17 იანვარს ფეისბუქ გვერდმა “სტალინი” გამოაქვეყნა პოსტი, სადაც აღნიშნულია, რომ საქართველოში 2 ან მეტი ძროხის მფლობელებს 2020 წლიდან მეწარმე სუბიექტად დარეგისტირება და გარკვეული საფასურის გადახდა მოუწევთ. “სტალინის” მტკიცებით, ეს რეგულაცია ევროკავშირთან ასოცირების ხელშეკრულებით არის გათვალისწინებული.
“მითების დეტექტორი“ ადგენს, რომ გავრცელებული ცნობა ყალბია და იგი ევროკავშირთან ასოცირების ხელშეკრულების შესახებ საზოგადოებაში შიშისა და უკმაყოფილების დანერგვას ემსახურება.
იდენტური ინფორმაცია გასულ წელს სხვადასხვა მედია საშუალებამ გაავრცელა, თუმცა სურსათის ეროვნულმა სააგენტომ ინფორმაცია უარყო.
სურსათის ეროვნული სააგენტო გავრცელებულ ინფორმაციას უარყოფს და აღნიშნავს, რომ ევროკავშირთან თავისუფალი სავაჭრო სივრცის შესახებ შეთანხმების ფარგლებში, 2020 წლიდან, ბიზნესოპერატორად რეგისტრაცია არა 2-3 ძროხის მფლობელისთვის ხდება სავალდებულო, არამედ იმ ფიზიკური პირებისთვის, ვინც აწარმოებს და ბაზარზე განათავსებს სურსათს. ბიზნესოპერატორად რეგისტრაცია კი უფასოა. სამინისტროს განმარტებით, რეგულაციის მიზანი სურსათის წარმოებისას თანამედროვე სტანდარტების და სანიტარიულ-ჰიგიენური ნორმების დანერგვისა და დაცვის უზრუნველყოფაა.
ყალბი ინფორმაცია 2 ძროხის ყოლის შემთხვევაში გადასახადის გადახდის შესახებ 2019 წელს გავრცელდა; ახლა კი ანტიდასავლური სენტიმენტების ფეისბუქ გვერდმა “სტალინი” ერთი წლის წინანდელი დეზინფორმაცია “გააცოცხლა”.
“მითების დეტექტორმა“ გადაამოწმა 2019 წლის თებერვალში გავრცელებული ინფორმაციის, თითქოს 2-3 ძროხის მეპატრონეს 2020 წლიდან ევროკავშირის მოთხოვნის საფუძველზე გადასახადი დაეკისრებოდა, გავრცელების არხები; თავდაპირველად, ეს ამბავი რეგიონული ტელევიზიის “გურჯანიის” მიერ მომზადებულ სიუჟეტში რესპონდენტმა გაახმოვანა, მოგვიანებით კი ამ სიუჟეტზე დაყრდნობით, ბათუმის TV25-მაც გაავრცელა. მიუხედავად იმისა, რომ ტვ “გურჯაანმა” და TV25-მა თვითრეგულირების ფორმატში საკითხი განიხილეს, დაშვებული შეცდომა აღიარეს და მაყურებელს დაშვებული შეცდომის შესახებ ინფორმაცია მიაწოდეს, სხვა მედიებმა, მათ შორის clickbait საიტებმა ეს ინფორმაცია ვირუსულად გაავრცელეს. ყალბი ინფორმაცია დღესაც იძებნება რამდენიმე საიტზე.
წყარო: “მითების დეტექტორი“
