“გამოწვევები შეიცვალა, სოციალური დახმარების ეფექტურობა არის გადასახედი, ამისთვის სამინისტრო ამზადებს დეტალურ აუდიტს, – განაცხადა პრემიერ-მინისტრობის კანდიდატმა გიორგი გახარიამ, რომლიც პარლამენტში დეპუტატების შეკითხვებს პასუხობს.
ერთ-ერთი კითხვა ეხებოდა მრავალშვილიანი ოჯახების არასაკმარის სოციალურ დახმარებას. გიორგი გახარიას თქმით, ქვეყნის გამოწვევები შეიცვალა და სოციალური დახმარების ეფექტურობა არის გადასახედი.
„მრავალშვილიან ოჯახებთან დაკავშირებით, ყველას კარგად უნდა გვესმოდეს, რომ ბოლო წლების განმავლობაში, სოციალური დახმარების ნაწილში, სისტემური ცვლილებები მოხდა ქვეყანაში. რა თქმა უნდა, გამოწვევები შეიცვალა. დღეს სხვა პრობლემების წინაშე ვდგავართ და სოციალური დახმარების ეფექტურობა არის გადასახედი. ამისთვის სამინისტრო ამზადებს დეტალურ აუდიტს, რა მდგომარეობაში ვართ დღეს, სად გვაქვს აცდენები, სად უნდა დავუმიზნოთ უკეთესად, მიზნობრიობის ხარისხი გავზარდოთ“, – განაცხადა გახარიამ.
გიორგი გახარიამ საკითხთან დაკავშირებით რამდენიმე აქცენტი გააკეთა.
„მე მხოლოდ რამდენიმე აქცენტს გავაკეთებდი. პირველი – სოციალური დახმარების შემდგომი განვითარების ძირითადი მიზანი უნდა იყოს, რომ არ შექმნას აღქმა უსამართლობის; მეორე – არ გახდეს უმუშევრობის მოტივატორი და მესამე – უნდა მისცეს ადამიანური კაპიტალის განვითარების საშუალება. ეს იქნება ძირითადი ჩარჩო.
სხვა ყველაფერი იქნება შემდგარი აუდიტის შედეგად, მიზნობრიობის ხარისხის გაზრდა. რაც შეეხება, დემოგრაფიულ ნაწილს, რა თქმა უნდა, სოციალური დახმარება დემოგრაფიული მდგომარეობის და მრავალშვილიანობის წახალისების ერთ-ერთი მცირე კომპონენტია. მარტო ფინანსური სტიმულირებით ჩვენ მრავალშვილიანობას საქართველოში ვერ წავახალისებთ. ეს რთული, ძალზედ მრავალწახნაგოვანი პრობლემაა, რომელსაც სჭირდება სოციალური, კულტურული და კიდევ სხვა სახის დახმარება და მხარდაჭერა. საერთოდ ეს შეიძლება გახდეს, წარმატების ერთ-ერთი მაჩვენებელი, იმიტომ რომ, ჩვენ კარგად უნდა გვესმოდეს, რომ დემოგრაფიული პრობლემა ეს არ არის მხოლოდ და მხოლოდ ეროვნული განზომილების საკითხი, ეს არის პოლიტიკური, ეკონომიკური, უსაფრთხოების თუნდაც საკითხი და ჩვენ აქ მრავალი მიმართულებით უნდა ვიმუშაოთ“, – განაცხადა გიორგი გახარიამ.
