„გარემოს დაცვისა და სოფლის მეურნეობის სამინისტრო, ზაფხულის მოახლოებასთან დაკავშირებით, მოსახლეობას, მოუწოდებს დაემორჩილონ იმ აკრძალვებს, რომელიც ტყეში გადააგილებისას ვრცელდება და დაიცვან უსაფრთხოების წესები”,_ აღნიშნული ინფორმაცია დღეს ეროვნული სატყეო სააგენტოს გვერდზე გავრცელდა.
გავრცელებული ინფორმაციაში აღნიშნულია ისიც, რომ ტყეში ხანძრის გამომწვევი მიზეზი უმეტესად ადამიანის დაუდევრობაა და ხანძრის შემთხვევაში ჯარიმა 100-დან 200 ლარამდეა, 1000 ლარის ზემოთ მიყენებული ზარალის შემთხვევაში კი აღიძრება სისხლის სამართლის საქმე.
ყოველწლიურად საქართველოში არაერთი ტყის ხანძარი ხდება, რის შედეგადაც ტყის ფართობი მცირდება.
ჰაერის მაღალი ტემპერატურა და არსებულ პირობებში ნებისმიერი დაუდევრობა ტყის მასივებში ხანძრის გაჩენის რისკს კიდევ უფრო ზრდის.
ტყის ხანძარი სერიოზულ ზიანს აყენებს გარემოსა და ადამიანის ჯანმრთელობას, ამიტომაც მაქსიმალურად უნდა ვეცადოთ მის თავიდან არიდებას.
რა ეკრძალებათ ადამიანებს ტყეში გადაადგილებისას და როგორ უნდა დაიცვან უსაფრთხოება ტყეში ხანძრის თავიდან ასარიდებლად_ ამ საკითხებზე „გურია ნიუსი“ ეროვნული სატყეო სააგენტოს უფროსის მოადგილეს, ნათია იორდანაშვილს ესაუბრა.
_ მოდის ჩვენთვის ძალიან მნიშვნელოვანი სეზონი, ჩვეულებრივ ამ პერიოდში სააგენტო იწყებს პრევენციული განცხადებების გავრცელებას, მაგრამ ვფიქრობთ, რომ ეს წელი გაცილებით უფრო მნიშვნელოვანი იქნება, იქედან გამომდინარე, რომ კარანტინის დასრულების, საგანგებო მდგომარეობის ვადის გასვლის შემდგომ, ჩვენ მოლოდინი გვაქვს იმისა, რომ ტყეში რეკრეაციულ ადგილებზე ზეწოლა კიდევ უფრო გაიზრდება და უფრო აქტიური იქნება ჩვენი მოქალაქეებისთვის ტყეში, ბუნებრივ გარემოში დასვენება.
გარდა მონიტორინგის გაძლიერებისა ვფიქრობთ, რომ წესების შეხსენება არის მნიშვნელოვანი ზუსტად დღეს და მთელი წლის განმავლობაში გავაგრძელებთ ამ კამპანიას.
_რა უნდა დავიცვათ ტყეში გადაადგილებისას?
_ ბევრს ჰგონია ხოლმე, რომ კოცონის დანთება, ჩაუმქრალად დატოვება ან სიგარეტის ნამწვის გადაგდება არის ხოლმე ძირითადი წყარო ხანძრის წარმოშობის, ეს არის მნიშვნელოვანი წყარო, მაგრამ ნარჩენების დატოვება თუნდაც პიკნიკების შემდეგ ძალიან ხშირად, სამწუხაროდ, ჩვენს ტყეებში არის ტემპერატურის მომატების შემდეგ ხანძრის გამომწვევი და სწრაფად გავრცელების მიზეზი.
ამიტომ მოსახლეობას შევახსენებთ, რომ ტყეში განსაკუთრებით ზაფხულში, განსაკუთრებით მაღალი ტემპერატურის პირობებში აკრძალულია კოცონის დანთება (საქართველოს კანონმდებლობის თანახმად, წიწვოვან ტყეში, განსაკუთრებით ხეების ვარჯის ქვეშ, გაუწმებდავ ადგილებში, ჩამოცვენილი ფოთლებით დაგროვებულ ადგილებში).
ჯერჯერობით, არ გვაქვს საპიკნიკე ადგილების ქსელი, მაგრამ ვმუშაობთ და იქნება ადგილები გამოყოფილი ცეცხლის დასანთებად, თუმცა, მაქამდე, ჩვენ თვითონ შეგვიძლია ძალიან მარტივად დავიცვათ უსაფრთხოების წესები.
უნდა გავწმინდოთ აალებადი მასალებისგან, ჩამოყრილი ფოთლებისგან ადგილი 1 მეტრისა და 50 სანტიმეტრის რადიუსში მაინც, თუ არის საშუალება მყარი მასით, ქვით შემოვფარგლოთ ცეცხლის ადგილი და მივაქციოთ ყურადღება, რომ არ გავრცელდეს გვერდზე და გადავაკონტროლოთ მიწის მიყრითა თუ წყლის მისხმით ჩაქრობის შემდეგ, რომ ნამდვილად ჩაქრა.
