საკრებულოს სხდომა ორიგინალური მილოცვებით

5 ივნისს, ოზურგეთის მუნიციპალიტეტის საკრებულოს მორიგი სხდომა შედგა, სადაც დღის წესრიგით გათვალისწინებული 12 საკითხი განიხილეს. აქედან შვიდი საკითხი განკარგულების მიღებას, ოთხი საჯარო ადმინისტრაციული წარმოების დაწყებას, ორი კი საკრებულოს მიერ ცნობად მიღებას ეხებოდა.

დეპუტატმა ეროდი გორდელაძემ ოზურგეთის მუნიციპალიტეტის საკრებულოს წევრის დავით მდინარაძის უფლებამოსილების ცნობის შესახებ, განკარგულების თაობაზე ისაუბრა.

_ 19 მაისს ჩატარდა შუალედური არჩევნები, რის შემდეგაც ოზურგეთის საკრებულოს, გამოკლებული წევრის ნაცვლად, შეემატა ღირსეულად გამარჯვებული კანდიდატი _ ექიმი დავით მდინარაძე.  კიდევ ერთხელ მივულოცოთ მას გამარჯვება და ვუსურვოთ წარმატებები, _ თქვა გორდელაძემ, რასაც საკრებულოს დეპუტატთა მხრიდან ტაში მოჰყვა.

თავის მხრივ, დავით მდინარაძემ მადლობა გადაუხადა კოლეგებს და თქვა, რომ პირობა, რომელიც დადეს, უნდა შესრულდეს:

_ ვიყოთ ერთად და ვაკეთოთ საქმე, რომელიც წარმატებას მოუტანს ოზურგეთის ცხოვრებას, _ განაცხადა მან.

მილოცვებს შეუერთდა ლეიბორისტი დეპუტატი დავით მამალაძე:

_ პიროვნულად ვულოცავ პატივცემულ დავით მდინარაძეს _ მისი საწინააღმდეგო არაფერი მაქვს. ისე, კი, ბატონო დავით, გენერალი კუზნეცოვი რომ გაცოცხლდეს, როგორც ის ვერაფერს უშველიდა “ტიტანიკს”, რომ არ ჩაძირულიყო, ისე თქვენც ვერაფერს უშველით “ქართულ ოცნებას”, _ თქვა მან.

_ აი, თქვენ გაიხარეთ, თქვენ, _ მიუბრუნდა მამალაძეს “ოცნების” დეპუტატი, ოზურგეთის თეატრის სამხატვრო ხელმძღვანელი ვასილ ჩიგოგიძე.

ეროდი გორდელაძემ, ასევე, წარმოადგინა საკითხი ოზურგეთის მუნიციპალიტეტის საკრებულოს ფრაქცია “ერთიანი ნაციონალური მოძრაობის” თავმჯდომარის არჩევის შესახებ.

_ “ერთიანი ნაციონალური მოძრაობიდან” შემოვიდა განცხადება, რომ მათი ფრაქციის თავმჯდომარედ კვლავ არჩეულია დავით მჟავანაძე, ბესო ქათამაძის ნაცვლად. მასაც ვულოცავთ, _ თქვა გორდელაძემ, რასაც დეპუტატები ტაშის გარეშე შეუერთდნენ.

_ ვულოცავ დავით მჟავანაძეს და კარგი იქნება, მეტს თუ აღარ მიმალოცინებს, _ ასე გამოხატა თავისი გულისთქმა “ქართული ოცნების” დეპუტატმა გოჩა კილაძემ.

საფინანსო სამსახურის წარმომადგენელმა პავლე ჭყონიამ ოზურგეთის მუნიციპალიტეტის 2019 წლის ბიუჯეტის შესრულების პირველი კვარტლის ანგარიშის მიმოიხილა. მან დეტალურად ისაუბრა პირველ კვარტალში გახორციელებულ ორ ცვლილებაზე _ ცვლილება შევიდა სოციალური პროგრამებიდან დახმარების გაცემის წესში ისე, რომ ბიუჯეტი არ გაზრდილა და ბიუჯეტი გაიზარდა მხოლოდ 2018 წლიდან გარდამავალი ნაშთებით და საქართველოს მთავრობის განკარგულებით გამოყოფილი თანხებით _ შემოსავლების და გადასახადების ნაწილში გაზრდილია 16 154 702,43 ლარით.

