ოთხი აგვისტოდან ეროვნული ჩემპიონატის პრო ლიგა 2-ის დარჩენილი ორი წრის შეხვედრები განახლდება. ფაქტობრივად, ის მცირედი შესვენება, რომელიც გამოცხადდა, უკვე დასრულებულია და ყველა კლუბი შეკრებილია, მათ შორის, ლანჩხუთის “გურიაც” , რომელსაც ოთხ აგვისტოს მეტად რთული, გასვლითი შეხვედრა ელის თელავში, ადგილობრივ “თელავთან”.
ამ შესვენებისას “გურიაში” დაანონსებული ძირეული ცვლილებები გახორციელდა. ფაქტობრივად, ახალ გუნდს ვიხილავთ დარჩენილ შეხვედრებში, რაც უფრო გაძლიერებისთვის იყო მიზანმიმართული. თუმცა, ამ ცვლილებების ფონზე, გუნდს კვლავაც გელა სანაია გაწვრთნის, მისი ასისტენტები კი გიორგი ჩხაიძე, გიგლა იმნაძე და გიგა იმედაიშვილი იქნებიან.
სიახლეებია კლუბის დირექტორატშიც, სადაც სპორტული დირექტორის პოსტი თემურ ლორიამ დაიკავა, რომელიც აქამდე ჩოხატაურის “ბახმაროს” მთავარი მწვრთნელი იყო.
“გურია” 19 ივლისიდან გრიგოლეთში, საწვრთნელ ბაზაზეა და მოსამზადებელ პერიოდს იქ გადის.
“გურიაში” გახორციელებულ სიახლეებზე “გურია ნიუსი” კლუბის ახალდანიშნულ სპორტულ დირექტორს ესაუბრა.
პირველი კითხვა თემურ ლორიასთან სწორედ “ბახმაროს” დატოვების მიზეზებს ეხებოდა და ბუნებრივია, დავინტერესდით, რატომ წამოვიდა საკმაოდ წარმატებული შედეგების მქონე კლუბიდან _ თემურ ლორია “ბახმაროდან” წამოსვლის მთავარ მიზეზად ფინანსურ სიმწირეს ასახელებს:
“მთავარი მიზეზი ფინანსური სიმწირე იყო. არ ვგულისხმობ მარტო ხელფასის დაკლებას, გეგმაში გვქონდა გუნდის გაძლიერება, რაც, სამწუხაროდ, არ მოხდა. იმედს ვიტოვებ, ჩემი წამოსვლის შემდეგ ადგილობრივი ხელისუფლება უფრო მეტად დაეხმარება გუნდს. თუმცა, მე მაინც გადავწყვიტე წამოსვლა. “ბახმარო”, რასაკვირველია, არ დაშლილა. როგორც მე მაქვს ინფორმაცია, ის 22 ივლისს შეიკრიბა და მხოლოდ ოთხმა ფეხბურთელმა დატოვა გუნდი საკუთარი სურვილით. მათ შორისაა, ჩვენი ექსფორვარდი გიგა კვერენჩხილაძე, რომელიც, სავარაუდოდ, “ჩიბათში” გააგრძელებს კარიერას. მონახაზი აქვთ, თუმცა, მარტო მონდომება არ უშველის, ფინანსური მხარეც უნდა დალაგდეს. ვთვლი, რომ წარმატებები გვქონდა, უფრო მეტიც შეიძლებოდა, რაღაც პატარ-პატარა ნიუანსები იყო, მაგრამ, ჯამში, მიმაჩნია, რომ “ბახმარომ” დადებითი შედეგი დადო და კარგია, თუ ამ მუხტს არ გააჩერებენ. წარმატებებს ვუსურვებ”, _ გვითხრა ლორიამ.
რაც შეეხება “გურიაში” დაანონსებულ დიდ ცვლილებებს, ახლად დანიშნული სპორტული დირექტორის თქმით, ფეხბურთელების ერთი ნაწილი საკუთარი სურვილით წავიდა გუნდიდან, გარკვეული ნაწილი კი (მოსიაშვილი, ყურშავიშვილი, კიკნაძე, აპი, სკოტარენკო, წილოსანი, ჭეიშვილი, ნარიაშვილი) _ მთავარი მწვრთნელის გადაწყვეტილებით. ურთიერთშეთანხმების შედეგად დარჩა სანდრო ბახია:
“სანაცვლოდ მივიღეთ: ხაჭაპურიძე (“ქედა”), ჟვანია (“ნორჩი დინამო”), ვოლხოვი (სამტრედია) , ლომსაძე (“ცხინვალი”). კლუბში დარჩენილ იაგრს, კიდევ ერთი ბრაზილიელი, სილასი დაემატება, რომელსაც დღე-დღეზე ველოდებით. მის გარდა კიდევ სამი ლეგიონერის დამატებაა გათვალისწინებული. “ბახმაროდან” “გურიაში” გადმოვიდნენ შარაშენიძე და კოტრიკაძე. კოტრიკაძე შარშანაც თამაშობდა ლანჩხუთის “გურიაში”.
