2019 წელს, შემოწმებას დაექვემდებარა დეკლარაციის მონიტორინგის ელექტრონული სისტემის მიერ დეკლარაციების შემთხვევითი შერჩევით და დამოუკიდებელი კომისიის მიერ შერჩეული თანამდებობის პირების დეკლარაციები. დამოუკიდებელი კომისიის მიერ შეირჩა 297 თანამდებობის პირის დეკლარაცია, ხოლო ელექტრონული სისტემის მიერ – 310 დეკლარაცია. ჯამურად, 2019 წლის განმავლობაში მონიტორინგს დაექვემდებარა 607 თანამდებობის პირი.
გავრცელებულ დოკუმენტში წერია იმ პირთა სახელი და გვარი, თანამდებობა, რომლებიც დაჯარიმდნენ. თუმცა, არ წერია, რა ოდენობის თანხით დაჯარიმდნენ ისინი.
დაჯარიმებულთა შორის არის ბესიკ აფაქიძე, საქართველოს შინაგან საქმეთა სამინისტრო გურიის პოლიციის დეპარტამენტის ლანჩხუთის რაიონული სამმართველოს უფროსის მოადგილე (შემთხვევითი შერჩევა). აფაქიძე დაჯარიმდა საკუთარი და ოჯახის წევრის ანგარიშების არ ასახვის გამო, ნაშთში ცდომილების, ანაზღაურებითში ცდომილებისა, ხელშეკრულების არ ასახვის გამო;
შემთხვევითი შერჩევისას დაჯარიმდა გიორგი შარაშენიძე _ საქართველოს შინაგან საქმეთა სამინისტრო გურიის პოლიციის დეპარტამენტის ოზურგეთის რაიონული სამმართველოს უფროსის მოადგილე, დეტექტივების განყოფილების უფროსი. დაუფიქსირდა საკუთარ უძრავ ქონებაში ფართის ცდომილება, საკუთარი ანგარიშების არ ასახვა, ოჯახის წევრის სესხის არ ასახვა;
დაჯარიმდა ზვიად კვაჭანტირაძე, საქართველოს პარლამენტი პარლამენტის წევრი (კომისიის მიერ შერჩეული). კვაჭანტირაძეს მითითებული არ აქვს მეუღლის მონაწილეობა სამეწარმეო საქმიანობაში;
ნინო წილოსანი, საქართველოს პარლამენტი წევრი (კომისიის მიერ შერჩეული) დაჯარიმდა ოჯახის წევრის უძრავის არ ასახვისა და ფართში ცდომილების გამო. ასევე, წილოსანს დაუფიქსირდა საკუთარი სამეწარმეო საქმიანობის არ ასახვა, ანაზღაურება-შემოსავლის არ ასახვა;
დაჯარიმდა გოჩა აბაშმაძე, ოზურგეთის მუნიციპალიტეტის მერია ოზურგეთის მუნიციპალიტეტის მერიის არქიტექტურის, სივრცითი მოწყობის, ინფრასტუქტურის და კომუნალური სერვისების განვითარების სამსახურის ყოფილი უფროსი (შემთხვევითი შერჩევა). აბაშმაძის დეკლარაციაში მითითებული არ არის საკუთარი უძრავი ქონება (თანასაკუთრება).
