ევროკავშირი არაწევრი ქვეყნებიდან ჩასული პირებისთვის რეგულაციების გამკაცრებას განიხილავს. ამის შესახებ აღნიშნულია ევროკომისიის პრესსამსახურის მიერ გავცელებულ განცხადებაში.
უწყებაში მიიჩნევენ, რომ კორონავირუსის ახალი ვარიანტები და მსოფლიოში ჯანდაცვის არასტაბილური მდგომარეობა შემდგომი ზომების მიღებას მოითხოვს ევროკავშირში უსაფრთხო მოგზაურობის უზრუნველსაყოფად.
როგორც ევროკომისიის განცხადებაშია აღნიშნული, კომისია გამოდის ინიციატივით, რომ ყველა მოქალაქემ, რომელსაც ევროკავშირში ჩასვლა სურს, პისიარ ტესტის პასუხი თვითმფრინავში ჩაჯდომამდე წარადგინოს.
ასევე აღნიშნულია, რომ სასურველია ტესტი გამგზავრებამდე სულ მცირე 72 საათით ადრე გაკეთდეს.
„კორონავირუსის ახალი ვარიანტები და არასტაბილური მდგომარეობა ევროკავშირში უსაფრთხოდ მოგზაურობის უზრუნველსაყოფად ახალი ზომების მიღებას მოითხოვს.
ევროკავშირის წევრმა სახელმწიფოებმა PCR-ტესტის უარყოფითი პასუხი უნდა მოითხოვონ, რომელიც მგზავრმა გამგზავრებამდე 72 საათით ადრე უნდა გაიაროს. ევროკავშირის მოქალაქეებს, რეზიდენტებსა და მათი ოჯახის წევრებს ტესტის ჩაბარების შესაძლებლობა ევროკავშირის ტერიტორიაზე შესვლის შემდეგ უნდა ჰქონდეთ. სავალდებულო ტესტირებასთან ერთად ისეთი ზომებიც განიხილება, როგორიცაა თვითიზოლაცია, კარანტინი და კონტაქტების გამოვლენის მოთხოვნა.
სავალდებულო ტესტირებასთან ერთად, საჭიროების შემთხვევაში მოქალაქეს უნდა ჰქონდეს შესაძლებლობა გაიაროს 14-დღიანი კარანტინი და ამ პერიოდის შემდეგ კიდევ ერთხელ გაიკეთოს ტესტი,“ – აღნიშნულია განცხადებაში.
ევროკომისიის რეკომენდაციის მიხედვით, აუცილებელია შეიქმნას მგზავრების ადგილსამყოფელის მონიტორინგის ფორმა.
„ევროკავშირის არაწევრი ქვეყნების მოქალაქეების მისაღებად აუცილებელია რამდენიმე კრიტერიუმის გათვალისწინება – ინფექციის გავრცელების მაჩვენებელი, ჩატარებული ტესტების რაოდენობა და ა.შ. ბოლო 14 დღეში „კოვიდ-19“-ის მაჩვენებელი ყოველ 100 000 მოსახლეზე 25-ს არ უნდა აღემატებოდეს. ჩატარებული ტესტების რაოდენობა ბოლო შვიდ დღეში 100 000 მოსახლეზე, 300-ს უნდა აღემატებოდეს. ტესტის დადებითი პასუხი ბოლო შვიდ დღეში ჩატარებული ტესტებიდან 4%-ს არ უნდა აღემატებოდეს,“ – წერია ევროკომისიის პრესსამსახურის მიერ გავცელებულ განცხადებაში.
განცხადებაში აღნიშნულია, რომ ევროკომისია მნიშვნელოვნად მიიჩნევს იმ ფაქტის გათვალისწინებასაც, ფიქსირდება თუ არა მოგზაურის ქვეყანაში ვირუსის ახალი (მუტირებული) ვარიანტები.
აღნიშნული რეკომენდაციები ევროკავშირის საბჭომ უნდა განიხილოს.
