რომ ჩვენ იმ თაობის წარმომადგენლები ვართ, რომელსაც ჯერ კიდევ მშობლების პატივისცემა და წინაპრების მიმართ დიდი კდემა არ დაგვიკარგავს და განსაკუთრებული მზრუნველობა შვილებისა და შვილიშვილების მიმართ“, _ განაცხადა კახაძემ წარდგენის შემდეგ და აღნიშნა, რომ შემოთავაზება მიიღო “ოჯახისგან, რომელსაც ჰქვია „ქართული ოცნება“.
ლადო კახაძე 1998-2002 წლებში თბილისის საკრებულოს თავმჯდომარე იყო.
2016 წელს კი პაატა ბურჭულაძის ბლოკის _ “სახელმწიფო ხალხისთვის” სახელით მთაწმინდის ოლქში იყარა კენჭი, სადაც ხმა მხოლოდ 618 ამომრჩეველმა (2.65%) მისცა.
ეს მაშინ, როცა მისმა კონკურენტმა გრიგოლ ბარამიძემ, რომელიც ნინო ბურჯანაძის პარტიიას წარმოადგენდა 1002 ხმა მიიღო; “პატრიოტთა ალიანსის” კანდიდატმა ლადო სადღობელაშვილმა 1224 ხმა; “თავისუფალი დემოკრატების” კანდიდატმა ნიკოლოზ ფრუიძემ 1558 ხმა.
ერთი სიტყვით, 2016 წელს კახაძეს მთაწმინდაზე მისმა ყველა კონკურეტმა აჯობა. თუმცა, როგორც ჩანს ეს “ქართული ოცნებისთვის” არაფრის მთქმელია.
მმართველი გუნდისთვის, როგორც ირკვევა პრობლემას არც ის წარმოადგენს, რომ 2016 წელს კახაძე ბურჭულაძის პარტიას აფინანსებდა და მას 60 000 ლარი შესწირა.
მთაწმინდის ოლქში შუალედური არჩევნები 19 მაისს გაიმართება. მთაწმინდის მაჟორიტარულ ოლქში შუალედური არჩევნების ჩატარება მას შემდეგ გახდა საჭირო, რაც სალომე ზურაბიშვილი პრეზიდენტი გახდა.
