ოზურგეთის მუნიციპალიტეტის სოფელ ნასაკირალში ორი საარჩევნო უბანია გახსნილი. ორივეგან, როგორც აქ მოსულმა ამომრჩევლებმა, კომისიების წევრებმა თუ ერთიანი ნაციონალური მოძრაობის ერთ-ერთმა ადგილობრივმა ლიდერმა ბესო ქათამაძემ გვითხრეს, სარჩევნო პროცესი ძალიან მშვიდ გარემოში მიმდინარეობს.
_არანაირი ექსცესი არ ყოფილა. დილიდანვე აქ ვარ. სიწყნარეა, ხომ ხედავთ თქვენც, სიმშვიდეა და ხალხის აქტივობაც მაღალია, _ გვითხრა ენმ-ს რაიონული ორგანიზაციის ერთ-ერთმა ლიდერმა ბესო ქათამაძემ, რომელიც ნასაკირალის მკვიდრია.
ნასკირალის ამომრჩევლებმა, ახალგაზრდებმა, განსაკუთრებით აღნიშნეს საარჩევნო პროცესის მშვიდად მიმდინარეობის შესახებ და თქვეს, რომ მომხრე არიან მხოლოდ სტაბილურობის და სიმშვიდის.
ბექა აბულაძე, 25 წლის: კი არის პანდემია, მაგრამ ეს არ გვბოჭავს, რომ ხმა მივცეთ სასურველ კანდიდატს. ყველაზე ძალიან კი მშვიდი გარემო მომწონს, რაც აქ დილიდანვე სუფევს.
ბესიკ აბულაძე, 23 წლის: მთავარია, იყოს სიმშვიდე. ჯერჯერობით, ყველაფერი კარგად მიდის. დიდი სურვილი გვაქვს, ბოლომდე ასე გაგრძელდეს და დღე მშვიდობიანად დასრულდეს.
დათო ქათამაძე, 21 წლის: ხმის მისაცემად მოვედი. უკვე დავაფიქსირე ჩემი პოზიცია. როგორც ჩემმა მეგობრებმა თქვეს, სიმშვიდეა მთავარი და ასე დაფიქსიროს ყველამ თავისი პოზიცია.
_ძალიან მშვიდი გარემოა. დილიდანვე მაღალია აქტივობა. ვისურვებდი, ასე დასრულდეს დღევანდელი დღე, -გვითხრა ნასაკირალის ნომერ 59-ე კომისიის თავმჯდომარემ.
ნასაკირალის ცენტრში გვითხრეს ასევე, რომ უბნიდან მოშორებით სპორტსმენთა ჯგუფია ამოსული, რომლებიც სიტუაციას აკვირდებიან. თუმცა, აღნიშნულ ჯგუფთან როცა მივედით, მათ გვითხრეს, რომ ადგილობრივი ამომრჩევლები არიან და არც ფოტოგადაღებაზე უთქვამთ უარი.
ნასაკირალელები დღეს მიჩქაროდნენ, როგორც საარჩევნო უბანზე, ისე სამუშაო ფართობებშიც.
„აქაურ მკვიდრთ სიცოცხლე და შრომა ერთნაირად გვიყვარს. რა გასაკვირია, რომ სოფელში შეგხვდეთ, როგორც საარჩევნო უბნებზე მიმავალ ხალხს, ისე ტრაქტორით სამუშაოდ ფართობში მიმავალ ოჯახის წევრებს“ _ გვითხრეს ეთერ ხოზრევანიძემ, მარინა ირემაძემ, როინ თავდიშვილმა, გენო ჟღენტმა და სხვებმა.