დეპუტატმა ეროდი გორდელაძემ დასვა კითხვა, თუ რამდენი პროცენტია ათვისებული კვარტალში სარეზერვო ფონდიდან, რაზეც ჭყონიამ უპასუხა, რომ ეს რიცხვი, დაახლოებით, 340 ათასი ლარია.

დეპუტატმა ლავრენტი ბიგვავამ დასვა ლოგიკური კითხვა: “კვარტალური გაწერაც გაქვთ? თუ ასეა, კარგია. თუ გაქვთ კვარტალში ფაქტობრივი მაჩვენებელი?” თუმცა, ჭყონიამ ამ კითხვაზე დაზუსტებული პასუხი ვერ გასცა.

დეპუტატები მოწონებით შეხვდნენ საკითხს ოზურგეთში, დოლიძის ქუჩაზე 380 კვ.მ. არასასოფლო-სამეურნეო დანიშნულების მიწის ნაკვეთის სარგებლობის უფლებით გადაცემაზე ოზურგეთის მუნიციპალიტეტის მერისთვის თანხმობის მიცემაზე.

საკითხი ეკონომიკის სამსახურის უფროსმა ალეკო მამეშვილმა წარმოადგინა.

მომხსენებელმა განმარტა, რომ ამ ტერიტორიაზე აიგება შენობა იურიდიული მომსახურებისთვის, რომელიც მოწყვლად ჯგუფებს, მათ შორის, სოციალურად დაუცველებს უფასოდ გაუწევს იურიდიულ დახმარებას. ამ შენობაში, ასევე, განთავსდება საკონფერენციო დარბაზი. ამისთვის ფინანსურად 300 ათასი ლარია საჭირო, საიდანაც 200 ათას ლარს მუნიციპალიტეტი გაიღებს, ხოლო 100 ათასს ევროკავშირი და გაერო დააფინანსებს.

გამოითქვა მოსაზრებაც, რომ უმჯობესი ხომ არ იქნებოდა, შენობის გადაცემა, ვიდრე თავიდან აგება და მუნიციპალიტეტიდან ამდენი თანხის გაცემა. თუმცა, ალეკო მამეშვილმა დაასაბუთა, რომ ეს არ იქნება დიდი დანახარჯი: “პირიქით _ მოსახლეობის რაოდენობის და მათი საჭიროებიდან გამომდინარე, ეს იქნება მათთვის უდიდესი მონაპოვარი. ნებისმიერ დაინტერესებულ პირს მიეცემა საშუალება, მიიღოს ნებისმიერი ინფორმაცია სახელმწიფო პროგრამების შესახებ და ყველაფერ იმაზე, რაც მათთვის საინტერესო და საჭირო იქნება”, _ თქვა მამეშვილმა.

დეპუტატმა ლევან მგელაძემ გამოთქვა თვალსაზრისი, რომ მშენებლობაზე ამდენი თანხის გაღების ნაცვლად, უმჯობესი ხომ არ იქნებოდა, კომუნალური ხარჯები დაფარულიყო და ახალი შენობის აგების ნაცვლად, სადმე ფართი გამოეყოთ.

აქედან გამომდინარე, მოითხოვეს საკითხის ადმინისტრაციულ წარმოებაზე დაყენება. კენჭისყრითაც ასე გადაწყდა, თუმცა, გამოიკვეთა აზრი, რომ, საბოლოოდ, საკითხი მაინც ისე გადაწყდება, როგორც ალეკო მამეშვილმა წარმოადგინა და ადმინისტრაციულ წარმოებაზე დაყენება მხოლოდ ცოტა ხნით გაახანგრძლივებს პროცესს.