„საოცრად ადამიანურ, საზოგადოებისთვის უცნობ ისტორიასა და მის გმირზე უნდა მოგითხროთ, რომელსაც პირადად არც კი ვიცნობ, მაგრამ მართლაც, ღვთის რჩეულთა ხვედრია, ჩვენი ქალაქის კარდიოლოგთა თვალსაჩინო კოჰორტას შინაგანი კულტურით, პროფესიონალიზმითა და საოცარი ადამიანობით გამორჩეული, თავმდაბალი ახალგაზრდა ექიმი ამშვენებდეს.
დიდგულიანი, საუკეთესო კარდიოლოგი, პროფესიონალი, სანდო, უშუალო, კაცთმოყვარე, ერთგული, მზრუნველი და ყურადღებიანი… – რა ეპითეტს აღარ მოისმენთ სენაკელი ექიმ-კარდიოლოგის, ირაკლი ცხვიტავას დახასიათებისას…
5 აპრილს, სენაკის სამედიცინო დახმარების ცენტრში ზარი შემოვიდა. ,,ადამიანი მდინარეში იხრჩობა და შველა სჭირდებაო“- ტელეფონში განწირული და სასოწარკვეთილი ხმა გაისმა.
შემთხვევის ადგილზე, პირველები სასწრაფო დახმარების მედ. პერსონალი აღმოჩნდა.
მორიგე ექიმი ირაკლი ცხვიტავა გახლდათ…
სენაკელთა ,,გულის ექიმი“ არც კი დაფიქრებულა, ისე გადაეშვა მდინარეში და მისთვის სრულიად უცნობი, სიკვდილის პირას მისული ქალი გადაარჩინა, ნაპირზე გამოიყვანა, პირველადი დახმარება აღმოუჩინა…
მალევე მას სამაშველო სამსახურის ბრიგადაც შემოუერთდა, მაგრამ ,,გულის ექიმის“ გადარჩენილი ქალბატონი თავს უკეთ გრძნობდა.
ასეთი მადლიანი, კაცთმოყვარე, მოყვასისთვის თავგანწირული ადამიანი ცხოვრობს ჩვენს გვერდით და კეთილ საქმეებს ჩუმად, ხმაურის გარეშე აკეთებს.
,,გულის ექიმი“ სწორედ ასეთი უნდა იყოს – თანაც, თუ ეს ექიმი მრავალრიცხოვან პაციენტთა გულისცემასაა მიყურადებული!..”,_ აღნიშნულ ინფორმაციას სოციალურ ქსელში ჟურნალისტი თეა გრიგოლია ავრცელებს.
