ფოთის ვალერიან გუნიას სახელობის პროფესიული თეატრი თითქმის ერთი წელია, გაჩერებულია. კორონაპანდემიის გამო არსებულმა შეზღუდვებმა თეატრი იძულებული გახდა, დროებით შეეწყვიტა სპექტაკლები და რეპეტიციები დახურულ სივრცეში. თეატრის დასმა ინტერნეტსივრცეში გააგრძელა შეხვედრები.
„პირველი კორონავირუსის ტალღის დროს ელექტრონული აფიშის მეშვეობით დაანონსდა არსებული საარქივო მასალები, რომლებიც ორი თვის მანძილზე გადიოდა ელექტრონულ პლატფორმაზე“, _ ამბობს ფოთის ვალერიან გუნიას პროფესიული თეატრის მსახიობი სანდრო გუჯაბიძე.
ის, ასევე, საუბრობს სამომავლო გეგმებზე, რომელიც გახორციელდება ქვეყანაში ეპიდემიოლოგიური სიტუაციის გაუმჯობესების შემდეგ. მიმდინარეობს მოლაპარაკება რეჟისორ მიშა ჩარკვიანთან, რომელიც გეგმავს ახალი ონლაინ პლათფორმის შექმნას. განთავსდება პავილიონში გადაღებული სპექტაკლი, რომელიც ფილმის სახით იქნება ნაჩვენები.
ფოთის ვალერიან გუნიას სახელმწიფო პროფესიულ თეატრსა და სოხუმის სახელმწიფო დრამატულ თეატრს შორის გაფორმდა მემორანდუმი. ხელშეკრულების ფარგლებში ორივე თეატრის დასი ერთობლივად მუშაობს ლაშა ბუღაძის პიესაზე _ ,,26 მაისი“. რეპეტიციები მიმდინარეობს ონლაინ რეჟიმში. მზადდება, როგორც სატელევიზიო სპექტაკლი და მისი ჩვენება მაყურებლისთვის, სავარაუდოდ, იანვარში ფილმის სახით იქნება შესაძლებელი.
„როგორ მდგომარეობაშიც არის სახელწიფო, ისეთ მდგომარეობაშია თეატრიც. ჩვენ მაინც ვაგრძელებთ მუშაობა. ფესტივალისთვის მოვამზადეთ სპექტაკლი, რომელიც ონლაინ პლატფორმაზე გავიდა. ჩვენ სახელმწიფოსგან დახმარება არ მოგვითხოვია. რა დღეშია ქვეყანა და ხალხი. სახელმწიფოს დავაწვე მე ჩემი პრობლემებით, უსინდისობაა. თეატრის რესურსებით ვაკეთებთ. თეატრის მეგობრების, ახლობლების. წინა საახალწლოდ გვქონდა გეგმაში გაგვეკეთებინა წარმოდგენა ბავშვებისთვის ღია სივრცეში და ამისთვის მზადებაც დავიწყეთ. გავაკეთეთ ასაწყობი სცენაც ღია სივრცისთვის, მაგრამ შეზღუდვების გამო, ვერ ვითამაშეთ, რაც ძალიან დასანანია.“ _ ამბობს ფოთის ვალერიან გუნიას პროფესიული თეატრის სამხატვრო ხელმძღვანელი რამაზ იოსელიანი.