აკრძალვების გარდა, მოქმედებს სანქციებიც ტყეში გაუფრთხილებლობით ცეცხლის გავრცელება ან დაზიანება ისჯება, როგორც ადმინისტრაციული ჯარიმით, ეს გახლავთ 100-იადან 200- ლარამდე, ყველა კონკრეტულ შემთხვევაში ხდება გარემოზე მიყენებული ზიანის დაანგარიშება სპეციალური მეთოდოლოგიით და თუ ეს ზიანი 1000 ლარზე მეტია სისხლის სამართლის პასუხისმგებლობის საკითხიც დგება.
_ არის თუ არა შემთხვევა, როცა ხანძრის გამო ვინმე დაუჯარიმებიათ?
_ არის შემთხვევები ხანძრის შემდეგ მოქალაქეების დაჯარიმების. გასული წლის შემოდგომაზეც იყო რამდენიმე ხანძარი, როდესაც გაუფრთხილებლობა იმ წამსვე იყო სახეზე.
ძალიან დიდ პრობლემას გვიქმნის გაზაფხულsa და შემოდგომაზე, ფერმერების, მწყემსების ან ადგილობრივი მოსახლეობის მიერ გამოსუფთავებული საკარმიდამო ნაკვეთების გადაწვა შრომის გამარტივების მიზნით ან მოსაზრების გამო, რომ ასეთი პრაქტიკით ახალი, კარგი ბალახი უკეთესად წამოვა ან მოსავალი უკეთესი იქნება. ეს უკვე მეცნიერულადაც არის დადასტურებული, რომ აბსოლუტურად მცდარია, გარდა იმ რისკებისა, რომ ასეთი ნაკვეთებიდან შეიძლება ცეცხლი უკვე ტყეზეც გადავიდეს და ძალიან რთულია მისი ჩაქრობა ხოლმე.
ეს არის საკითხი, როდესაც თითოეული ჩვენგანის სწორ მოქმედებას შეუძლია რისკების დაზღვევა. ვთხოვდი კიდეც მოსახლეობას, რომ ნებისმიერი ფაქტის აღმოჩენის შემთხვევაში დაუყონებლივ დარეკონ 153-ზე, ეს არის გარემოს დაცვისა და სოფლის მეურნეობის სამინისტროს ცხელი ხაზი, ხოლო ხანძრის შემთხვევაში 112-ზე.
_ გარდა დაცული ტერიტორიებისა, კონტროლდება თუ არა ტყეში ვინ, რამდენი ადამიანი შედის?
_ აბსოლუტურად, შეუძლებელია გაკონტროლება ვინ შედის. თუმცა, ჩვენ გვაქვს იდენტიფიცირებული ეგრეთ წოდებული ხანძარსაშიში ზონები, სადაც, როგორც წესი, მეტია უფრო დატვირთვა, ძირითადად, ტურისტულ სეზონზე და მათი მონიტორინგი გაძლიერებულად ხდება ჩვენი თანამშრომლების მიერ. სეზონურად ხანდახან ვიმატებთ ხოლმე მეხანძრე-დარაჯებსაც და ისინი აკონტროლებენ მარშრუტებს, სადაც შეიძლება მეტი იყოს გადაადგილება ან საპიკნიკე ადგილები. თუმცა, სრული მასშტაბით ეს შეუძლებელია და ამიტომ არის მნიშვნელოვანი, რომ ყველა ვიყოთ ფრთხილად.
_ რამდენი ხანძარსაშიში ზონაა საქართველოში?
_ ხანძარსაშიში ზონები ბევრია. გვაქვს ხანძარსაშიში რეგიონები და უბნები. ეს უბნები იყოფა 5 კლასად და ეს კლასები დამოკიდებულია ტყის ტიპებზე, მაგალითად, ახლგაზრდა წიწვოვანი კორომები, რომლებიც სამხრეთ ექსპოზიციის ფერდობზე არიან განფენილი არის მაღალი ხანძარსაშიშროების კლასი. მაღალია რისკი ბუნებრივად ხანძრის წარმოშობის და ასევე ხელოვნურად ხანძრისს წარმოშობის შემთხვევაში გავრცელებაც შეიძლება უფრო მაღალი იყოს. ხანძარსაშიში რეგიონები გვაქვს სამცხე-ჯავახეთი, შიდა ქართლის ნაწილი, კახეთის ნაწილი, მიუხედავად იმისა, რომ აქ წიწვოვანი ტყე არ გვაქვს. და აი ამ დიდი უბნების გარდა, რომელიც შეიძლება რამდენიმე ჰექტარს მოიცავდეს, ხანძარსაშიშად მივიჩნევთ იმ ადგილებს, რომლებიც მოსახლეობაში პოპულარულობით სარგებლობს, ე.წ. საქეიფო ადგილები და ასეთი ადგილების მონიტორინგი ხდება მთელი სეზონის განმავლობაში.
