„ამოტრიალდა დედამიწა…დღეები ერთმანეთს ეჯიბრებიან ავის თქმაში. უდედოდ დაუტირებელ ბიჭს, განუსჯელად, დანარჩენი დედები დაიტირებენ. უფალო შეგვიწყალენ“, _ 27 წლის ახალგაზრდის, თორნიკე ორაგველიძის დაღუპვის ამბავს, რამაც სრულიად ლანჩხუთი შეძრა, ასე გამოეხმაურა მისი თანაქალაქელი სოფიო ჩხაიძე.
მართლაც წარმოუდგენელი ტრაგედია დატრიალდა რამდენიმე დღის წინ ლანჩხუთში ლაზო ორაგველიძის ოჯახში. კოვიდინფექციის შედეგად გარდაცვლილი ექიმის, ნანა ცინცაძის ვაჟი, რომელიც სასჯელს იხდიდა გეგუთის #2 პენიტენციურ დაწესებულებაში, 31 მარტს, დედის დასაფლავების დღეს თანასაკნელებმა გარდაცვლილი იპოვეს. როგორც ირკვევა, ცოტა ხნით ადრე სიკვდილამდე თორნიკეს დედის გარდაცვალების ამბავი შეატყობინეს.
„დამამუნჯებელი უბედურება დატრიალდა ლანჩხუთში, ორაგველიძეების ოჯახში, გლოვობს რაიონი ღირსეული ოჯახის ტრაგედიას.
ეს რა საშინელი ამბავი გვიამბე.. სიკეთის ხმა არსაიდან აღარ ისმის.. ყველა მხრიდან უბედურება მესმის. მართლა, გასკდა გული!! შვილი რომ დედის სიკვდილს ასე უპასუხებს, ამის იქით უბედურებაც აღარ არის! რაღაც სხვაა, უსახელოა.. .
მართლა უკიდეგანო გახდა სიკვდილის ძალა, დაუნდობელი და მუხთალი, ავზნიანი, ავის და კარგის არ გამრჩევი, უფალმა ცათა სასუფეველი დაუმკვიდროს მათ სულებს.
არ ვიცნობდი ამ ოჯახს, მხოლოდ მტკივა და მეწვის თითოეული დაკარგული ქართველის სიცოცხლე. უფალო შეუნდე ყველას არასწორად გადაწყვეტილი თვითნებურად სიკვდილი რა საშინელებაა, 2 ადამიანის ასე უდროოდ წასვლა ამ ქვეყნიდან, ვუსამძიმრებ ოჯახს
რა სულის შემძვრელი ტრაგედიაა, თმები ყალყზე დამიდგა, რა კარგი ექიმი, რა სიცოცხლით სავსე ბიჭი, რა დასანანია. უფალმა დაუმკვიდროს ცათა სასუფეველი“, -ასე ეხმაურებიან ლაზო ორაგველიძის ოჯახში დატრიალებულ ტრაგედიას ახლობლები, ნაცნობები თუ სრულიად უცნობები.
„ბოლოს ქალაქში შემხვდა, ალბათ, შარშან… რაღაცნაირად გამორჩეულად მიყვარდა. გულს ამოიღებდა და მოგცემდა. მე და ჩემი ნათლული ვიყავით მანქანით და თქვენ იმფერი კაი გოგოები ხართ სახლშიც დამტოვებთო. გზაზე ბევრი ვიცინეთ, ვისაუბრეთ, წავეკამათე კიდეც, ვერ წარმოვიდგენდი თუ ბოლო შეხვედრა იქნებოდა ჩვენი, თორემ სხვაგვარად მოვიქცეოდი. მშვიდად განისვენე, თოკო“, _ თორნიკეს გარდაცვალებას ასე გამოეხმაურა მეგობარი ნინია ბარამიძე.
ამ ტრაგიკულ ისტორიასთან დაკავშირებით სულისშემძვრელი პოსტი გამოაქვეყნა ორაგველიძეების ოჯახის ახლობელმა, ლანჩხუთის ყოფილი მაჟორიტარი დეპუტატის, აწ გარდაცვლილი ბიძინა გუჯაბიძის მეუღლემ, პედაგოგმა მაკა სახურიამ.
