1954 წლის 4 ივლისს ქალაქი ბერნში (შვეიცარია) გაიმართა მსოფლიო თასის ფინალი. სტადიონ “ვანკდოფზე” (ახლანდელი “სტად დე სიუსი”, “იანგ ბოიზის”საშინაო არენა, რომელმაც 2008 წელს ევროპის ჩემპიონატს უმასპინძლა) შეკრებილმა 64 000-მა ადამიანმა დაძაბული და საინტერესო ფინალი იხილა. ჩემპიონი, უნგრეთისა და გერმანიის ფედერაცული რესპუბლიკის (გფრ) ნაკრებებს უნდა გამოევლინათ, საწყის ეტაპზეც ერთ ჯგუფში იყვნენ. მიუხედავად იმისა, რომ დასავლეთ გერმანიის ნაკრებმა 1/4 ფინალში საკმაოდ ძლიერი იუგოსლავია დაამარცხა (2:0), ნახევარფინალში კი ავსტრიელები გაანადგურეს 6:1, ფავორიტად ყველა მაინც უძლიერეს უნგრეთის ნაკრებს თვლიდა. სხვა რომ არაფერი, უნგრელებმა ჯგუფურ სტადიაზე 8:3 მოუგეს გფრ-ს და ფინალამდე, ოთხ თამაშში, ბურთების შეფარდება +18 (25:7) ჰქონდათ. ეს იყო ოცნების გუნდი, რომელმაც ღრმა და ლამაზი კვალი დატოვა ფეხბურთის ისტორიაში.
ფინალამდე უნგრელებს 40-მატჩიანი წაუგებელი სერია ჰქონდათ (1950-1954 წლებში 34 მოგება და 6 ფრე). ამ ნაკრებში თამაშობდნენ : ფერენც პუშკაში, სანდორ კოჩიშ (11 გოლით ჩემპიონატის ბომბარდირი გახდა), ზოლტან ციბორი, ნანდორ ჰიდეგუტი და სხვები. ასევე აღსანიშნავია ის ფაქტი, რომ ამ დროს, გერმანიაში პროფესიონალ ფეხბურთელთა ლიგაც კი არ არსებობდა.
მატჩის საწყისმა წუთებმა წინასწარი მოლოდინები და პროგნოზები კიდევ უფრო გაამყარა, ანგარიში მე-6 წუთზე პუშკაშმა გახსნა, 2 წუთში კი ზოლთან ციბორმა მეკარის შეცდომით ისარგებლა, ანგარიში ორამდე გაზარდა და თითქოს თამაშმა აზრი დაკარგა, მაგრამ გერმანელები დანებებას არ აპირებდნენ, ისინი მალევე მოეგნენ გონს და მე-10 წუთზე ერთი გოლი გაქვითეს, ეს ნახევარმცველმა მარკ მორლოკმა მოახერხა. 8 წუთში კი საყაიმო ანგარიში გფრ-ის კიდევ ერთმა ლიდერმა, ჰელმუტ რანმა დააფიქსირა. მანვე გაიტანა გადამწყვეტი გოლი 84 წუთზე.
მართალია, ბოლო წუთებზე დუბლის შესრულება პუშკაშსაც შეეძლო და მეორე გოლიც გაიტანა, მაგრამ ინგლისელმა მსაჯმა, უილიან ლინგმა, თამაშგარე დააფიქსირა.
გერმანელების ასეთ გმირობას არავინ ელოდა, ეს იყო მოულოდნელი გამარჯვება, რომელიც “ბერნის სასწაულად” შერაცხეს, სწორედ ასე იხსენებენ იმ დღეს გერმანელები.
პოლიტოლოგები და სოციოლოგები სწორედ ამ მატჩს უკავშირებენ გერმანიაში ეკონომიკური ბუმის დაწყებას და გერმანიის ფედერაციული რესპუბლიკის “დაბადების” რიცხვად 1954 წლის 4 ივლისს მიიჩნევენ.
ეს იყო მატჩი რომელმაც ისტორია შექმნა.
სამახსოვრო პლაკატი, რომელზეც გამოსახულია საათი გერმანელების გამარჯვების გოლის გატანის მომენტში.
