ლანჩხუთში, მოსახლეობა ადგილობრივ ხელისუფლებას სასულიერო გიმნაზიის მიმდებარე ტერიტორიაზე არსებული დაზიანებული ხიდის რეაბილიტაციის თხოვნით მიმართავს.
” ვინმეს თუ შეუძლია ჩვენი დახმარება და ვის? როდის ჩატარდება და როდის მოინდომებს ვინმე ტენდერის გამოცხადებას ამ ხიდთან დაკავშირებით?! შესაკეთებელი არაა, თავიდანაა გასაკეთებელი ეს ხიდი. იმედი მაქვს, მოგვაქცევთ ყურადღებას” , _ წერს სოციალურ ქსელში ირმა ორაგველიძე და დაზიანებული ხიდის ფოტოებსაც აქვეყნებს.
როგორც მოქალაქეთა მხრიდან გაკეთებული კომენტარებით ირკვევა, ხიდი, კარგა ხანია, მწყობრიდანაა გამოსული, ადგილობრივი ხელმძღვანელობაც საქმის კურსშია, თუმცა, ამ დრომდე ყურადღება არ ჩანს.
“ბევრი განცხადებაა შესული გამგეობაში ამ ხიდთან დაკავშირებით, თან დიდი ხანია, მაგრამ უშედეგოდ. ვფიქრობ, სანამ რაიმე უბედური შემთხვევა არ მოხდება, მანამ არავინ მიაქცევს აქაურობას ყურადღებასძ! ვიღაცა უნდა დაზარალდეს, რომ გააკეთონ?! მთლად რომ ჩაინგრევა, ალბათ, მერე მაინც მოგვაქცევენ ყურადღებას.
არავის პირად დახმარებას არ ვთხოვ _ გასაკეთებელია და უნდა გაკეთდეს, ვისი საქმეც არის მისგან და არა ჩემგან, ან ჩემი მეზობლებისგან!
ბევრჯერ გაკეთდა ხუტა და მედიკო ჩხაიძეების ჯიბით _ შვილმკვდარმა ოჯახმა გააკეთა, როცა არავინ არ უპატრონა ამ ხიდს. დროდადრო ხალხი აკეთებს, მაგრამ როდემდე უნდა აკეთონ აქ მცხოვრებლებმა?!
50 წელიწადში ერთხელ საჭიროა ხიდისთვის “ხელის შევლება” მთავრობისგან” , _ წერენ მოქალაქეები სოციალურ ქსელში და მუნიციპალიტეტის ხელმძღვანელობას ხიდის რეაბილიტაციას სთხოვენ.
მოსახლეობის მიერ ხიდთან დაკავშირებით სოციალური ქსელით გაჟღერებულ პრობლემას ლანჩხუთის მერიის პრესასთან ურთიერთობის განყოფილების ხელმძღვანელი მაკა სულაბერიძე სოციალური ქსელითვე პასუხობს და განმარტავს, რომ მერისა და შესაბამისი სამსახურების გადაწყვეტილებით, ხიდი უახლოეს დღეებში შეკეთდება.