„სიკვდილი ჩამოსახლდა დედამიწაზე და კოშმარად აქცია ჩვენი ყოფა… ცრემლი არ შრება და გული გვეწურება საყვარელი ადამიანების დაკარგვით… დღეს ლანჩხუთში მიწას მივაბარეთ ნანა ცინცაძე, ქალი-სიკეთე, ქალი-ღირსება, ზეადამიანური მშვენიერებისა და სიყვარულის განსახიერება… ვგლოვობდით ნანას უდროოდ წასვლას, მის სამოთხესავით ლამაზ, გაწკრიალებულ სახლ-კარში ერთი სიკვდილი ჩამომჯდარიყო და მეორე თურმე გზად მოდიოდა… ნანას მეუღლე ლაზარე ბიბლიურ ლაზარესავით კეთილშობილი და დიდებული კაცია, მის კაცობას, გულუხვობას, თანადგომისა და მსახურების უნარს კიდეგანი არ ჰქონდა… ლაზარე ავადმყოფობს და იმედი მაქვს დაძლევს ამ სენს… თორნიკე… ნანას და ლაზარეს შვილი… კეთილი ნერგი ამ საოცარი ოჯახისა… კალმით ნახატი, ნიჭიერი, გულიანი, გონიერი ბიჭი, 26 წლის თორნიკე დღეს გეგუთის კოლონიაში სიცოცხლეს თვითმკვლელობით დაასრულებს, როცა ეტყვიან, რომ მისი ახალგაზრდა დედიკო გარდაიცვალა… ნანა დაკრძალეს და ნინიკოს, ნანას ქალიშვილს დაურეკეს, რომ… ყველა დამუნჯდა… ლანჩხუთი გლოვობს თავის საყვარელ შვილებს, საოცარ დედა-შვილს… და რატომ იყო საპყრობილეში ამ გამორჩეული ოჯახის შვილი? ეს შორი, გრძელი და სევდიანი ამბავია… თოკოს ლამაზმა სიყრმის მეგობარმა, ეკუნა კვაჭაძემ დაუწერა გერმანიიდან, ვიცი, რომ ასე არ გინდოდაო… თორნიკეს ხანმოკლე ცხოვრება მაგალითია იმისა, რომ უბედურება ზოგჯერ იქ დაიბუდებს, სადაც საღი ნიადაგია, სადაც სიკეთე და ცხელი გულია… ჩვენო ძე შეცდომილო, დედიკოს და მამიკოს გულის იარავ, დაიკოს ტკივილო, რა მამაცი ბიჭი ყოფილხარ, ასე როგორ მოიახლოვე სიკვდილი?.. გგონია შენს შეცდომებს სიკვდილით გამოისყიდდი, თოკო? ჩვენ შენ გვჭირდებოდი, ყველა შეცოდება გასწორდებოდა, რადგან ადამისა და ევას ცოდვილი ბუნება ყველას გვებრძვის, ყველას გვასუსტებს… თოკო, მე მახსოვხარ ლანჩხუთის თეატრის სცენაზე, რაკრაკა ხმით რომ მღეროდი ქართულ ხალხურ სიმღერებს, საკრავებს რომ აკვნესებდი გულიანად და ყველა შემოგციცინებდით, გვწყუროდა შენი მოსმენა… ანთებული იდექი და უფლის ანგელოზივით გალობდი… ან როგორ მღეროდი “შავლეგოს”… შენ საქართველოს რჩეული შვილი უნდა ყოფილიყავი… მჯერა, რომ გადატანილი ტკივილისთვის შენდობას მიიღებ, თოკო, ქერუბიმები აგიტაცებენ ზეცად და დედიკოს მიუხვალ… ღმერთო, რა დარდს დაატარებდა შენზე ნანა? ჩაგიკრავს შენი თბილი და მზრუნველი დედიკო, თორნიკე ორაგველიძე, კარგო ბიჭო, საყვარელო ადამიანო, ძე შეცდომილო, მკვდრეთით