ჯერ არ გადაწყვეტილა, მაგრამ საუბარია ცენტრალურ მცველ, ჯღარკავას გადმოსვლაზე. პრობლემა გვაქვს ფორვარდის ხაზზე. გვყავს, მაგრამ კონკურენციის ხარჯზე გვინდა კიდევ ერთი თავდამსხმელის დამატება. საუბარია აზერბაიჯანელ თავდამსხმელზე, რომელიც ჯერ კლუბს არ უნახავს. არც მარცხენა მცველის და არც მარჯვენა მცველის პრობლემა ამ ეტაპზე არ არის”, _ ამბობს კლუბის სპორტული დირექტორი.
მისივე თქმით, ფაქტობრივად, ახალი გუნდის კეთება მიმდინარეობს და დროის სიმცირის გამო, ფეხბურთელების ჯეროვნად შესათამაშებლად მთავარ მწვრთნელს დიდი შრომა მოუწევს. “რაც მისი გამოცდილების კაცს არც უნდა გაუჭირდეს. დარწმუნებული ვარ, ყველაფერი გააზრებული აქვს. დაგეგმილია რამდენიმე ამხანაგური თამაში”, _ ამბობს ლორია.
რაც შეეხება ფეხბურთელების ხელფასების თემას, ლორიას განმარტებით, ეს საკითხი ინდივიდუალურია:
“გუნდში ფეხბურთელთა გარკვეულ ნაწილს მაღალი ანაზღაურება აქვს, ნაწილს _ უფრო დაბალი. ეს ასეა, ზოგადად. რა თქმა უნდა, გაზრდილია მოტივაცია გუნდში, დაგეგმილია პრემიები, რაც კარგი თამაშის ერთ-ერთი სტიმულია. ცნობილია, რომ ფულს ფეხბურთის განვითარების ფონდი აძლევს კლუბს და ამას ემატება სპონსორული შემოწირულობა, რაც ამ შემთხვევაში, კახა ებრალიძისგან მოდის და ეს წარმატებისთვის დამატებითი მოტივაციაა”.
როგორც “გურიას” სპორტულ დირექტორთან საუბრისას გაირკვა, საკმაოდ რთულ სიტუაციაში მყოფი კლუბისთვის პროგრამა-მაქსიმუმი ლიგაში დარჩენაა ყოველგვარი პლეი-ოფების გარეშე:
“მესმის, მისია ძალიან რთული დასაძლევი და შესასრულებელია, მაგრამ ეს ფეხბურთია და პრობლემას აუცილებლად უნდა შეეჭიდო. ამისთვის ისეთი გუნდის მომზადება და დაყენებაა საჭირო, რომელიც ყველა წინააღმდეგობას დაძლევს. არავინ არაფერს დაგვითმობს. მე რაც თამაშები ვნახე ამ ლიგაში, ყველა გუნდი სერიოზულია და ვერ გეტყვი, რომელიმე სუსტია-მეთქი. საკმაოდ რთული დასაწყისი გველოდება, სტუმრად ჯერ “თელავთან”, შემდეგ “სამტრედიასთან”, რომელსაც პირველ გასვლაზე ქულა ავართვით, მაგრამ ხელის ჩაქნევა არ შეიძლება, ყველა ქულას ოქროს ფასი აქვს”, _ დასძენს თემურ ლორია.
საგულისხმოა, რომ ფოთის “კოლხეთი” ფინანსური პრობლემის გამო დაჯარიმებულია. კლუბმა ვერ გადაიხადა დათქმულ დროს ფეხბურთელების სახელფასო დავალიანება. დიდი ალბათობით, ფოთელებს 6 ქულა მოაკლდებათ, რაც ფედერაციის სადისციპლინო კომიტეტის გადასაწყვეტია (როგორც ჩვენს შემთხვევაში ბრაზილიელ ფეხბურთელთან). თუ 15 აგვისტომდე ვერ გადაიხდიან, მაშინ მეორე სანქცია დაეკისრებათ და გათამაშებიდანაც მოხსნიან.
ცნობისთვის _ ლანჩხუთის “გურიამ” განახლებული შემადგენლობით პირველი ამხანაგური მატჩი გრიგოლეთის საწვრთნელ ბაზაზე სენაკის “ეგრისთან” ჩაატარა და წაგებული პირველი ტაიმის (1:4) შემდეგ, ფრეს (4:4) მიაღწია. ლანჩხუთელთაგან გოლები გაიტანეს ებრალიძემ, იაგრმა, ლომსაძემ და შარაშენიძემ.
