ქვეყნის მასშტაბით გამოცხადებულ საგანგებო მდგომარეობას ლანჩხუთის მუნიციპალიტეტიც ემორჩილება და კორონავირუსის გავრცელების პრევენციის მიზნით, სხვადასხვა ღონისძიებები ხორციელდება. უწყებათაშორისი საკოორდინაციო საბჭოს სხდომაზე მიღებული ერთ-ერთი აკრძალვა საკვირაო ბაზრობებსაც ეხება, თუმცა, ამ კუთხით, ჯერჯერობით, არაფერია ნათქვამი გარევაჭრობასთან დაკავშირებით.
დაახლოებით, ერთი კვირის წინ, როცა ჯერ კიდევ საგანგებო მდგომარეობა გამოცხადებული არ იყო, მუნიციპალიტეტის მერმა, ალექსანდრე სარიშვილმა მერიაში გამართულ პრესკონფერენციაზე თქვა, რომ გარევაჭრობის საკითხი აუცილებლად მოსაგვარებელი იყო და ისინი უნდა გადასულიყვნენ ერთ კონკრეტულ ადგილას, სადაც სადეზინფექციო სამუშაოები გახორციელდებოდა და ამ პრობლემის მოგვარებას ზედამხედველობის სამსახურს დაავალებდა. თუმცა, გარევაჭრობა და გარემოვაჭრეები ლანჩხუთში ისევ აქტუალური თემაა და მათთან მიმართებით, საზოგადოების აზრიც ორადაა გაყოფილი.
მათი ნაწილი სოლიდარულია გარემოვაჭრეების მიმართ და მიაჩნიათ, რომ ისინი არანაირ საფრთხეს არ უქმნიან მოქალაქეების ჯანმრთელობას.
“მათ არ უნდა აეკრძალოთ ყოველდღიური საქმიანობა. ზოგს ავადმყოფი შვილი ელოდება სახლში, ზოგს _ ავადმყოფი მეუღლე, თითქმის ყველა მათგანს ბანკის ვალი აქვს. ნუ დაგვავიწყდება, რომ ისინი ყოველდღიურ გამომუშავებაზე არიან და სხვა შემოსავლის წყარო არ გააჩნიათ, არ აქვთ ყოველთვიური განსაზღვრული ხელფასი, რომ სახლში დასხდნენ თუნდაც, ეს ერთი თვე. “კეთილისმსურველებს” გირჩევთ, თავად გამოიჩინოთ მოქალაქეობრივი პასუხისმგებლობა და დაანებოთ ყოველდღე ქუჩაში წანწალს თავი, მაშინ ხალხმრავლობაც არ იქნება. ამ სიტუაციაში ჩემი სოლიდარობა გარემოვაჭრეებს, წერტილი”, _ წერს სოციალურ ქსელში ლანჩხუთელი ჟურნალისტი თორნიკე ჯიჯიეშვილი.
ჯიჯიეშვილის ამ პოსტს გარემოვაჭრეებისადმი სოლიდარობის ნიშნად სხვებიც ეხმაურებიან: “დაანებეთ თავი ამ საცოდავ გარემოვაჭრეებს, არანაირ საფრთხეს ესენი არ წარმოადგენენ. იშოვონ პურის ფული”; “უმრავლესობა შემოსავლების გარეშე დავრჩით და მივესალმები მათ საქმიანობაში ხელის შეწყობას, მაგრამ ხალხი თუ ქუჩაში არ გამოვიდა, გარემოვაჭრეების სურსათს ვინ იყიდის?!” “თუ არ უნდათ, ნუ იყიდიან გარემოვაჭრეებთან”; “გარემოვაჭრეების სახლში დარჩენა, ამ ეტაპზე არავითარ აუცილებლობას არ მოითხოვს… 30 ლარს თუ შოულობდნენ, პირობითად, 15 ლარს გამოიმუშავებენ”; “დაეხმარონ და დასხდებიან სახლში”; “ღია ცის ქვეშ ვაჭრობენ, დახურულში არა, რატომ უკრძალავენ”; “გარემოვაჭრეები სულაც არ წარმოადგენენ საშიშროებას, აი, დახურული სივრცე-მარკეტები და პატარა მაღაზიები უფრო შეიძლება დაინფიცირდეს, დახურული სივრცე უფრო საშიშია”; “რით უნდა იარსებონ, სახლში რომ დასხდნენ?!”
გარემოვაჭრეებთან მიმართებაში განსხვავებულად ფიქრობს ლანჩხუთელთა მეორე ნაწილი, მათი არგუმენტით, იმ ფონზე, როცა ბაზრობა დაიხურა, ვაჭრობა გარემოვაჭრეებსაც უნდა აეკრძალოთ: “როცა ბაზარი დაიხურა, გარემოვაჭრე რატომ უნდა იყოს? ვიზიარებ ყველას გაჭირვებას, მაგრამ არ უნდა იყოს”; “ბაზარშიც გაჭირვებული ხალხი მუშაობდა, ნაკლებად იყო წელში გამართული მოვაჭრე, მაგრამ დაიხურა. რა თქმა უნდა, ვიცი, რომ უჭირთ გარემოვაჭრეებსაც და ყველას გვაწევს ბანკი ზურგზე, მაგრამ თავსაც მოუფრთხილდნენ”.
საგულისხმოა, რომ გასულ სამშაბათს “გურია ნიუსმა” ქალაქის ცენტრი შემოიარა და სამწუხაროდ, ლანჩხუთს საგანგებო მდგომარეობის გამოცხადების ნაკლებად ეტყობოდა რამე, ქუჩები სავსე იყო ხალხით, ავტომანქანებით… მოსახლეობის ნაწილი მსგავს ხალხმრავლობას იმით ხსნიდა, რომ იმ დღეს საბიუჯეტო ორგანიზაციებში ხელფასების დარიგების დღე იყო, ზოგი კი ქვეყნის დიდი ქალაქებიდან ჭარბ სტუმრიანობას უკავშირებდა ქუჩებში ადამიანთა სიმრავლეს, მით უმეტეს, მოწოდების _ “დარჩი სახლში” _ ფონზე.