ვერაღდგენილო… დაგიამოს ტკივილიანი სული უფალმა, შეგინდოს ყველაფერი და სულთა სირაში მშვიდად გამყოფოს შენს ლამაზ დედიკოსთან ერთად… 31 მარტი აქამდე მიყვარდა, რეფერენდუმისა და ზვიადის დაბადების დღეს აღვნიშნავდით ხოლმე… აწი არ მეყვარება შენი და ნანას წილი 31 მარტი…. ამ დღეს ნანა მიწას მივაბარეთ, შენ კი ახლა შეუდექი ზეციურ საზვერეებს… ვლოცულობ შენთვის, თოკუნა, საყვარელო ბიჭო, დაგტირი ცხელი ცრემლებით… დაიფარე შენი ლამაზი და ჭკვიანი დაიკოს ახლადშექმნილი ოჯახი, დაე, გამრავლდნენ და გაძლიერდნენ ნინო და დიტო შენი და ნანას ხსოვნის სატარებლად… ძალიან მიყვარხარ, თოკუნა, ძალიან, სულ მენატრებოდი, მე და ბიძინა სულ შენზე ვდარდობდით, შორიდან გესაუბრებოდით… ბიძინაც მოგეგებება, არ დაგტოვებს უყურადღებოდ, შვილივით უყვარდი და ედარდებოდი… ცხოვნება შენს სულს...“, _ დაწერა ფეისბუქზე მაკა სახურიამ.
„გურია ნიუსისთვის“ პენიტენციური დაწესებულების პრესსამსახურის მიერ მოწოდებული ინფორმაციით, თორნიკე ორაგველიძე თანასაკნელებმა უგონო მდგომარეობაში იპოვეს.
“N2 დაწესებულების ბრალდებული თ.ო. (დაბ: 1993 წ.) საქართველოს ს.ს.კ-ის 177-ე მუხლის მესამე ნაწილის “დ” ქვეპუნქტით (ქურდობა) გათვალისწინებული დანაშაულის ბრალდებით 2020 წლის 16 ნოემბერს მოთავსდა N8 დაწესებულების საკარანტინო სივრცეში. 2020 წლის 28 ნოემბერს იგი გადაყვანილი იქნა N2 პენიტენციურ დაწესებულებაში. 2021 წლის 31 მარტს, დაახლოებით, 15:57 საათზე მისი თანამესაკნეები საკნიდან გაყვანილ იქნენ იმავე სართულზე არსებულ აბანოში, ხოლო ბრალდებული თ.ო. დარჩა საკანში. აბანოდან საკანში დაბრუნებისას თანამესაკნეებმა თ.ო. საკნის საპირფარეშოში უგონო მდგომარეობაში აღმოაჩინეს. მას ყელის არეში აღენიშნებოდა, სავარაუდოდ, ბასრი საგნით მიყენებული ჭრილობა. პირველადი სამედიცინო დახმარების გაწევის მიზნით ბრალდებული ჩაყვანილ იქნა დაწესებულების სამედიცინო ნაწილში და გამოძახებულ იქნა სასწრაფო სამედიცინო დახმარების ბრიგადა, თუმცა მედპერსონალის მცდელობის მიუხედავად, თ.ო.-ს გადარჩენა ვერ მოხერხდა. მომხდარის შესახებ დადგენილი წესით დაუყოვნებლივ ეცნობა სახელმწიფო ინსპექტორის სამსახურს, რომელმაც დაიწყო გამოძიება.
აღსანიშნავია, რომ თანამესაკნეების გადმოცემით თ.ო.-მ 31 მარტს შუადღის საათებში პენიტენციური დაწესებულებიდან განახორციელა სატელეფონო ზარი, რა დროსაც შეატყობინეს დედის გარდაცვალების ფაქტი”, _ ნათქვამის უწყების მიერ მოწოდებულ ინფორმაციაში.
