“უწყლობის პრობლემა ყოველდღე უარესდება”

ქალაქ ოზურგეთში, ზაურ თენიეშვილის (ყოფილი გაგარინის ქუჩა) ქუჩაზე მდებარე ცხრასართულიან საცხოვრებელი კორპუსის მობინადრენი, წლების განმავლობაში არა ერთი პრობლემის შესახებ საუბრობდნენ, რასაც “გურია ნიუსი” პერიოდულად აშუქებდა. კონკრეტულად, ეს შეეხებოდა კორპუსის კედლების გარშემო წვიმისგან და ზოგადად, ნგრევისგან დასაცავად საფარის აკვრას.

_ ეს კორპუსი 1987 წელს არის აშენებული. “პემზის ბლოკით” ნაშენია და დროთა განმავლობაში დაშლა დაიწყო, რადგან, თავის დროზე, არ დაუსრულებიათ სათანადოდ. არაერთხელ ვითხოვეთ და ახლა გაგვიკეთეს. ამისთვის მადლობის მეტი რა გვეთქმის. თუმცა, ახლა უწყლობა გვაწუხებს. ეს საქმე ვინც გაგვიკეთა, ისევ იმას ვთხოვთ ახლა ამ პრობლემის მოგვარებასაც _ ამ საქმეშიც კოტე შარაშენიძეს ვთხოვთ დახმარებას. ჩვენ ავირჩიეთ და ამ საქმეშიც უნდა დაგვიდგეს მუნიციპალიტეტის მერია გვერდით, _ გვეუბნება ერთ-ერთი მცხოვრები გიორგი აკობიძე.

როგორც კორპუსის სხვა მცხოვრებლებმაც გვითხრეს, აღნიშნული კორპუსის ისტორია, საბჭოთა ეპოქაში აშენებული საცხოვრებელი სახლების ისტორიის ანალოგიურია:

_ მიუხედავად იმისა, რომ კორპუსში წყლის სისტემა დამონტაჟებული იყო, თავად წყალი საიდან უნდა მიეერთებინათ ან საიდან უნდა გამოეყვანათ, ეს არავის უფიქრია. ხალხი როცა შესახლდა, მეზობლად მდებარე ფურნის ეზოში არსებული ჭა გამოიყენეს და გააკეთეს ავზები, რომლებიც კორპუსის სახურავზეა განლაგებული. კორპუსის გვერდით დადგეს წყლის დიდი ტუმბო, რომლიდანაც ხდება წყლის ამოქაჩვა, მერე სახურავზე განლაგებულ ავზებში ჩადის და მიეწოდება კორპუსში მცხოვრებ ოჯახებს. თუმცა, წყალი სამყოფიც არ არის ხშირად და უფრო დიდი საშიშროება რაც არსებობს, არის ის, რომ სახურავზე განლაგებული სხვადასხვა ტევადობის ავზებში, ჯამში, 50 ტონამდე წყალი გროვდება. ეს სიმძიმე კი, ავარიული პროცესების მქონე კორპუსს, უდიდეს საფრთხეს უქმნის. დაზიანებულია, ასევე, წყლის ტუმბოც, _ გვიყვებიან მცხოვრებლები.

_ რომ მოხდეს საშინელება და ჩამოინგრეს კორპუსი ამ სიმძიმისგან, ვინ იქნება პასუხისმგებელი?! თავის დროზე, როცა აშენდა, ხომ არავის განუსაზღვრავს, რომ სახურავზე ამხელა სიმძიმის განთავსება იქნებოდა აუცილებელი? ვინმე, იქნებ, შემოგვედავოს და ეს მხოლოდ ჭირვეულობად მონათლოს, მაგრამ თუ კარგად დავფიქრდებით, საგანგაშოდაა საქმე. განცხადება კი შევიტანეთ მერიაში, მაგრამ როგორმე უნდა დაჩქარდეს ამ საქმის მოგვარება, _ ამბობენ აქ მცხოვრებლები.

_ აუცილებელია, პროექტი გაკეთდეს. ვიცით, რომ ჩვენი ხარჯით უნდა შემოვიყვანოთ, კერძო ოჯახები ვართ, მაგრამ არ გვაქვს ამდენი საშუალება. ამიტომ ვთხოვთ ხელისუფლებას, ნაწილობრივ მაინც ამოგვიდგეს მხარში. სახურავზე დადგმული ავზებიდან რომ წყალი გადმოდის, ესეც აზიანებს კედლებს. სახურავიდან წამოსული წყალი, წვიმაზე მეტი სიძლიერით ატანს კედლებში. დახმარებას ვითხოვთ ყველა ოჯახი და როგორმე უნდა მოგვიხერხონ. რა თქმა უნდა, რასაც შევძლებთ, გავიღებთ, _ ამბობენ თინიკო თენიეშვილი, გიორგი აკობიძე, ნათია ჩხეიძე და სხვები.

კორპუსის მცხოვრებლებმა თქვეს ისიც, რომ ოზურგეთის საკრებულოს დეპუტატი, მარიკა ჩხიკვიშვილი, რომელიც ამავე კორპუსში ცხოვრობდა, დაეხმარა მათ და განცხადება შეიტანეს ოზურგეთს მერიაში.

_ ჩვენ გვქონდა ძალიან დიდი პრობლემა _ კედლები ინგრეოდა და დაგვეხმარნენ. ამას საგანგებოდ ვუსვამთ ხაზს და გთხოვთ, ასე დაწეროთ. წლების მანძილზე ინგრეოდა კორპუსი და მხოლოდ ახლანდელმა მერმა მოგვაქცია ყურადღება. ამიტომ, შესაძლოა, თქვან, რომ ყველაფერს ერთ კორპუსს ხომ არ გავუკეთებთო, თუმცა, უფრო უარესი პრობლემის წინაშე ვდგავართ და სხვა გზა არ გვაქვს. იქნებ, ამ საქმეშიც დაგვეხმარონ, _ ამბობენ კორპუსის მცხოვრებლები.

_ ამ სახლში თავიდანვე არ შეუყვანიათ წყალი და ე.წ. “ქალაქის წყლით” არასდროს უსარგებლიათ აქაურებს. რაც აქვთ, აქ მცხოვრებმა 45-მა ოჯახმა თავისი ხარჯებით გააკეთა. თავის დროზე თვითონ იყიდეს წყლის სატუმბი და მოაწყვეს წყლის სისტემა, რომელიც ახლა დაზიანებულია და ასე ვთქვათ, მაინც პრიმიტიულად არის გაკეთებული. ახლავს დიდი საფრთხეც. მათ განცხადება შეიტანეს მერიაში. ჩვენ მხარს დავუჭერთ. იმედია, მუნიციპალიტეტის მერია მოსახლეობის სასიკეთოდ გადაწყვეტს ამ საკითხს, _ გვითხრა ოზურგეთის საკრებულოს დეპუტატმა მარიკა ჩხიკვიშვილმა.

“გურია ნიუსი” ესაუბრა ოზურგეთის მუნიციპალიტეტის მერიის ინფრასტრუქტურის სამსახურის უფროსს, თემურ გიორგაძეს;

_ ვიცით ამ კორპუსის პრობლემის შესახებ. ჩვენ აქ წლების მანძილზე მოუგვარებელი პრობლემა მოვაწესრიგეთ. ძალიან სპეციფიკური თემაა. უცებ არ გაკეთდება. კარგად უნდა შევისწავლოთ და ისე დავიწყებთ მოქმედებას. გადაჭრით ამ ეტაპზე ვერაფერს გეტყვით, _ გვითხრა გიორგაძემ.